Iksudu.
15.
Ne mig-ulahing si Muwisis wey ka me kabuhalan ni Israil te seini ne ulahingen diye te Magbebaye ne Manama, “Eg-ulahingan ku ka Manama su mabantug sikandin se migpanpanalu, indegpak din diye te dahat ka me kudde wey ka migmangudde dutu. 
Ka Manama ka egbehey te geem ku wey kanekal ku; wey sikandin iya ka talagluwas ku. Sikandin ka Manama ku wey egdeyrayen ku sikandin. Sikandin ka Manama te amey ku, egdayanen ku sikandin. 
Bahani ka Manama; Magbebaye ne Manama ka ngaran din. 
“Ka me karwahi wey ka me sundalu te Paraun ne Hari te Ihiptu, indegpak din diye te dahat. Ka in-alam din ne me upisyal, nalened te Malalab ne Dahat. 
“Naalep sikandan te maralem ne dahat, wey nekeiling te batu ne natanled diye te pused te dahat. 
He Magbebaye, subla ne maresen ka kawanan ne belad nu; inlupet nu Manama te kawanan ne belad nu ka me kuntere nu. 
Tenged te amana ne dakel ka geem nu, intalu nu ka egkuntere keykew; impaneem-neem nu kandan ka nangebel-ebel ne langet nu, wey nekeiling sikandan te lahami ne insilaban nu. 
Sengehiyupan nu re, egkalimud e ka weyig, wey egkalulun ka weyig wey egsasindeg iling te dalama, wey egkammara ka pused te dahat. 
Migkahi ka kuntere, ‘Egtalukunan ku sikandan wey egpandakepen ku; egba-baaren ku ka langun ne kasangkapan dan wey egkuen ku ka langun ne igkeupii ku. Eggulabuten ku ka kampilan ku wey egguleen ku sikandan te belad ku.’ 
Kunaleg te kasabeka nu re sikandan hiyupa, nenaalep e te dahat; nekeiling sikandan te tingga ne natanled diye te pused te dahat. 
“He Magbebaye, hentew te me manama ka egpekeiling keykew? Manama, hentew‑a ka egpekeiling keykew te subla ne matulus wey maresen? Dakel ka himu nu wey amana ne kein-inuwan ka egmangimuwen nu! 
Ingkayew nu ka kawanan ne belad nu, wey in-abeleng te tane ka me kuntere ney. 
Tenged te geyinawa nu ne kene egkabalbalawan, in-uyan nu ka me etew ne inluwas nu; Impanulud nu sikandan diye te matulus ne inged tenged te kanekal nu. 
Nakarineg ka me etew te minsan hendei, wey naliyasan sikandan wey nangelkel; ne migmemasakit ka geyinawa te me Pilistihanen. 
Nenaaldek ka me ahalen te Idum; nangelkel te liyas ka me pangulu te Muwab; nenallepu ka me mahinged te Kanaan. 
Mig-umaan sikandan langun te liyas wey nangelkel, tenged te karesen nu ne mangune-kune. Warad weilan dan iling te me batu, taman te nakalihad e ka keet-etawan nu, taman te nakabaye e ka munusiye nu, ka me etew ne neuripen ne impaawe nu. 
Eg-uyanen nu sikandan Magbebaye wey igteil nu diye te bubungan nu, ka inged, Manama ne inggimu nu ne ugpaan nu, ka ugpaan nu, Magbebaye ne inteil nu. 
Eghari ka Magbebaye ne Manama te ware egtamanan.” 
Te peglapas te dahat te me kudde te Paraun wey te seeye se nanguntud te me karwahi wey te migmangudde, impalibed e man‑e te Magbebaye ne Manama ka dahat ne nabaad wey naalep sikandan langun. Piru ka me kabuhalan ni Israil, miglapas mule te tane ne mammara diye te elat te dahat. 
Ne dutu, due prupita ne malitan ne egngaranan ki Miryam ne atebey ni Aarun. Mig-angey sikandin te tamburin wey migsinundul kandin ka langun ne malitan ne due me tamburin wey nanesayew e sikandan. 
Ne mig-ulahingan sikandan ni Miryam, “Ulahingi niyu ka Magbebaye ne Manama su mabantug sikandin se migpanpanalu; indegpak din diye te dahat ka me kudde wey ka migmangudde.” 
Nataman, in-uyan e ni Muwisis ka me etew ligkat te Malalab ne Dahat peendiye te disirtu ne egngaranan te Sur. Natateluwan e sikandan ka miggipanew wey warad iya sikandan nakakita te weyig. 
Ne nataman miggingume e sikandan diye te Mara piru ware sikandan nekeinum te weyig dutu su mapeit. Purisu ingngaranan te Mara ka seeye ne inged su mapeit ka igpasabut te lalag ne Mara. 
Ne dutu, migsagsahukul e ka keet-etawan diye te ki Muwisis ne migkahi, “Nekey naan e ka eg-inumen ta?” 
Ne migpangananey si Muwisis te Magbebaye ne Manama wey impakita sikandin te Magbebaye te kayu. In-antug din seeye diye te weyig wey warad e migmapeit ka weyig. Te seeye ne inged, imbehayan sikandan te Manama te tulumanen wey balaud eyew eggeraman ke egparuma-ruma sikandan kandin. 
Migkahi sikandin, “Emun ke eg-ayad-ayad kew egpammineg keddi te Magbebaye ne Manama niyu, wey eleg ka eggimuwen te keddi ne suman-suman, wey egtumanen niyu ka me suhu wey me balaud ku, kene ku sikaniyu egpane-neemen te minsan nekey ne dalu ne impaneem-neem ku te me Ihiptuhanen, su sikeddiey ka Manama ne talagbawi kaniyu.” 
Nataman, miggingume e sikandan diye te Ilim ne due sapulu wey daruwa (12) ne sebseb wey due pitu ne pulu (70) ne kayu ne palmira, wey nangekampu e sikandan diye te ilis te weyig.