Iksudu.
28.
“Umawa nu ka suled nu ne si Aarun wey ka me anak din ne me lukes ne si Nadab, si Abihu, si Iliyasar, wey si Itamar. Ipasuwey nu naa sikandan te me etew su eggimuwen ku sikandan ne me talagpanubad keddi. 
Ne peyimuwi nu si Aarun te matulus ne me kumbale eyew egmabantug wey egmateles sikandin. 
Nangeni nu ka langun ne mangngateu ne imbehayan ku te katuenan, ne eggimuwan dan si Aarun te me kumbale eyew egkateil sikandin ne talagpanubad keddi. 
Seini ka me kumbale ne igpeyimu kandan: Hagpi te kumeng, kumbale ne egngaranan te ipud, ka igpaampew ne malayat ne kumbale, ka igpariralem ne kumbale ne due dayan-dayan, ka salakey, wey ka libed. Keilangan ne eggimuwan dan si Aarun te sika ne me kumbale wey ka me anak din degma ne me lukes eyew egkeyimu sikandan ne me talagpanubad keddi. 
Keilangan ne egbehayan sikandan te bulawan, me hinabel ne me meilem, malalab wey malugtem, wey mahal ne me hinabel. 
“Ka kumbale ne ipud, keilangan ne eg-ay-ayaran te eggimu wey egpegseleten ka imbula-bula ne bulawan, ka me hinabel ne meilem, malalab, malugtem, wey ka mahal ne hinabel. 
Keilangan ne egtahuan ka ipud te daruwa ne baba eyew egpekegpegket ka tangkaan wey ka peka. 
Ka libed, keilangan ne eg-ay-ayaran te eggimu wey egpegseleten ded te imbula-bula ne bulawan, me hinabel ne meilem, malalab, malugtem, wey te mahal ne hinabel. Keilangan ne igpegket ded seini diye te kumbale. 
Ne kuwa ka te daruwa ne batu ne egngaranan te kurnalina wey ikulit nu dutu ka me ngaran te me anak ni Hakub ne me lukes. 
Ka hen‑em ne ngaran, diye nu isulat te sabeka ne batu wey diye degma te dangeb ka hen‑em ne ngaran. Keilangan ne egmegsinsinundulen nu ka me ngaran dan puun te kinakakayan peendiye te kinaariyan. 
Ikulit nu ka me ngaran te anak ni Hakub diye te daruwa ne batu, iling te eggimuwen te talaggimu te sising ne igkulit ka ngaran diye te batu. Ne himuwi nu naa ka me batu te tahuanan ne bulawan ne igpakepkep de te me batu. 
Ne ipegket nu diye te baba te ipud ka me batu eyew eggimuwen ne limlimuan te me kabuhalan ni Israil. Ke eggendiye si Aarun te tangkaan te Magbebaye ne Manama ne egsaluub te ipud, egkeuyan-uyan din ka me ngaran dan diye te pamanayen din. 
Himuwi nu seini te tahuanan ne bulawan ne igpakepkep te me batu 
wey daruwa ne keddina ne inlubid ne neelin ne bulawan, wey ibitin nu seini diye te impakepkep ne tahuanan ne bulawan.” 
“Ne himu ka te hagpi te kumeng ne ilaan te peggukum te Manama, wey keilangan ne egpaay-ayaran seini te eggimu. Ka inggamit te peggimu te ipud, sikan ded degma ka eggamiten: Ka imbula-bula ne bulawan, ka me hinabel ne meilem, malalab, malugtem, wey ka mahal ne hinabel. 
Keilangan ne ka hagpi te kumeng, senge-rangew ka kalayat wey senge-rangew degma ka kaluag eyew egkakuwaddradu. Keilangan man‑e ne egpeg-akeben seini te eggimu eyew egpekeiling te sening. 
Ne tahui nu seini te hep‑at ne linya te me mahal ne me batu. Ka an-anayan ne linya, tahui nu te malalab-lalab ne batu ne egngaranan te sardiyus, wey te makalawag ne batu ne egngaranan te tupasyu, wey te meilem ne batu ne egngaranan te karbungku. 
Ka ikarangeb ne linya, tahui nu te meilem-ilem ne batu ne egngaranan te ismiralda, wey te sapiru, wey te maangkag ne batu ne egngaranan te diyamanti. 
Ka igkatatelu ne linya, tahui nu te malalab-lalab ne batu ne egngaranan te hasintu, wey te mabatek ne batu ne egngaranan te agata, wey te malugtem ne batu ne egngaranan te amatista. 
Ka igkeep‑at ne linya, tahui nu te makalawag ne batu ne egngaranan te birilu, wey te malalab-lalab ne batu ne egngaranan te kurnalina, wey te meilem ne batu ne egngaranan te haspi. Ne balakesa nu seini langun pakepkepi te bulawan ne iyan egtahuan. 
Ka sapulu wey daruwa (12) ne batu, egkulitan te me ngaran te me anak ni Israil. Ka tagse batu egkulitan te sabeka ne ngaran, iling te eggimuwen te talaggimu te sising ne igkulit ka ngaran diye te batu. 
Himu ka te me keddina ne inlubid ne bulawan eyew igsen-ung te hagpi te kumeng. 
Ne himu ka te daruwa ne sising ne bulawan wey talingei nu ka daruwa ne sidsid te hagpi. 
Itiyuk nu naa ka me keddina ne bulawan diye te daruwa ne sising ne bulawan, 
wey ihiket nu ka pulipusan te me keddina diye te bulawan ne tahuanan te me batu ne impegket diye te baba te ipud eyew egpakabitin-bitin diye te tangkaan ka hagpi te kumeng. 
Ne himu ka man‑e te daruwa ne sising ne bulawan, wey italinga nu diye te lebut te hagpi te kumeng, diye te bengel ne egpakarapit te ipud. 
Himu kad man‑e te daruwa ne sising ne bulawan, wey italinga nu diye te tangkaan te baba te ipud, diye te diralem te baba, wey ampew-ampew te indayan-dayanan ne libed te ipud. 
Ibanggut nu ka hagpi diye te ipud wey peyiketi nu te meilem ne hinabel ka intalinga ne me sising eyew egpakaayad-ayad egpakaampew te libed te ipud ka hagpi wey eyew kene egpekegsuwey. 
“Ne igsaluub ni Aarun ka hagpi ne ilaan te peggukum te Manama ne insulatan te ngaran te me anak ni Israil ke egseled sikandin diye te Matulus ne Sinabeng. Purisu layun egkasuman-suman sikandan diye te tangkaan te Magbebaye ne Manama. 
Ne itahu nu diye te hagpi te kumeng ka Urim wey ka Tumim eyew layun seini egkeuyan-uyan ni Aarun ke eggendiye sikandin te tangkaan te Manama. Puun due, egkeuyan-uyan ni Aarun diye te kumeng din ka peggukum te me kabuhalan ni Israil.” 
“Himu ka te malayat ne kumbale ne eg-akeban te ipud, wey elina nu ne meilem ne hinabel. 
Peyimuwi nu seini te lieg diye te elat eyew egsaluuban te ulu ni Aarun, wey eglinguten te egteyi ka ulang eyew kene egkahisi. 
Peyimuwi nu ka sidsid te kumbale te me palungpung ne meilem, malalab, wey malugtem ne me hinabel, wey peelati nu te me saliyew ne bulawan. Keilangan ne egpekeiling te behas te granada ka palungpung. 
Pegselseleta nu te egtahu diye te sidsid ka me palungpung wey ka me saliyew ne bulawan, wey ipalingut nu te sidsid te kumbale. 
Igsaluub ni Aarun ka kumbale ke egtrabahu e sikandin diye te tangkaan te Magbebaye ne Manama. Egkarineg ka dahing te saliyew te pegseled din te Matulus ne Sinabeng wey te peglihawang din, sikan naa ka kene sikandin egpatey. 
“Ne himu ka te malibusen ne balieg ne neelin ne bulawan wey seini ikulit nu te balieg, ‘Inhalad seini diye te Magbebaye ne Manama.’ Keilangan ne egpekeiling seini te eggimuwen te talaggimu te sising ne igkulit ka ngaran diye te batu. 
Ne ibanggut nu seini diye te tangkaan te salakey wey iyan nu ihiket ka meilem ne hinabel. 
Keilangan ne egpakabitin-bitin seini diye te buked ni Aarun eyew palinneu te pegdawat din te sale te me kabuhalan ni Israil te pegpanubad dan keddi. Ipasaluub nu layun seini ki Aarun eyew egdawaten ku ka igpanubad dan keddiey. 
“Mahal ne hinabel ka eggimuwen ne kumbale ne igpariralem ni Aarun te kumbale din, wey minsan ka salakey rin wey ka libed din. Ne egpaay-ayaran man‑e seini egpateyii te igdayan-dayan. 
“Ka me anak ni Aarun, himuwi nu degma te malayat ne me kumbale, me libed, wey me salakey eyew egmabantug wey egmateles sikandan. 
Ne isaluub nu naa seeye diye te hari nu ne si Aarun wey te me anak din, wey itisi nu sikandan te lana, wey eg-urdinaan. Iteil nu sikandan keddiey eyew egkeyimu sikandan ne me talagpanubad keddi. 
Himuwi nu sikandan te hinabel ne salual ne igpariralem dan eyew igbunbun te me lebut dan. 
Keilangan ne igsaluub dan seini ke egseled sikandan diye te sinabeng wey ke egparani naa sikandan te altar diye te Matulus ne Sinabeng eyew egtrabahu diye. Su emun kene dan seini igsaluub, egpatey sikandan puun te pegsupak dan. Keilangan ne egtumanen ni Aarun wey te me kabuhalan din te ware egtamanan ka seini ne tulumanen.”