Iksudu.
12.
Ne migkahiyan te Magbebaye ne Manama si Muwisis wey si Aarun diye te Ihiptu, 
“Puun kuntee, seini ne bulan ka an-anayan ne bulan niyu te leg‑un. 
Ipanengneng niyu te langun ne kabuhalan ni Israil ne emun ke eggingume e ka igkasapulu ne aldew te seini ne bulan, egpaalamen te nati te karniru wey ke kambing naa ka senge-balayan eyew eggilangen dan te taltalaanak. 
Ke kene egkaamin te taltalaanak ka ngalap su deisek de sikandan, keilangan ne egpabulihan dan te marani ne sumbaley ran. Egbaaren dan seeye wey eg-alaheen dan de ka karakel te ngalap ne eleg dan te taltalaanak te egkeen wey kamenu karakel ka egkaamin te sabeka ne etew. 
Iyan niyu kua ka nati te karniru wey ke kambing naa ne senge-tuig pad, wey ware dalu. 
Tangguwa niyu pa sika taman te igkasapulu wey hep‑at (14) ne aldew te seini ne bulan, ne wey niyud gilanga ke egkasagkup e ka sika ne aldew. Keilangan ne eglagpu kew langun se kabuhalan ni Israil ka eggilang te ayam. 
Ne pakua nu sikandan te langesa wey ipapunas nu diye te daruwa ne sungkaleg te gumawan wey te ingketal diye te ampew te gumawan te baley ne egkeenan dan te ngalap. 
Te sika ne marusilem, ipatuug nu kandan ka ngalap wey ipakeen nu kandan ne egseraan te paan ne ware patulin wey te mapeit ne me gulay. 
Kene kew keen te meyilew wey ke insabawan ne ngalap, su timmana niyu tuuha ka ngalap lagkes ka ulu, ka paa, wey ka langun ne diye te getek. 
Amina niyu re seini wey kene niyu pasimahi. Ke due iya egkasame taman te maselem, tutunga niyu. 
Emun ke egkeen kew e, panakebut kew, wey keilangan ne eglilibed kew, wey egsesandal, wey ay-ayuna niyud ka me tuked niyu. Su iyan sika ka Peglihad te Magbebaye ne Manama. 
“Te sika ne marusilem, eglihad a te inged te Ihiptu wey egpangimatayan ku ka langun ne panganey ne anak ne lukes te me Ihiptuhanen wey te me ayam dan. Eglegparan ku ka langun ne manama te Ihiptu. Sikeddiey ka Magbebaye ne Manama. 
Ka langesa ne impunas niyu diye te baley niyu, iyan tuus te baley ne mig-ugpaan niyu. Ke egkakita ku ka langesa, egliharan ku re ka sika ne baley, wey ware mareet ne egkeyitabu kaniyu ke eglegparan ku ka Ihiptu. 
Keilangan ne egtantanuran niyu ka sika ne aldew wey eggimuwen ne tulumanen te ware egtamanan. Ne sahakeen kew te sika ne aldew eyew te pegpasalamat keddiey. Ipabulus niyu naa sika wey te me kabuhalan niyu te ware egtamanan.” 
“Te pitu ne aldew, iyan niyu keena ka paan ne ware patulin. Te an-anayan ne aldew, awaa niyu diye te me baley niyu ka langun ne patulin te paan, su minsan hentew ne egkeen te paan ne due patulin puun te an-anayan ne aldew taman te igkapitu ne aldew, kenad e sikandin eg-ileen ne karumaan pad te kabuhalan ni Israil. 
Liblibulung kew te an-anayan ne aldew wey te igkapitu ne aldew eyew egsimba keddiey. Ne kene kew trabahu te sika ne aldew angin e te peg-andam te egkeenen niyu. Sikan de ka egkaayun ne eggimuwen niyu. 
Sumsumana niyu ka Sahakeen te Paan ne Ware Patulin su sika ka aldew ne impaawe ku sikaniyu te Ihiptu ne naamin-amin langun ka me kabuhalan niyu. Purisu sahakeen kew te sika ne aldew, wey himuwa niyu seini ne tulumanen wey te me kabuhalan niyu te ware egtamanan. 
Bunsud kew sahakeen te marusilem te igkasapulu wey hep‑at (14) ne aldew taman te marusilem te igkararuwa ne pulu wey sabeka (21) ne aldew te an-anayan ne bulan. Ne iyan niyu keena ka paan ne ware patulin. 
Keilangan ne warad e patulin te paan ne egkakita diye te me baley niyu, su kenad eg-ileen ne sakup pad te keet-etawan te Israil ka minsan hentew ne egkeen te minsan nekey ne due patulin, lapu ma sikandin wey ke mahinged naa te Israil. 
Kene kew en iya keen te paan ne due patulin, minsan hendei kew egpekeugpe.” 
Nataman, impeumew ni Muwisis ka langun ne igbuyag te me Hibruwanen wey migkahiyan, “Alam kew te nati te karniru wey ke kambing naa eyew eggilangan niyu te taltalaanak te Sahakeen te Peglihad te Magbebaye ne Manama. 
Tayaa niyu te pelenggana ka langesa, wey angey kew te sugpang te isupu wey ieled niyu te langesa wey lakulasi niyu ka daruwa ne sungkaleg te gumawan te baley niyu wey ka ingketal dibabew te gumawan. Ne kene kew lihawang te baley niyu taman te maselem 
su eglihad ka Magbebaye ne Manama eyew egpangimatey te me Ihiptuhanen. Ne emun ke egkiteen din ka langesa diye te ingketal wey te daruwa ne sungkaleg te gumawan, eglihad de sikandin wey kene din egpaseleren te baley niyu ka talagdereet eyew eggimatey kaniyu. 
Keilangan ne egtantanuran niyu wey te me kabuhalan niyu seini ne tulumanen te ware egtamanan. 
Ne ipabulus niyu sika ne tulumanen ke egpekeendiye kew e te inged ne insaad te Magbebaye ne Manama ne igbehey kaniyu. 
Emun ke eg-insaan kew te me anak niyu ke nekey ka kaluwasan te sika ne pegsahakeen, 
kahii niyu re sikandan te sika ka Sahakeen te Peglihad te Magbebaye ne Manama. Su inliharan din de dengan ka me baley te me kabuhalan ni Israil diye te Ihiptu te pegpangimatey rin te me Ihiptuhanen.” Ne mig-usengul e diye te tane ka me etew wey migsimba te Manama. 
Nataman, nangipanew e sikandan wey intuman dan e ka insuhu te Magbebaye ne Manama ki Muwisis wey ki Aarun. 
Te egliware e te marusilem, impangimatayan te Magbebaye ne Manama ka langun ne panganey ne anak ne lukes diye te Ihiptu, puun te panganey ne anak te Paraun ne Hari te Ihiptu ne iyan egsubal te trunu te amey rin, peendiye te me anak te me pinirisu. Ne impangimatayan din degma ka me panganey ne anak te me ayam. 
Napukew ka Paraun wey ka me upisyal din wey ka langun ne Ihiptuhanen te seeye ne marusilem, su amana ne masumpit ka dalawitan te me mahinged. Impatayan ka langun ne baley diye te Ihiptu. 
Te seeye de ne karusileman, impeumew te Paraun si Muwisis wey si Aarun wey migkahiyan, “Na, pangipanew kew e wey awe kew e kayi te kanami! Simbaa niyud ka Magbebaye ne Manama iling te ingkahi niyu. 
Uyana niyu degma ka me ayam niyu te peggipanew niyu. Piru ampui e pa degma nikaniyu ne egpanalanginan a.” 
Indalasek te me Ihiptuhanen ka me kabuhalan ni Israil ne egpaaween e sikandan diye te Ihiptu, su suman-suman dan ne kema ke egpatey degma sikandan langun ke kene sikandan eg-awe. 
Purisu neuyan de due te me etew ka inluyang ne harina ne ware patulin ne diye pad nakatahu te egluyangan dan te paan. Imbukusan dan seeye te hinabel wey intiang dan e. 
Intuman te me kabuhalan ni Israil ka ingkahi ni Muwisis kandan ne egpepamuyuen te mahal ne me kasangkapan ne pelata wey bulawan, wey te me kumbale te me Ihiptuhanen. 
Impangabangan te Magbebaye ne Manama ne eg-ay-ayaran te me Ihiptuhanen ka me kabuhalan ni Israil, sikan naa ka impamehayan sikandan te impamuyu dan. Puun due, nekeiling de te impangahawan dan ka me Ihiptuhanen te me kasangkapan dan. 
Ne nangipanew e ka me kabuhalan ni Israil ligkat te Ramisis peendiye te Sukut. Me 600,000 langun ka me lukes, wey ware pad labet te me malitan wey te me bate. 
Due degma me etew ne kene ne me kabuhalan ni Israil ne migluyud kandan te eggipanew. Masalig degma amana ka in-uyan dan ne me ayam dan. 
Nataman, innilutu dan ka inluyang dan ne harina ne ware patulin ne in-uyan dan puun te Ihiptu. Ware dan seini natahui te patulin su indalasek sikandan ne egpaaween diye te Ihiptu, wey warad sikandan nekeyilutu te egbewuwen dan. 
Nekeugpe ka me kabuhalan ni Israil diye te Ihiptu te 430 ne leg‑un. 
Te katammanan ne aldew te igke-430 e ne leg‑un, nangawe e ka langun ne keet-etawan te Magbebaye ne Manama diye te Ihiptu. 
Marusilem sikandan ipaawe te Manama diye te Ihiptu, wey imbantayan din sikandan te seeye ne karusileman. Purisu ke egginguma ka seeye ne timpu tagse leg‑un, kene degma eglipereng ka me etew te sika ne marusilem, su igbehey ran degma diye te Manama eyew pegsuman-suman kandin, wey eggimuwen dan seini taman te katamanan. 
Ne migkahiyan te Magbebaye ne Manama si Muwisis wey si Aarun, “Seini ka tulumanen meyitenged te Sahakeen te Peglihad te Panalihan: Kene egkaayun ne egpakakeen ka kene ne kabuhalan ni Israil. 
Piru egpakakeen ka uripen ne nabeli niyu ke natulian e sikandin. 
Piru kene egpakakeen ka me lapu wey ka me suluhuanen ne egbayaran. 
Keilangan ne diye de seini egkeena te seled te baley; kene kew en iya uyan diye te lihawangan te baley, wey kene niyu gepua ka me tul‑an te egkeenen niyu. 
Keilangan ne eg-amin-amin egsahakeen ka langun ne kabuhalan ni Israil. 
Emun ke due lapu ne miglemung mig-ugpe kaniyu wey egkeupian ne egsahakeen te Peglihad te Magbebaye ne Manama, keilangan ne egtulian ka langun ne sakup din human pad sikandin egpakaambag te sahakeen, wey eg-isipen e sikandin ne sakup te kabuhalan ni Israil. Piru kene iya egpakakeen ka ware natulii. 
Sika iya ka balaud ne egtumanen niyu wey te me lapu ne miglemung kaniyu mig-ugpe.” 
Ne inggimu te langun ne me kabuhalan ni Israil ka insuhu te Magbebaye ne Manama ki Muwisis wey ki Aarun. 
Te seeye de iya ne aldew, impaawe sikandan te Manama puun te Ihiptu wey impegluyud-luyud din ka tagse kabuhalan.