Libitiku.
26.
“‘Kene kew himu te me diyus-diyus ne larawan, batu ne limlimuan, sungkaleg wey ke ingkulit naa ne batu eyew egsimbeen niyu, su sikeddiey ka Magbebaye ne Manama niyu. 
Himeley kew te Aldew te Peggimeley, wey tahura niyu ka ugpaanan ku. Sikeddiey ka Magbebaye ne Manama. 
“‘Ke eg-ikulen niyu ka me balaud wey egtumanen niyu ka me suhu ku, 
egpeuranen ku te timpu te ting-uran eyew egdakel ka eg-uma wey egpakapamehas ka me kayu niyu. 
Te kene kew pad egpekeimpus ka egmandiriek, egkengeyinuhan e ka me behas te paras, wey te kene kew pad egpekeimpus ka egpamupu te behas te paras, egpamula kew e man‑e. Ne dakel amana ka egkakeen niyu wey egmatubung kew te peg-ugpe niyu. 
“‘Ne due keupianan te nasud niyu wey egmanlipereng kew ne warad igkengabantali. Eg-alawen ku ka mabbulut ne mananap diye te tane niyu wey igpariyu ku sikaniyu te gira. 
Ne sikaniyud e nasi ka egpanalukun te me kuntere niyu wey egpangimatayan niyu sikandan te me kampilan niyu. 
Ka lalimma kaniyu, egpakapatey te sabeka ne gatus (100), wey ka sabeka ne gatus (100) kaniyu, egpakapatey te sapulu ne libu (10,000). 
Egpanalanginan ku sikaniyu, egpamatubungen ku wey egpamasuluhen, wey egtumanen ku ka kasabutan ku kaniyu. 
Ne kene niyu egkaamin te egkeen ka nahaani niyu. Egpangaween niyu naan de ka an-anayan ne nahaani niyu wey egliwanan te iyam ne eg-uma. 
Eglemung a kaniyu wey kene ku sikaniyu eg-engkeran. 
Egdumaan ku sikaniyu wey egkeyimu a ne Manama niyu wey egkeyimu kew degma ne keet-etawan ku. 
Sikeddiey ka Magbebaye ne Manama ne migpalihawang kaniyu puun te Ihiptu eyew kene kew e egkeuripen. Impalihawang kud sikaniyu purisu kene kew e kengeyilew.’” 
“‘Piru ke kene kew egpammineg keddi wey ke kene niyu egtumanen ka langun ne me suhu ku, 
wey ke kene niyu eg-ikulen ka me balaud ku, wey egsupaken niyu ka kasabutan ku kaniyu, 
due eggimuwen ku kaniyu—egtigkawen ku sikaniyu egginalati, egpareraluwen, wey egpalusungan te mangune-kune ne iyan egpuunan ne kene kew e egpakameleg-meleg, wey egmaggase kew e. Ne warad e meupiya ne egpangkusan te pegpamula niyu su iyan man e egpangeen te eg-uma ka me kuntere niyu. 
Egbalaharen kud sikaniyu wey egdereetan kew te me kuntere niyu. Ne iyan e egmandu kaniyu seeye se eg-ehet kaniyu wey egpamallahuy kew re due minsan ware egtalukun kaniyu. 
“‘Ne emun ke kene kew pad iya man‑e egpammineg keddi, egdusaan ku sikaniyu egpatamtamani tenged te me sale niyu. 
Egdereetan ku ka impeggasal niyu ne karesen niyu wey kene ku egpeuranen, eyew egpangehal e ne subla ka tane niyu. 
Ware karuan te peglasey-lasey niyu su deisek naan de ka eg-uma te tane niyu wey kenad degma egpamehas ka me kayu niyu. 
“‘Ne emun ke egsupak kew pad iya man‑e wey kene egpammineg keddi, egtimulan ku pad iya man‑e ka legpad ku. 
Egpalusuran ku sikaniyu te mabbulut ne me mahintalunan, wey egpangimatayan dan ka me anak niyu wey ka me ayam niyu, wey egdeisek kew naan de, wey warad eetawen te me dalan niyu. 
“‘Emun ke kene kew pad iya man‑e egpammineg keddi wey egpabulus kew ka egsupak keddi, 
sikeddiey e ka eg-uney-uney egkuntere kaniyu wey egdusaan ku sikaniyu egpatamtamani. 
Egpalusuran ku sikaniyu te me kuntere niyu wey egpalegparan kandan su insupak niyu ma ka kasabutan ta. Minsan pad ke egpangeles kew diye te me siyudad niyu, egmareraluwen ku ma iya man‑e sikaniyu te masumpit, wey egkarakep kew e man‑e te me kuntere niyu. 
Kene ne eleg ka egkakeen niyu, sikan naa ka sabeka naan de ne hilutuanan te paan ka egkeyilutuan te sapulu ne malitan, wey egba-baaren dan naan de ka paan. Egpakakeen kew iya piru kene kew egkabbulung. 
“‘Ne emun ke kene kew pad iya man‑e egpammineg keddi wey ke egsupak kew red iya keddi, 
sikeddiey e ka eg-uney-uney egkuntere kaniyu tenged te langet ku wey egdusaan ku sikaniyu egpatamtamani. 
Egkabitil kew wey egkapehes kew e ne egkeen te me anak niyu. 
Egpangguhusen ku ka me panubaran diye te me bubungan, wey ka me altar ne egtutungan te insinsu. Ne igpangantug ku ka nammatey ne lawa niyu diye te diyus-diyus niyu ne kene eggeheyinawa, wey egbalaharen kud e sikaniyu. 
Egpatamtamanan ku te eglundus ka me siyudad niyu wey warad eetawen te me matulus ne simbaanan niyu, wey kene ku igkeupii ka me meemut ne lansi te igmanubad niyu. 
Egdereetan ku ka inged niyu wey egkengeinu-inu naan de ka me kuntere niyu ne eg-ahew te inged niyu. 
Ne egpegsusuwayen ku sikaniyu diye te duma ne me nasud su egpalusuran ku sikaniyu. Warad eetawen te tane niyu wey egkallundus e ka me siyudad niyu. 
Taheed te naddakep kew wey neuyan te me kuntere niyu wey nalundus pad ka inged niyu, egpekeyimeley pad ka tane niyu, su te timpu ne mig-ugpe kew pad te tane niyu, intrabahu niyu seini minsan te leg‑un ne kene seini egtrabahuwen. Piru kuntee, egpekeyimeley en iya seini. 
“‘Ne seeye se ware nammatey kaniyu diye te inged te me kuntere niyu, egpeumaan ku te mangune-kune ne liyas eyew minsan ke egpakarineg de sikandan te dewun ne egkengeulug, egpamallahuy e sikandan iling te due egpanlupug kandan ne eg-uyan te kampilan, minsan ware iya egpanlupug kandan. 
Egmekegsangkub kew e ka egpallahuy iling te etew ne egpallahuy te kampilan, minsan ke ware eglupug kaniyu, wey kene kew egpakaatu te me kuntere niyu. 
Te katammanan, egpamatey kew diye te duma ne nasud wey iglebeng kew diye te tane te me kuntere niyu. 
Ne ka egkasame kaniyu, egkabaas-baas egpatey diye te tane te me kuntere niyu tenged te me sale niyu wey te sale te kabuybuyahan niyu. 
“‘Tenged te peg-akal niyu wey pegsupak keddi, egkuntereen ku sikaniyu wey igpeuripen te me kuntere niyu. Piru ke egpangguhud kew te me sale niyu wey te me sale te kabuybuyahan niyu, wey kene kew egpakehal te me ulu niyu, wey egdawaten niyu ka igparusa kaniyu, 
egtumanen ku ka kasabutan ku ki Hakub, ki Isaak wey ki Abraham wey egtantanuran ku ka tane niyu. 
Piru egpaaween ku pad sikaniyu due ne tane eyew egpekeyimeley pad seini wey eyew egkaneem-neem niyu pad ka pegparusa ku kaniyu tenged te pegsawile niyu te me suhu ku wey te me tulumanen ku. 
Piru minsan pad ke diye kew te tane te me kuntere niyu, kene ku red sikaniyu eg-engkeran wey ke eg-ang-anggaan naa. Kene ku sikaniyu egguleen, su egkasupak ku ka kasabutan ku kaniyu su sikeddiey ka Magbebaye ne Manama niyu. 
Te iling due ne paahi, egtumanen ku ka kasabutan ku diye te kaap-apuan niyu te pegpalihawang ku kandan puun te Ihiptu eyew egkakita te me nasud ka karesen ku. Inggimu ku seini kandan eyew egkeyimu a ne Manama ran. Sikeddiey ka Magbebaye ne Manama.’” 
Seeye ka langun ne nalein-lein ne me balaud wey me suhu te Magbebaye ne Manama ne imbehey rin te me kabuhalan ni Israil ne impataha rin ki Muwisis diye te Bubungan ne Sinay.