Iksudu.
34.
Ne migkahiyan te Magbebaye ne Manama si Muwisis, “Sesapsap ka te daruwa ne malumpayag ne batu ne iling te an-anayan, su egsulatan ku te insulat ku diye te an-anayan ne me batu ne impese nu. 
Ne taggel ka kaaselem te maselem wey takereg ka te Bubungan ne Sinay, wey lambaha a diye te puntul te bubungan. 
Kene ka duruma te minsan hentew ka egtakereg, wey keilangan ne ware egkakita ne etew te minsan hendei diye te bubungan, wey ware man‑e egpepanabtab te me ayam diye te lenged te bubungan.” 
Seeye naa, migsesapsap e si Muwisis te daruwa ne batu ne iling te an-anayan ne me batu. Te napawe e, migselem-selem sikandin mig-enew wey migtakereg e diye te Bubungan ne Sinay su seeye iya ka insuhu kandin te Magbebaye ne Manama, wey in-uyan din ka daruwa ne malumpayag ne batu. 
Ne migpamaneug ka Manama ne narumaan te makepal ne gapun wey migdangdang ki Muwisis te migsasindeg. Ne ingngaranan din ka ngaran din ne iyan ka Magbebaye ne Manama. 
Ne diye sikandin migbaye te tangkaan ni Muwisis ne migkahi, “Sikeddiey ka Magbebaye, ka Manama ne hiid‑uwen wey hiimenawen, ka mapariralemen wey amana ne dakel se geyinawa ne kene egkabalbalawan, wey amana egtuman te saad. 
Impakita ku ka geyinawa ku ne kene egkabalbalawan diye te libu-libu ne me etew, wey impasaylu ku ka me sale wey me seyyup dan. Piru tenged te me sale dan, eglegparan ku red iya ka me anak dan wey ka me apu dan wey ka egpakasinundul pad ne me kabuhalan dan.” 
Ne sahuhune ne miglangkeb si Muwisis diye te tane wey migsimba. 
Migkahi sikandin, “He Manama, ke malehet iya ne ingkatelesi a nikeykew, eghangyuen ku sikeykew ne duma ka kanami. Makehal iya amana ka me ulu te seini ne keet-etawan, piru pasayluwa key re ubag te me sale wey te me seyyup ney, wey himuwa key red ne keet-etawan nu.” 
Ne migkahiyan te Manama si Muwisis, “Eggimu a te kasabutan kaniyu. Eggimu a te me kein-inuwan diye te tangkaan te langun ne keet-etawan nu, wey ware pad seini nakita te minsan hendei ne inged te intiru ne kalibutan. Ne egpakakita ka langun ne etew ne miglemung kaniyu te amana ne kein-inuwan ne eggimuwen ku diye te kaniyu. 
Tumana niyu ka igsuhu ku kaniyu te seini ne aldew. Egdeldelen ku ka me Amurihanen, ka me Kanaanen, ka me Hitihanen, ka me Pirisihanen, ka me Hibihanen, wey ka me Hibusihanen. 
Tanud-tanud kew ne kene kew egpekeyimu te kasabutan diye te me mahinged ne egkeumaan niyu, su egpakarereet seini kaniyu iling te balatik. 
Guhusa niyu ka me altar dan ne tutunganan te igpanubad, wey panempuha niyu ka insimba ran ne me sungkaleg, wey ka me sungkaleg dan ne larawan ni Asira. 
Kene kew simba te duma ne manama, su ka Magbebaye ne Manama, talikuren ne Manama. 
Kene kew en iya himu te kasabutan te me mahinged, su te timpu ne egsimba sikandan wey egpanubad te me manama ran, egkatintal kew ne egkeen te impanubad dan ke egginggaten kew nikandan ne egtambung. 
Ne igmaasawa niyud ka me anak niyu te me mengebay ran wey sikan e ka egpuunan ne egkeinniyat e ka me anak niyu ne egsimba te me manama ne egsimbeen te me asawa ran. 
“Kene kew himu te me diyus-diyus ne me putew. 
“Tantanuri niyu ka Sahakeen te Paan ne Ware Patulin. Kene niyu kalingawi ka ingkahi ku kaniyu ne egkeen te paan ne ware patulin te pitu ne aldew te bulan te Abib, su sika ka bulan ne mig-awe kew diye te Ihiptu. 
Keddiey ka langun ne panganey ne me anak niyu, wey ka me lukesan ne panganey te me ayam niyu. 
Piru keilangan ne eglekaten niyu te karniru ka panganey ne anak te asnu niyu. Ke kene niyu seini egkalekat, bulengua niyu ka lieg te asnu. Lekata niyu degma ka langun ne panganey ne anak niyu ne me lukes. Ne kene kew parani keddiey ne ware inuyanan ne dasag. 
“Trabahu kew te hen‑em ne aldew piru himeley kew te igkapitu ne aldew minsan pad timpu seini te tingdaru wey ke tinggaani. 
“Tantanuri niyu ka Sahakeen te Pegsawit te timpu ne eggaani kew te an-anayan ne behas te trigu niyu. Tantanuri niyu man‑e ka Sahakeen te Pegpunpun te katamanan te leg‑un. 
“Ka me lukes, keilangan ne katatelu te sabeka ne leg‑un egpakigkita te Magbebaye, ka Manama te Israil. 
Egdeldelen ku ka me etew pariyu kaniyu wey egtimulan ku ka kaluag te tane niyu, wey ware eg-ahew te tane niyu te timpu ne egpakigkita kew te Manama niyu te katatelu te sabeka ne leg‑un. 
“Kene niyu sewuhi te paan ne due patulin ka ayam ne igpanubad niyu keddi, wey kene niyu pasimahi ka igpanubad niyu te Sahakeen te Peglihad te Panalihan. 
“Uyana niyu diye te baley te Magbebaye ne Manama niyu ka subla ne meupiya ne behas te me pinamula niyu ne egkapupu niyu te an-anayan. “Ne kene niyu hilutua ka nati ne iyan igweyig ka gatas te iney rin ded.” 
Ne migkahiyan pad man‑e te Magbebaye ne Manama si Muwisis, “Isulat nu seini se iglalag ku su seini ka eg-ikulen ku te peggimu te kasabutan ta wey te me kabuhalan ni Israil.” 
Ne nekegduma si Muwisis wey ka Manama diye te hep‑at ne pulu (40) ne aldew wey hep‑at ne pulu (40) ne marusilem, wey ware sikandin migkeen wey mig-inum. Ne insulat din diye te malumpayag ne me batu ka igsulat ne kasabutan ne iyan ka Sapulu ne Balaud. 
Nataman, migtupang e si Muwisis ne mig-uyan te daruwa ne malumpayag ne batu ne insulatan te Balaud. Ware sikandin nakanengneng te miglayag bes ka ulaula rin tenged te pegpakiglalag din te Manama. 
Te pegkakita ni Aarun wey te langun ne keet-etawan te miglayag ka ulaula ni Muwisis, nenaaldek e sikandan ne egparani kandin. 
Piru in-umew sikandan ni Muwisis, wey migparani e kandin si Aarun wey ka langun ne igbuyag te me etew, wey migpalalahey e sikandan. 
Nataman, migparani e ki Muwisis ka langun ne keet-etawan wey impangguhud din e kandan ka langun ne suhu te Magbebaye ne Manama ne innangen kandin diye te Bubungan ne Sinay. 
Te nekeimpus e si Muwisis ka migpakiglalag kandan, imbunbunan din e ka ulaula rin. 
Piru ke egseled sikandin te balungbalung eyew egpakiglalag te Magbebaye ne Manama, eg-aween din ka bunbun taman te eglihawang e sikandin. Ke egpakalihawang e sikandin, egnangenan din e ka me kabuhalan ni Israil te langun ne igsuhu te Manama kandan. 
Ne egkakita ran iya ne eglayag ka ulaula rin. Ne egbunbunan din e man‑e ka ulaula rin taman te egseled e man‑e sikandin te balungbalung eyew egpakiglalag te Manama.