Libitiku.
9.
Te igkawalu e ne aldew, in-umew ni Muwisis si Aarun wey ka me anak din, wey ka me igbuyag te Israil. 
Ne migkahiyan din si Aarun, “Kuwa ka te sabeka ne turu ne nati te baka wey lukesan ne karniru ne ware nabalbalangi, wey ipanubad nu te Magbebaye ne Manama. Ka baka, para igpalangesa ne ig-awe te sale, wey ka karniru, para te egtutungen ne igpanubad. 
Ne pakua nu ka me kabuhalan ni Israil te lukesan ne kambing eyew igpalangesa ne ig-awe te sale. Ne pakua nu man‑e sikandan te baka wey nati te karniru ne nekeg-iling ne tigsabeka pad ne leg‑un, wey ware nabalbalangi eyew egtutungen ne igpanubad. 
Pakua nu degma sikandan te turu ne baka wey lukesan ne karniru ne igpanubad para te keupianan diye te Magbebaye ne Manama. Ne pakua nu degma sikandan te egkakeen ne ighalad ne insewuhan te mentika, su kuntee ne aldew egpakita ka Manama kaniyu.” 
Sikan naa, ingkuwa ran ka me ayam ne ingkahi ni Muwisis wey in-uyan dan diye te tangkaan te Balungbalung ne Temuwanan. Ne miglibulung ka langun ne kabuhalan ni Israil diye te tangkaan te Magbebaye. 
Ne migkahi si Muwisis kandan, “Insuhu kew te Magbebaye ne egpanubad eyew igpakita rin kaniyu ka karesen din.” 
Ne migkahiyan ni Muwisis si Aarun, “Parani kad dutu te altar wey ipanubad nud ka igpalangesa eyew ig-awe te sale nu wey ka egtutungen ne igpanubad ne igpalangesa ne iglinis te sale nu. Ne sumale te insuhu te Magbebaye, ipanubad nu degma ka igpanubad te me etew wey palangeseyi nu sikandan eyew iglinis te me sale dan.” 
Purisu migparani e si Aarun te altar wey inggimatayan din ka turu ne nati te baka eyew igpalangesa ne ig-awe te sale din. 
Ne ka langesa te baka, in-uyan te me anak din diye te kandin wey in-eled din ka kemel rin te langesa wey impulit din te me sungey-sungey te altar ne eg-unturan te egtutungen. Ka nasame ne langesa, in-ule din diye te pabunsuranan te altar. 
Piru intutung din diye te altar ka tabe, ka me iihian, wey ka atey ne nandeketan te tabe su sika ka insuhu te Magbebaye ki Muwisis. 
Ne ka sapu wey ka laplap te baka, diye din tutunga te lihawangan te kampu. 
Nataman inggimatayan din e man‑e ka ayam ne igpanubad ne egtutungen. Ne ka langesa te ayam, imbehey e te me anak din diye te kandin, wey insawig din langun seini diye te me kakiliran te altar. 
Imbehey te me anak ni Aarun ka me ngalap ne impanggupal e diye te kandin lagkes ka ulu, wey intutung din e diye te altar. 
Ne inlu‑luan din ka langun ne tahu ne diye te getek wey ka me paa, wey intutung din e diye te altar duma te duma pad ne baad te ayam. 
Pegkapenga dutu, in-uyan e ni Aarun ka igmanubad te keet-etawan. Inggun‑aan din te egkuwa ka kambing ne igpalangesa eyew te peg-awe te sale te me etew. Ne inggimatayan din e seini wey impanubad din e iling te inggimu rin te pegpalangesa rin te ig-awe te sale din. 
Nataman, in-uyan din e man‑e ka igpanubad ne egtutungen, wey in-ikul din ka tulumanen ke egmenuwen seini te pegpanubad. 
Ne in-uyan din degma diye te tangkaan ka egkakeen ne ighalad wey miggamak sikandin dutu wey intimul rin diye te igpanubad ne egtutungen te tagse maselem, wey intutung din e. 
Inggilang degma ni Aarun ka turu ne baka wey ka lukesan ne karniru ne igpanubad para te keupianan te me etew. Ne imbehey kandin te me anak din ka langesa te baka wey inlingut din isawig diye te altar. 
Ka tabe te turu ne baka wey te karniru, lagkes ka mallambu ne me ikug wey ka tabe ne migbukus diye te getek lagkes ka me iihian wey ka tabe ne migbukus te atey, 
in-untud te me anak ni Aarun diye te me kumeng te me ayam. Ne intutung ni Aarun ka me tabe diye te altar. 
Piru ka me kumeng wey ka kawanan ne bubun, ingkayew ni Aarun eyew igdasag diye te Magbebaye ne Manama ne egkayawen su sika iya ka insuhu ki Muwisis. 
Ne ingkayew ni Aarun ka belad din diye te me etew wey impanalanginan din sikandan. Ne migpamaneug sikandin te pegkapenga rin te egpalangesa te ig-awe te sale, pegpanubad te egtutungen wey te pegpanubad para te keupianan. 
Nataman, migseled si Muwisis wey si Aarun diye te Balungbalung ne Temuwanan. Te peglihawang dan e, impanalanginan dan ka me etew. Ne dutu, impakita te Manama ka katelesan din diye te langun ne etew. 
Sahuhune ne miglepew ka hapuy ne migpuun te tangkaan te Magbebaye wey natutung ka impanubad ne egtutungen wey ka me tabe ne diye te altar. Te pegkakita te me etew dutu, migpanguleyi sikandan wey mig-usengul sikandan diye te tane te pegsimba te Manama.