Iksudu.
13.
Ne migkahiyan te Magbebaye ne Manama si Muwisis, 
“Ihalad nu keddiey ka langun ne panganey ne anak ne me lukes te me kabuhalan ni Israil wey te me ayam, su keddiey ka langun ne panganey.” 
Nataman, migkahiyan ni Muwisis ka keet-etawan, “Tantanuri niyu ka seini ne aldew ne impaawe kew te Magbebaye ne Manama te Ihiptu ne mig-uripen kaniyu. Su maresen sikandin, wey nakaawe kew te seini ne inged. Ne kene kew naa keen te paan ne due patulin. 
Awe kew te Ihiptu kuntee ne aldew te bulan te Abib. 
Sikan naa, tantanuri niyu ka seini ne aldew wey sahakeen kew ke eg-uyanen kew e te Manama diye te inged ne mig-ugpaan te me Kanaanen, me Hitihanen, me Amurihanen, me Hibihanen, wey te me Hibusihanen. Insaad din dengan seeye ne inged ne igbehey diye te me kabuybuyahan niyu, wey meupiya ka tane wey dakel se eg-uma. 
Te pitu ne aldew, iyan niyu keena ka paan ne ware patulin, wey te igkapitu e ne aldew, sahakeen kew e eyew egpasalamat te Magbebaye ne Manama. 
Keilangan ne iyan niyu re keena ka paan ne ware patulin te pitu ne aldew, wey keilangan ne ware patulin ne egkakita diye te inged ne eg-ugpaan niyu. 
Te sika ne aldew, nangeni niyu ka me anak niyu te migsahakeen kew tenged te inggimu te Manama ne pegpaawe kaniyu diye te Ihiptu. 
Ka sika ne sahakeen, egpekeiling te pangeteb diye te belad wey te buked niyu eyew kene niyu egkalingawan ka suhu te Manama. Su maresen sikandin ne migpaawe kaniyu puun te Ihiptu. 
Purisu keilangan ne eggimuwen niyu ka seini ne sahakeen te nateil e ne timpu tagse leg‑un.” 
“Migsaad ka Magbebaye ne Manama kaniyu wey te kabuybuyahan niyu ne igbehey kaniyu ka inged ne mig-ugpaan te me Kanaanen. Ne emun ke eg-uyanen kew e te Manama diye, 
keilangan ne ighalad niyu kandin ka panganey ne me anak niyu ne lukes, wey ilagkes niyu degma ka panganey ne me anak ne lukes te me ayam niyu, su iyan kamuney kandan ka Manama. 
Egkaayun ne eglekaten niyu ka nati te asnu wey egsaliyuwan de seini te nati te karniru. Piru emun ke kene niyu eglekaten, keilangan ne eggepuen ka lieg te asnu. Keilangan ne eglekaten niyu degma ka panganey ne me anak niyu ne lukes. 
Emun ke eg-insaan kew keureme te me anak niyu ke mania te eggimuwen niyu sika, nangeni niyu sikandan, ‘Maresen ka Magbebaye ne Manama wey impaawe key nikandin ligkat te Ihiptu ne mig-uripen kanami dengan. 
Te timpu ne imbalabahan key te Paraun ne Hari te Ihiptu ne eg-awe, impangimatayan te Manama ka langun ne anak ne me lukes te me Ihiptuhanen wey ka langun ne panganey ne anak ne me lukes te me ayam. Purisu ighalad ney te Manama ka langun ne panganey ne anak ney wey minsan ka panganey ne me anak te me ayam. Piru keilangan mule ne eglekaten ney ka panganey ne me anak ney ne lukes.’ 
Ne ka sika ne me tulumanen, nekeiling te pangeteb kayi te me belad ney wey te me buked ney, su egkasuman-suman ney ka pegpaawe kanami te Magbebaye ne Manama puun te Ihiptu su maresen sikandin.” 
Te impeyipanew e te Paraun ka me kabuhalan ni Israil, ware sikandan uyana te Manama peendiye te inged te me Pilistihanen minsan seeye iya ka igpantek ne dalan. Su migkahi ka Manama, “Emun ke due gubut ne egkeumaan dan, kema ke egkabalbalawan ka suman-suman dan wey eglibed ded diye te Ihiptu.” 
Purisu in-uyan sikandan te Manama diye te disirtu peendiye te Malalab ne Dahat. Ne andam iya ne egpakiggira ka me kabuhalan ni Israil te pegligkat dan te Ihiptu. 
Ne in-uyan ni Muwisis ka tul‑an ni Husi tenged su impasaad wey impepahunlibet dengan ni Husi ka me kabuhalan ni Israil te igpeyimu rin kandan. Su migkahi si Husi, “Malehet iya ne egleuyen kew te Manama, wey uyana niyu naa ka tul‑an ku ke eg-awe kew e kayi.” 
Nataman, mig-awe e sikandan diye te inged ne Sukut wey miggendiyad te Itam ne lenged te disirtu wey diyad sikandan migkekampu. 
Te maaldew, eggun‑a ka Magbebaye ne Manama kandan ne egpekeiling te sungkaleg ne gapun eyew egtuus te igbaye dan. Te marusilem, eggun‑a man‑e sikandin ne egpekeiling te sungkaleg ne hapuy eyew egteng‑ew kandan. Sikan naa ka egpekeyipanew sikandan te maaldew wey marusilem. 
Ne kene eg-awe diye te kewun‑aan dan ka gapun ne egpekeiling te sungkaleg ke maaldew, wey ka hapuy ne egpekeiling te sungkaleg ke marusilem.