Iksudu.
10.
Nataman, migkahiyan te Magbebaye ne Manama si Muwisis, “Libed ka diye te Paraun ne Hari te Ihiptu, su impakehal ku ka ulu rin wey te me upisyal din eyew igpakapapitew ku kandan ka kein-inuwan ne me himu ku. 
Ne eyew egkahuhuran niyu degma ka me anak niyu wey ka me apu niyu ke immenu ku te egbayad-bayad ka me Ihiptuhanen, wey ke nekey ka me kein-inuwan ne inggimu ku diye te kandan. Ne puun due, egkanengnengan niyu ne sikeddiey ka Magbebaye ne Manama.” 
Purisu miggendiye si Muwisis wey si Aarun te Paraun wey migkahi, “Seini ka ingkahi te Magbebaye ne Manama te me Hibruwanen: ‘Ken‑u ke naan pad egparuma-ruma te igkeupii ku? Peyipanawa nud e ka keet-etawan ku eyew egpakasimba sikandan keddiey. 
Su emun ke kene nu pad man‑e sikandan egpeyipanawen, egpeuyanan ku kaaselem ka inged nu te me talangas. 
Eggulanap ka susuluhi ne me talangas wey kenad e egkakita ka tane. Egpangeenen dan ka langun ne pinamula ne ware nareeti te apiyew, wey ka nanubu ne me kayu. 
Egkapenu man‑e te me talangas ka baley nu wey te me upisyal nu, wey ka baley te langun ne me Ihiptuhanen. Ware de due nakita te me amey niyu wey me apu niyu kayi te Ihiptu ne iling due kasumpit ne me talangas puun te pegginguma ran kayi.’” Pegkapenga dutu, mig-awe e si Muwisis diye te Paraun. 
Ne migkahiyan te me upisyal ka Paraun, “Ken‑u bu pad egpeeneng-eneng ka seini ne etew ne egdulihis kanta? Peyipanawa nud ka me lukes eyew egpakasimba sikandan te Magbebaye ne Manama ran. Ware ke bes nakamaan-maan te nareetan e ka Ihiptu?” 
Purisu impalibed si Muwisis wey si Aarun diye te Paraun. Ne migkahiyan sikandan te Paraun, “Hipanew kew e wey simbaa niyud e ka Magbebaye ne Manama niyu. Piru nangeni a ke hentew ka egdumeen niyu.” 
Ne migtabak si Muwisis, “Egkaamin-amin key langun lagkes ka me bate wey ka me buyag. Eg-uyanen ney man‑e ka me karniru ney, ka me kambing, wey ka me baka ney su keilangan ne diye key egsahakeen te Magbebaye ne Manama.” 
Ne migsusumpalit ka Paraun ne migkahi, “Egdumaan kew te Magbebaye ne Manama ke egtuhutan ku ne igparuma kaniyu ka me bate! Klaru ne mareet ka insuman-suman niyu. 
Kene sika egkaayun! Iyan de egpekeyipanew ka me lukes eyew egpakasimba te Manama, su sikan ma iya ka igkeupii niyu.” Ne impaawe e si Muwisis wey si Aarun diye te tangkaan te Paraun. 
Ne migkahiyan te Magbebaye ne Manama si Muwisis, “Kayawa nu ka belad nu ne igpalenged diye te Ihiptu eyew eggingumaan sikandan te me talangas wey egkeenen ka langun ne me pinamula ne ware nareeti te apiyew.” 
Seeye naa, ingkayew ni Muwisis ka tuked din ne impalenged te Ihiptu, wey impakalamahan te Manama ka inged te Ihiptu. Napawaan ka kalamag ne egpuun te igsile, wey te maselem e, nakarume e ka me talangas te kalamag. 
Ne miglene ka susuluhi ne talangas diye te Ihiptu wey miggulanap te seeye ne inged. Ware pad iling dutu kasulug te talangas dengan ne miggulun te Ihiptu wey warad egpekeiling pad dutu. 
Su miggulanap de iya ka talangas wey nekeempet te Ihiptu, wey migmeitem e ka tane. Impangeen te me talangas ka langun ne pinamula wey ka me behas te kayu ne ware nareeti te apiyew. Warad iya nasame ne me derewunen te me kayu, wey ke pinamula naa diye te Ihiptu. 
Ne imparagdahawan ipeumew te Paraun si Muwisis wey si Aarun wey migkahiyan, “Nakasala a te Magbebaye ne Manama niyu, wey nakasala a degma kaniyu. 
Sikan naa, pasayluwa a man‑e nikaniyu, wey ampu kew te Magbebaye ne Manama niyu ne eg-aween din kayi te keddi seini se egpakapatey ne legpad.” 
Ne dutu, mig-awe e si Muwisis diye te Paraun wey mig-ampu diye te Manama. 
Ne migpakalamag e man‑e ka Manama te nenekali ne egpuun te iglineb wey nanlayap ka langun ne talangas peendiye te Malalab ne Dahat. Ne warad iya nasame minsan sabeka naan de ne talangas diye te intiru ne inged te Ihiptu. 
Piru impakehal ded man‑e te Magbebaye ne Manama ka ulu te Paraun wey ware din peyipanawa ka me kabuhalan ni Israil. 
Nataman, migkahiyan te Magbebaye ne Manama si Muwisis, “Kayawa nu ka belad nu diye te aw-awangan eyew due delem ne egpakabukus te inged te Ihiptu. Kekepali ka sika ne delem su hendue te egkaheram e.” 
Seeye naa, ingkayew ni Muwisis ka belad din diye te aw-awangan, wey nabukusan te mangune-kune ne delem ka intiru ne inged te Ihiptu te tatelu ne aldew. 
Ware nenekegkita ka me mahinged diye wey ware sikandan migmanlihawang te me baley ran te tatelu ne aldew. Piru malayag mule diye te inged ne in-ugpaan te me kabuhalan ni Israil. 
Nataman, impeumew te Paraun si Muwisis wey migkahiyan, “Hendiye kew e wey simbaa niyud ka Magbebaye ne Manama. Dumaa niyu langun ka me bate wey ka me malitan, wey iyan niyu naan de ihaat kayi ka me ayam niyu.” 
Piru migkahi si Muwisis, “Keilangan ne egpeuyanen key nikeykew te me ayam su egtutungen ney ne igpanubad diye te Magbebaye ne Manama ney. 
Ne keilangan iya ne eg-uyanen ney ka langun ne ayam ney wey ware minsan sabeka ne iggaat eyew egpakaalam key te igpanubad ney te Manama ney. Ware key pad kuntee nakanengneng ke nekey ka igpanubad ney kandin, wey e ke egginguma key e diye.” 
Piru impakehal red iya man‑e te Magbebaye ne Manama ka ulu te Paraun wey ware din peyipanawa sikandan. 
Ne migkahiyan te Paraun si Muwisis, “Awe ka kayi! Kene kad iya bul‑ug pakita pad keddiey! Su emun ke egkakita ku pad sikeykew, egkeyimatayan ka iya.” 
Migtabak si Muwisis, “Ke iling due ka igkeupii nu, kena ad iya egpakita pad keykew.”