Iksudu.
17.
Ne mig-awe e ka me kabuhalan ni Israil diye te disirtu ne egngaranan te Sin wey migpabulus sikandan miggipanew su insuhu sikandan te Magbebaye ne Manama. Miggalin-halin sikandan mig-ugpe taman te migginguma ran diye te Ripidim wey diyad nangekampu. Piru ware weyig diye ne egkeinum te me etew, 
sikan naa ka intebek dan si Muwisis te migkahi, “Behayi key te weyig ne eg-inumen ney.” Ne migkahiyan sikandan ni Muwisis, “Mania te egtebeken a nikaniyu? Mania te eg-el-elehan niyu ka Magbebaye ne Manama?” 
Piru nammaraan e amana ka me etew wey migsagsahukul e ki Muwisis ka migkahi, “Mania te impaawe key pad iya nikeykew diye te Ihiptu ke egpamatey key re kayi su ware egkeinum ney kayi? Duen pe ma me anak ney wey me ayam ney ne egkengammaraan e amana!” 
Purisu migpangananey si Muwisis te Magbebaye ne Manama ka migkahi, “Nekey‑a ka eggimuwen ku te seini ne me etew? Deisek naan de iya ne egderegpaken ad e nikandan.” 
Ne migkahiyan te Manama si Muwisis, “Hun‑a ka te me etew wey duruma ka te me igbuyag, wey uyana nu ka tuked nu ne inlampes nu te Weyig ne Nilu. 
Egtaharan ku sikeykew diye te dibabew te batu diye te Bubungan ne Sinay. Lampesi nu naa ka batu diye wey egtulayas ka weyig ne egkeinum te me etew.” Ne inggimu iya seeye ni Muwisis diye te tangkaan te me igbuyag te me kabuhalan ni Israil. 
Migngaranan ni Muwisis seeye ne inged te Masa wey Miriba tenged te pegtebek kandin te me etew wey te peg-eleg-eleg dan te Magbebaye ne Manama, su migmaap-apuley sikandan ke indumaan naan ded sikandan te Manama wey ke ware. 
Te diye pad sikandan te Ripidim, miglusuran sikandan te me Amalikanen wey migpakig-ehet kandan. 
Ne migkahiyan ni Muwisis si Huswi, “Alam ka te me etew wey pakig-ehet kew te me Amalikanen. Egsasindeg a kaaselem diye te ampew te bubungan ne eggen-gen te tuked te Manama.” 
Ne intuman ni Huswi ka insuhu kandin ni Muwisis wey migpakig-ehet sikandan te me Amalikanen taheed te migtakereg te bubungan si Muwisis, si Aarun, wey si Hur. 
Ke egkayawen ni Muwisis ka belad din, egpanalu ka me kabuhalan ni Israil, piru ke egtuntunen din ka belad din, egpanalu ka me Amalikanen. 
Nataman, napu-pu e ka belad ni Muwisis, sikan naa ka migkuwa si Aarun wey si Hur te batu eyew egpapinnuuwan ki Muwisis. Ne migpalimangey sikandan ka egkayew te belad ni Muwisis taman te miglineb ka aldew. 
Purisu natalu enni Huswi ka me Amalikanen. 
Ne ingkahiyan te Magbebaye ne Manama si Muwisis, “Isulat nu seini diye te baseen eyew kene egkalingawan, wey ipanengneng nu ki Huswi ne egguleen ku iya eg-am-amina ka me Amalikanen.” 
Nataman miggimu si Muwisis te altar wey ingngaranan din te, “Ka Manama ka kapanaluwan ku.” 
Migkahi sikandin, “Ingkayew ku ka belad ku diye te trunu te Magbebaye ne Manama. Egpabulus sikandin ne egpakig-ehet te me Amalikanen te ware egtamanan!”