Libitiku.
12.
Ne migkahiyan te Magbebaye ne Manama si Muwisis, 
“Kahii nu ka me kabuhalan ni Israil, te emun ke due eg-anak te lukes, eg-isipen ka malitan ne malindit taman te pitu ne aldew iling te malitan ne eglangeseen. 
Ne keilangan ne egtulian ka bate te igkawalu e ne aldew. 
Pegkapenga kayi, egtetahad pad man‑e ka mig-anak te tatelu ne pulu wey tatelu (33) ne aldew human pad eg-isipa sikandin ne malinis. Te kene pad egkapenga ka peglinis kandin, keilangan ne kene pad egsamsam sikandin te minsan nekey ne matulus ne kasangkapan wey kene pad egseled diye te Balungbalung. 
“Piru ke malitan ka ig-anak din, eg-isipen sikandin ne malindit te daruwa ne simana iling te malitan ne eglangeseen. Keilangan ne egtetahad pad man‑e sikandin te hen‑em ne pulu wey hen‑em (66) ne aldew human eg-isipa sikandin ne malinis. 
“Ke egkapenge e ka aldew te peglinis te mig-anak te lukes wey ke malitan naa—eg-uyan sikandin te nati te karniru ne sabeka pad ne leg‑un diye te talagpanubad ne diye te gumawan te Balungbalung ne Temuwanan. Igpanubad din seini ne egtutungen ne eglagkesan te tukmu wey ke selepati naa ne igpalangesa ne ig-awe te sale. 
Ne igmanubad seini te talagpanubad diye te tangkaan te Magbebaye ne Manama wey igpalangesa eyew iglinis te sale din. Ne egmalinis e sikandin puun te langesa rin te peg-anak din. Sika ka tulumanen te peglinis te malitan ne mig-anak. 
“Piru ke ware nati te karniru ne igpakabehey rin, eg-uyan naan de sikandin te daruwa ne tukmu wey ke daruwa naa ne selepati; ka sabeka egtutungen ne igpanubad wey ka sabeka, iglinis te sale. Ne egpalangesaan te talagpanubad ka malitan eyew iglinis te sale din wey eg-isipen e sikandin ne malinis.”