Numiru.
4.
Ne ingkahiyan te Magbebaye ne Manama si Muwisis wey si Aarun, 
“Sinsusa niyu ka tagse pamilya te kabuhalan ni Kuhat ne sakup te me kabuhalan ni Libi. 
Iyan niyu re ilagkes te egsinsus ka me lukes ne puun te tatelu ne pulu (30) se idad peendiye te lalimma ne pulu (50) ne eleg e ne egtrabahu diye te Balungbalung ne Temuwanan. 
Ka eggimuwen te me kabuhalan ni Kuhat, iyan ka pegtanggu te me kasangkapan ne ingkapanubad e ne diye te Balungbalung ne Temuwanan. 
“Ne emun ke eggalin e egkekampu ka me kabuhalan ni Israil, egseled diye te Balungbalung ensi Aarun wey ka me anak din wey egpekasen dan ka kurtina wey igbunbun dan seini te Tahuanan te Kasabutan. 
Ne egbunbunan dan pad iya man‑e seini te meupiya ne klasi te laplap te kambing wey eg-akeban dan pad iya man‑e te manggad ne malugtem. Ne pegkeimpus kayi, igtangen dan e ka me yayunganan kayi. 
“Eghagpiyan dan man‑e te manggad ne malugtem ka lamisa ne egtahuan te paan ne igpanubad diye te Manama. Ne igpanguntud dan ka me palatu, me ubab, me yahung, wey me tahuanan te binu ne ighalad. Ne layun dan degma egtahui ka lamisa te paan ne ighalad diye te Manama. 
Ne pegkeimpus kayi, egbunbunan dan e man‑e seini te manggad ne meilem wey eg-akeban pad man‑e te meupiya ne klasi te laplap te kambing wey igtangen dan e man‑e ka me yayunganan. 
“Ne egbunbunan dan man‑e te manggad ne malugtem ka tahuanan te sulu, lagkes ka me sulu kayi, ka igmangebuk, ka igpanaya te igmuk, wey ka me tahuanan te lana ne igtubil te sulu. 
Egbukusan dan man‑e seini te meupiya ne klasi te laplap te kambing wey ig-untud dan e diye te yayunganan. 
“Ne eghagpiyan dan man‑e te manggad ne malugtem ka altar ne bulawan wey egbunbunan dan seini te meupiya ne klasi te laplap te kambing wey igtangen dan e ka me yayunganan kayi. 
Ne egkuen dan ka langun ne kasangkapan ne inggamit diye Matulus ne Sinabeng wey egbukusan dan seini te manggad ne malugtem, wey egbunbunan dan e man‑e te meupiya ne klasi te laplap te kambing. Pegkeimpus kayi, igpanguntud dan e diye te yayunganan. 
Ne eg-aween dan ka abu puun te burunsi ne altar, wey eghagpiyan dan seini te manggad ne malugtem. 
Ne igpanahu dan kayi ka langun ne kasangkapan te altar ne iyan ka igpanaya te baha, me tinidur, me pala, wey me pelenggana. Ne egbunbunan dan seini te meupiya ne klasi te laplap te kambing, wey igtangen dan e ka me yayunganan kayi. 
Ne emun ke egkabunbunan e ni Aarun wey te me anak din ka langun ne kasangkapan ne ingkapanubad e diye te Manama, wey emun ke andam e ka me etew ne eggipanew, egdani-rani e ka me kabuhalan ni Kuhat eyew egyayung kayi. Piru keilangan ne kene dan egkasamsam ka matulus ne me kasangkapan eyew kene sikandan egpatey. Sika ka me kasangkapan te Balungbalung ne Temuwanan ne eg-uyanen te me kabuhalan ni Kuhat. 
“Ne si Iliyasar ne anak ni Aarun iyan egtanggu te lana ne igtubil te sulu, te meemut ne insinsu, te inaldew-aldew ne me halad ne egkakeen ne egpuun te egketuen ne pinamula, wey te lana ne ig-itis te ulu. Sikandin ka egtanggu te intiru ne Matulus ne Balungbalung ne In-alad wey te langun ne kasangkapan kayi.” 
Ne ingkahiyan te Magbebaye ne Manama si Muwisis wey si Aarun, 
“Kene niyu balahara ne egkaawe ka me kabuhalan ni Kuhat puun te me kabuhalan ni Libi. 
Ne seini ka keilangan ne eggimuwen niyu eyew kene sikandan egpatey ke egdani-rani te me kasangkapan ne ingkapanubad e diye te Manama: emun ke egseled te Balungbalung ne Temuwanan ka me kabuhalan ni Kuhat, keilangan ne egdumaan ni Aarun wey te me anak din wey egpanuluen dan ka tagse sabeka ke nekey ka eleg ne eggimuwen wey ke nekey ka eg-uyanen dan. 
Piru keilangan ne kene egseled ka me kabuhalan ni Kuhat eyew egtengteng te me kasangkapan ne ingkapanubad e diye te Manama minsan egdagdahew re eyew kene sikandan egpatey.” 
Ne ingkahiyan e man‑e te Magbebaye ne Manama si Muwisis, 
“Seela nu degma ka tagse pamilya te kabuhalan ni Girsun. 
Iyan nu re ilagkes te egseel ka me lukes ne puun te tatelu ne pulu (30) se idad peendiye te lalimma ne pulu (50) ne eleg e ne egtrabahu diye te Balungbalung ne Temuwanan. 
Ne seini ka eggimuwen te me kabuhalan ni Girsun: 
sikandan ka eg-uyan te kurtina te Matulus ne balungbalung ne In-alad, wey te Balungbalung ne Temuwanan wey te me tel-eb kayi, te me tel-eb diye te dibabew ne inggimu puun te meupiya ne klasi te laplap te kambing, te me kurtina te gumawan, 
te me kurtina ne nakalingut te lama te Matulus ne Balungbalung ne In-alad, te altar, te kurtina te gumawan te lama, wey te me lubid. Sikandan man‑e ka eggimu te langun ne keilangan ne eggimuwen ne egkahamitan te seini ne me kasangkapan. 
Ne si Aarun wey ka me anak din ka egpangulu te me kabuhalan ni Girsun te pegpanguyan wey te peggimu te duma pad ne eggimuwen, wey sikeykew Muwisis ka egbehey kandan te langun ne eggimuwen dan. 
Sika ka eggimuwen te me kabuhalan ni Girsun diye te Balungbalung ne Temuwanan. Ne iyan egpangulu kandan si Itamar, ka anak te talagpanubad ne si Aarun.” 
“Ne seela nu degma ka tagse pamilya te me kabuhalan ni Mirari. 
Iyan nu re ilagkes te egseel ka me lukes ne puun te tatelu ne pulu (30) se idad peendiye te lalimma ne pulu (50) ne eleg e ne egtrabahu diye te Balungbalung ne Temuwanan. 
Ne seini ka eggimuwen dan te intiru ne pegtrabahu ran diye te Balungbalung ne Temuwanan: sikandan ka egpaniang te me tukeg te Balungbalung, me sungkaleg, me balabag, me pabunsuran, 
me sungkaleg ne nakalingut te lama, me igpakpak te tane ne eggiketan te lubid te balungbalung, me lubid, wey te minsan nekey ne due kalabetan kayi. Panulua niyu ki Aarun ka tagse sabeka kandan ke nekey ka eg-uyanen dan. 
Sika ka eggimuwen te me kabuhalan ni Mirari diye te Balungbalung ne Temuwanan. Ne iyan egpangulu kandan si Itamar, ka dangeb ne anak te talagpanubad ne si Aarun.” 
Inseel ni Muwisis wey ni Aarun wey te me pangulu te me kabuhalan ni Israil ka tagse pamilya te me kabuhalan ni Kuhat, ni Girsun, wey ni Mirari. Inlista ran ka langun ne lukes ne puun te tatelu ne pulu (30) se idad peendiye te lalimma ne pulu (50) ne eleg e ne egtrabahu diye te Balungbalung ne Temuwanan: 2,750 ka kabuhalan ni Kuhat; 2,630 ka kabuhalan ni Girsun; 3,200 ka kabuhalan ni Mirari. Migginguma te 8,580 ka langun ne lukes. 
Ne inseel ka tagse sabeka kandan wey impamehayan te himu wey impanulu ke nekey ka eleg ne eg-uyanen sumale te insuhu te Magbebaye ne Manama ki Muwisis.