Iksudu.
29.
“Seini himuwa nu engki Aarun wey te me anak din eyew egpanubaran nu sikandan ne egkeyimu ne me talagpanubad keddi. Kuwa ka te turu ne nati te baka wey daruwa ne lukesan ne karniru ne ware nabalbalangi. 
Kuwa ka te amana ne meupiya ne harina te trigu wey himu ka te tatelu ne klasi te paan ne ware patulin. Himu ka te paan ne ware mentikei, paan ne insewuhan te mentika te ulibu, wey ka ninipisi ne paan ne eglakulasan te mentika. 
Itahu nu seini langun diye te liyang wey uyana nu kayi te keddi. Uyana nu degma ka turu ne baka wey ka daruwa ne karniru. 
“Dumaa nu si Aarun wey ka me anak din ne me lukes diye te gumawan te balungbalung, wey dihusa nu sikandan diye. 
Ne ipasaluub nu ki Aarun ka egpekeiling te linayun ne malayat se belad, wey ka eg-akeban te ipud, ka ipud, wey ka hagpi te kumeng. Ne ipalilibed nu degma kandin ka libed ne in-ay-ayaran te eggimu. 
Isaluub nu kandin ka salakey wey ibanggut nu ka matulus ne balieg diye te salakey. 
Ne kua nu ka lana ne ig-itis te ulu rin wey itisi nu sikandin. 
Ne isinundul nu degma ka me anak ni Aarun wey kumbalei nu sikandan, 
liberi nu, wey kalui nu. Egkeyimu sikandan ne me talagpanubad tenged te ware egtamanan ne me suhu ku. Sikan naa, urdineyi nu si Aarun wey ka me anak din. 
“Ne uyana nu ka turu ne baka diye te tangkaan te balungbalung, wey iparapli nu ka me belad ni Aarun wey te me anak din diye te ulu te baka. 
Ne gilanga nu ka baka diye te tangkaan te Magbebaye ne Manama, diye te gumawan te balungbalung. 
Ne kuwa ka te langesa te baka wey puliti nu ka me sungey-sungey te altar. Ne iitis nu ka nasame ne langesa diye te pabunsuran te altar. 
Egkataman, ebui nu ka baka wey kua nu ka langun ne tabe diye te getek, wey ka subla ne meupiya ne atey, wey ka daruwa ne iihian wey ka tabe te iihian, wey tutunga nu langun diye te altar. 
Piru tutunga nu diye te lihawangan te kampu ka sapu, ka lundis, wey ka bituka te baka eyew iglinis te me sale dan. 
“Ne kua nu ka sabeka ne karniru, wey ipatel-eb nu ka me belad ni Aarun wey te me anak din diye te ulu te karniru. 
Ne gilanga nu ka karniru, wey kua nu ka langesa wey ilingut nu isawig te altar. 
Panggupala nu ka karniru wey lu‑lui nu ka langun ne diye te getek wey ka me paa, wey limura nu seini lagkes ka ulu, 
wey tutunga nu langun diye te altar. Igpanubad seini ne egtutungen, wey meemut ka lansi diye te Magbebaye ne Manama. 
“Egkataman, kua nud man‑e ka dangeb ne karniru wey ipatel-eb nu ka me belad ni Aarun wey te me anak din diye te ulu te karniru. 
Gilanga nu seini wey kuwa ka te langesa wey puliti nu ka igkakawanan ne talinga ni Aarun wey te me anak din, wey ka me timbebakal te igkakawanan ne belad wey paa ran. Ne ilingut nu isawig te altar ka same te langesa. 
Ne kuwa ka te langesa diye te altar wey isewug nu te lana ne ig-itis te ulu, wey pabesiki nu si Aarun wey ka kumbale din, wey ka me anak din wey ka me kumbale dan. Puun due, igpakahalad nud keddi si Aarun wey ka me anak din, wey ka me kumbale dan. 
“Awaa nu langun ka tabe te karniru, ka malambeg ne ikug, wey ka tabe diye te getek, wey ka subla ne meupiya ne atey, wey ka daruwa ne iihian wey ka tabe te iihian, wey ka kawanan ne bubun. Sika ka karniru ne igpanubad para te peg-urdina. 
Ne kuwa ka te senge-timman ne paan ne ware patulin diye te liyang ne in-uyan nu diye te tangkaan te Magbebaye ne Manama, wey sabeka ne manipis ne paan ne immentikaan, wey paan ne ninipisi. 
Pahen-geni nu seini langun ki Aarun wey te me anak din ne me lukes, wey ipakayew nu kandan eyew igpanubad diye te Manama. 
Egkataman, kua nu seeye diye te kandan wey iuntud nu te karniru ne egtutungen diye te altar wey tutunga nu. Igpanubad seini ne egtutungen, wey meemut ka lansi diye te Magbebaye ne Manama. 
“Ne kua nu ka kumeng ne inggamit nu te pegpanubad ki Aarun, wey kayawa nu eyew igpanubad diye te Manama. Pegkapenga, kua nud ka kumeng su keykew e ka sika ne baad. 
“Iteil nu ka bubun te karniru ne inggamit nu te pegpanubad ki Aarun wey te me anak din, wey ipanubad nu seini wey ka kumeng ne ingkayew nu. 
Keilangan ne igdapig seini ne baad eyew igbehey ki Aarun wey te me anak din tagse egbehey ka me kabuhalan ni Israil te igpanubad dan ne me ayam keureme. Baad dan sika ne egkarawat dan te ware egtamanan puun te me ayam ne igpanubad te me etew para te keupianan diye Magbebaye ne Manama. 
“Ke egpatey e si Aarun, keilangan ne igbehey ka matulus ne me kumbale din diye te me anak din ne igliwan kandin keureme. Igsaluub dan ka me kumbale te timpu ne eg-urdinaan e sikandan wey igtubad e ne me talagpanubad. 
Keilangan ne igsaluub te talagpanubad ne anak ni Aarun ka me kumbale te pitu ne aldew ke igliwan e sikandin ki Aarun te egseled-seled diye te balungbalung eyew egtrabahu diye te Matulus ne Sinabeng. 
“Kua nu ka ngalap te karniru ne inggamit nu te pegpanubad ki Aarun wey te me anak din, wey subbaa nu diye te inteil nud keddi ne baad te balungbalung. 
Ipakeen nu ki Aarun wey te me anak din ka ngalap, wey ka me paan diye te liyang ne intahu diye te gumawan te balungbalung. 
Sikandan de ka egpakakeen te inggamit te peg-urdina wey pegpanubad kandan, wey kene egkaayun ka me lerew re due, su matulus sika ne egkakeen wey iyan miglinis te me sale dan. 
Ke egkasimahan pad ka ngalap wey ka paan su kene dan egkaamin, keilangan ne egtutungen e seini wey kene igpakeen su matulus sika ne egkakeen. 
“Urdineyi nu si Aarun wey ka me anak din te pitu ne aldew ne insuhu ku keykew. 
Tagse aldew panubad ka te turu ne baka eyew igpalangesa te peglinis te me sale dan wey te altar. Itisi nu man‑e ka altar te inteil ne lana eyew egmatulus. 
Kene ka sanggel ka egpanubad te igpalangesa taman te pitu ne aldew eyew egmalinis ka altar wey egmatulus. Egkataman, egmatulus e ne subla ka altar, wey egmatulus degma ka langun ne egpakaragket dutu.” 
“Seini ipanubad nu diye te altar te tagse aldew: Daruwa ne nati te karniru ne senge-tuig e. 
Ipanubad nu te maselem ka sabeka ne karniru, ne ka dangeb, ipanubad nu te maapun. 
Patapiki nu ka sabeka ne karniru te tatelu ne salmun ne harina ne amana ne meupiya wey tatelu ne salmun ne mentika te ingkeles ne ulibu. Lagkesi nu degma te egdasag te inumen ne senge-litru. 
Te pegpanubad nu te maapun te dangeb ne karniru, parumeyi nu red degma te harina wey inumen iling te pegpanubad nu te maselem. Igpanubad seini ne egtutungen, wey meemut ka lansi diye te Magbebaye ne Manama. 
Keilangan ne egpanubad kew te egtutungen tagse aldew, minsan ka me kabuhalan niyu keureme. Diye kew panubad te tangkaan te Manama, diye te gumawan te balungbalung, wey egtemuwen ku sikaniyu diye wey egpakiglalag a keykew. 
Egtemuwen ku ka me kabuhalan ni Israil diye, wey egmatulus seeye tenged te katelesan ku. 
Egmatulusen ku ka balungbalung wey ka altar, wey egmatulusen ku degma si Aarun wey ka me anak din eyew egkeyimu ne me talagpanubad keddi. 
Eglemung a eg-ugpe te me kabuhalan ni Israil wey Manama a nikandan. 
Ne egkanengnengan dan iya ne sikeddiey ka Magbebaye ne Manama ran ne iyan mig-angey kandan puun te Ihiptu eyew egpakalemung a kandan eg-ugpe. Sikeddiey ka Magbebaye ne Manama ran.”