Libitiku.
10.
Nekey naa te due daruwa ne anak ni Aarun ne egngaranan ki Nadab wey Abihu. Migkuwa sikandan te tigsabeka ne tahuanan te insinsu wey intahuan dan seeye te baha wey inhalad dan diye te tangkaan te Magbebaye ne Manama. Ne ka seeye ne baha, kene ne eleg ne eggamiten, su ware ma migsuhu ka Magbebaye kandan. 
Sikan naa ka migpeuyan ka Magbebaye te hapuy wey natutung e sikandan, diye de sikandan nammatey te tangkaan te Magbebaye. 
Ne migkahiyan ni Muwisis si Aarun, “Sika ka igpasabut te Magbebaye te pegkahi rin, ‘Seeye se egparani keddi, keilangan ne eg-ileen a ne matulus, wey keilangan ne egdayanen a diye te tangkaan te keet-etawan ku.’” Piru migpeeneng-eneng de si Aarun. 
Ne in-umew ni Muwisis si Misil wey si Ilsapan ne me anak ni Usiil ne anggam ni Aarun, wey ingkahiyan din, “Awaa niyu ka nammatey ne me suled niyu due te tangkaan te Balungbalung ne Temuwanan wey uyana niyu diye te lihawangan te kampu.” 
Purisu, in-angey ran e ka me minatey wey diye dan de gen-geni te kumbale dan, wey in-uyan dan e diye te lihawangan te kampu sumale te insuhu ni Muwisis kandan. 
Ne migkahiyan ni Muwisis si Aarun wey ka me anak din ne si Iliyasar wey si Itamar, “Kene kew lungku. Tapira niyu ka me bulbul niyu wey kene niyu gisia ka kumbale niyu eyew kene kew egpatey wey eyew kene egkabelu ka Magbebaye ne Manama te langun ne kabuhalan ni Israil. Piru ka me karumaan niyu ne me kabuhalan langun ni Israil, egpakaramag mule te seeye se immannilaban te Manama. 
Ne kene kew pa man‑e lihawang te Balungbalung ne Temuwanan. Su emun ke eglihawang kew iya egpatey kew, su in-urdinaan kew e te Magbebaye ne me talagpanubad pinaahi te peg-itis kaniyu te lana.” Ne intuman dan ka insuhu ni Muwisis kandan. 
Ne migkahiyan te Magbebaye ne Manama si Aarun, 
“Sikeykew wey ka me anak nu ne me lukes, kene egkaayun ne egseled te Balungbalung ne Temuwanan ke nekeinum te binu wey te minsan nekey ne inumen ne egpekewubug. Ke eggimuwen niyu sika, egpatey kew iya. Keilangan ne egtumanen niyu wey te me kabuhalan niyu ka sika ne tulumanen te ware egtamanan. 
Ne keilangan ne eg-ileen niyu ke nekey ka matulus wey ka kene, wey ke nekey ka in-isip ne malinis wey ka in-isip ne malindit. 
Ne panulua niyu ka duma niyu ne kabuhalan ni Israil te langun ne me tulumanen ne impabehey ku kaniyu ki Muwisis.” 
Migkahi si Muwisis ki Aarun wey te daruwa ne anak din ne nasame, ne si Iliyasar wey si Itamar, “Kua niyu ka egkakeen ne ighalad ne nasame te halad ne intutung. Hilutua niyu seini wey kene niyu tahui te patulin wey diye niyu re keena te lenged te altar, su amana ne matulus seini. 
Keena niyu sika diye te lama ne in-isip ne matulus, su baad niyu iya sika puun te halad ne egtutungen ne para te Magbebaye ne Manama. Sika ka insuhu te Magbebaye keddi. 
Piru ka kumeng ne ingkayew wey ka bubun ne impanubad e, egkakeen niyu te taltalaanak minsan hendei ne in-isip ne malinis. Su sika iya ka baad niyu puun te igpanubad para te keupianan te kabuhalan ni Israil. 
Ka impanubad ne bubun, wey kumeng ne ingkayew, keilangan ne eg-uyanen dan duma te me tabe ne igpanubad ne egtutungen eyew igdasag te Magbebaye ne Manama. Ne kaniyu ne baad sika te taltalaanak te ware egtamanan sumale te suhu te Magbebaye.” 
Ne hengkayi te mig-ugsi-ugsi e si Muwisis meyitenged te kambing ne igpanubad eyew te peg-awe te sale, wey te pegkanengnengi rin ne natutung bes e seeye, nabelu e sikandin ki Iliyasar wey ki Itamar. Purisu migkahi sikandin, 
“Mania te ware niyu keena diye te lama te Matulus ne Balungbalung ka impalangesa ne ig-awe te sale? Amana ne matulus sika! Imbehey sika te Magbebaye ne Manama eyew te peg-awe te sale te langun ne kabuhalan ni Israil wey eyew igpalangesa te peglinis te sale te me etew diye te Magbebaye. 
Ne puun su ware neuyan diye te Matulus ne Sinabeng ka langesa, keilangan ne ingkeen niyud e perem ka kambing diye te Matulus ne Sinabeng sumale te insuhu ku kaniyu.” 
Ne migtabak si Aarun ki Muwisis, “Ganna, migpalangesa ka daruwa ne anak ku te ig-awe te sale wey te egtutungen ne igpanubad diye te Magbebaye ne Manama, piru nammatey red sikandan se daruwa. Na, egkabennalan bu red ka Magbebaye ke ingkeen ney ka impalangesa te ig-awe te sale te seini ne aldew?” 
Nabennalan si Muwisis te pegkarineg din te tabak ni Aarun.