Iksudu.
23.
“Kene kew pangguhud te me guhuren ne kene ne malehet. Kene kew pangguhud te ubat eyew te pegpangabang te etew ne due sale. 
Kene kew iling te mareet ne eggimuwen te keet-etawan, wey kene kew paruma-ruma te kasuluhan ke egpamalehet kew. Kene kew iling kandan te egdereet te eleg ne peggukum. 
Piru kene niyu man‑e lapihi ka egkaayu-ayu puun de su egkaayu-ayu sikandan. 
“Emun ke egpakakita kew te baka ne nakaleke wey ke asnu naa te kuntere niyu, uyana niyu red seini diye te kamuney. 
Ke egkakita niyu ne napeled ka asnu te etew ne egkuntere kaniyu su indulanan din te mabehat, kene niyu balahara sikandin, su bulihi niyu te eg-enew te asnu rin. 
“Keilangan ne eleg ka peggukum niyu te egkengaayu-ayu diye te hukumanan. 
Kene kew taweles pamayung wey kene kew himatey te ware sale wey te matareng ne etew, su egdusaan ku ka eggimu te iling due. 
Kene kew dawat te igbayad eyew igbunbun te mareet, su egpakabunbun sika te mata niyu wey kene niyud egkakita ka malehet, wey egkalupihan e ka ware sale. 
“Kene kew bayad-bayad te me lapu su nakanengneng kew te egkeula-ula te me lapu puun su nakalapu kew degma dengan diye te Ihiptu.” 
“Pamulei niyu ka tane niyu te hen‑em ne leg‑un, wey limura niyu ka egkahaani niyu. 
Piru te igkapitu ne leg‑un, peyimmelaya niyu pa ka tane wey kene niyu gaaniya ka minsan nekey ne egtubu. Ibehey niyud seini te duma niyu ne egkaayu-ayu wey iyan e balahad te egkasame ka me mahintalunan. Ne iling ded degma ka me pinamula niyu ne me paras wey me ulibu, balahara niyu ka me behas te igkapitu ne leg‑un. 
“Trabahu kew te hen‑em ne aldew, piru himeley kew te igkapitu ne aldew, eyew egpekeyimeley degma ka me baka niyu, ka me asnu niyu, ka me uripen niyu, wey ka me lapu ne me trabahanti niyu. 
“Tantanuri niyu ka langun ne innangen ku kaniyu. Kene kew panubad-tubad te me manama, wey ke egdawit naa te me ngaran dan.” 
“Keilangan ne katatelu kew egsahakeen tagse leg‑un eyew te pegsuman-suman keddi. 
Kene niyu kalingawi ka Sahakeen te Paan ne Ware Patulin. Nakahiyan kud sikaniyu te kene egkeen te paan ne due patulin te pitu ne aldew te nateil e ne timpu te bulan te Abib, su sika ka bulan ne mig-awe kew diye te Ihiptu. Keilangan ne eg-uyan kew langun te dasag niyu keddiey. 
“Kene niyu degma kalingawi ka Sahakeen te Pegsawit te timpu ne eggaani kew te an-anayan ne behas te me pinamula niyu diye te me kamet niyu. “Ne kene niyu man‑e kalingawi ka Sahakeen te Pegpunpun te katamanan te leg‑un, ke egkalimud niyud e ka langun ne behas te me pinamula niyu. 
Keilangan degma ne katatelu te sabeka ne leg‑un egpakigkita te Magbebaye ne Manama ka me lukes. 
“Ke egpanubad kew keddi te langesa, kene niyu parumeyi te paan ne due patulin. Ne kene niyu pasimahi ka tabe te ngalap ne inggilutu niyu keddi. 
“Uyana niyu diye te baley te Magbebaye ne Manama niyu ka subla ne meupiya ne behas te me pinamula niyu. “Kene kew susubba te ngalap te nati ne iyan ded igweyig ka gatas te iney rin.” 
“Egpeuyan a te panalihan ne eggun‑a kaniyu eyew egtantanuran kew te peggipanew niyu taman te egpekeuma kew diye te inged ne intahahe ku kaniyu. 
Pammineg kew kandin wey tumana niyu ka langun ne ignangen din kaniyu. Kene kew apul kandin su sikeddi ka migpeuyan kandin wey kene din egpasayluwen ka eg-apul kandin. 
Piru ke eg-ayad-ayad kew egpammineg kandin wey egtumanen niyu ka langun ne inlalag ku, egkuntereen ku ka egkuntere kaniyu wey egpakig-ehet a te eg-ehet kaniyu. 
Eggun‑a kaniyu ka panalihan ku wey eg-uyanen kew nikandin diye te tane te me Amurihanen, te me Hitihanen, te me Pirisihanen, te me Kanaanen, te me Hibihanen, te me Hibusihanen, wey egguleen ku sikandan. 
Kene kew panimbuel wey simba te me manama ran, wey kene kew paruma-ruma wey ikul te me himu ran. Keilangan ne egdereetan niyu sikandan wey guhusa niyu ka me sungkaleg ne egsimbeen dan. 
Keilangan ne egsimbeen a nikaniyu se Magbebaye ne Manama niyu, wey egmatubungen ku sikaniyu te egkakeen wey te egkeinum niyu. Igpariyu ku man‑e sikaniyu te me dalu. 
Ware egkaberes ne egkaawaan, wey ware degma kene egpakaanak due te inged niyu. Ne egbehayan ku sikaniyu te malayat ne umul. 
“Egginaalreken ku ka me etew ne egbalabag kaniyu, wey eglibehen ku ka me etew ne egpakigkuntere kaniyu, wey eglibed e sikandan langun ka egpamallahuy. 
Te egpalundaniyan kew e kandan, egginaalreken ku sikandan, wey egdeldelen ku diye te mariyu niyu ka me Hibihanen, ka me Kanaanen, wey ka me Hitihanen. 
Piru kene ku pad sikandan eg-aminen te egdeldel langun te sabeka re ne leg‑un diye te mariyu niyu eyew kene egkaawaan te etew ka sika ne tane wey eyew kene egmasalig ka me mahintalunan. 
Eg-in-inuten ku sikandan te egdeldel due te kaniyu taman te egkabuhal kew e wey sikaniyud e ka kamuney te tane. 
Egteilen ku ka katamanan te tane niyu puun te Malalab ne Dahat taman te Dahat te me Pilistihanen, wey puun te disirtu diye te igsile, peendiye te Weyig ne Iyupratis. Ne egpalupihan ku kaniyu ka me etew ne nangugpe dutu, wey egmandeldelen niyu sikandan diye te mariyu. 
Ne kene kew himu te kasabutan kandan wey te me diyus-diyus dan. 
Kene niyu sikandan peugpaa diye te inged niyu su kema ke egkaalak kew kandan wey egpakasale kew e keddiey. Su emun ke egsimba kew te me diyus-diyus dan, egsahap kew en iya.”