Numiru.
5.
Ne ingkahiyan te Magbebaye ne Manama si Muwisis, 
“Suhua nu ka me kabuhalan ni Israil ne keilangan ne igpalihawang dan puun te kampu ka me ibungen, ka egmanweweyig se lawa, wey ka nallinditan tenged te nakasamsam te minatey. 
Lukes ma wey se malitan, keilangan ne igpalihawang eyew kene dan egkalinditan ka kampu ne in-ugpaan ku duma kaniyu.” 
Intuman seini te me kabuhalan ni Israil; impalihawang dan puun te kampu ka sika ne me etew sumale te insuhu te Magbebaye ki Muwisis. 
Ne ingkahiyan e man‑e te Magbebaye si Muwisis, 
“Kahii nu ka me kabuhalan ni Israil: ‘Emun ke due me etew—me lukes wey ke me malitan naa ne mig-akal te Magbebaye ne Manama pinaahi te peggimu te seyyup diye te duma ne etew, nakasale sikandan. 
Ne keilangan ne igpangguhud din ka sale din, wey egbayad sikandin te kumplitu wey egpasublaan din seini te daruwa ne pulu (20) ne pursintu. Ne igbehey rin seini diye te etew ne neyimuwan din te sale. 
Piru ke namatey e ka etew wey ware karumaan kayi ne egkabehayan te igbayad, diye naan de seini igbehey te Magbebaye eyew egkahamit te me talagpanubad. Ka sika ne bayad, igtimul te lukesan ne karniru ne igpalangesa rin eyew te peg-awe te sale din. 
Ne ka langun ne eg-uyanen te me kabuhalan ni Israil ne dasag wey me kasangkapan ne igpanubad diye te Manama, egkakandan e seini te talagpanubad. 
Ka langun ne igbehey diye te talagpanubad, egkakandin e seini.’” 
Ne ingkahiyan e man‑e te Magbebaye ne Manama si Muwisis, 
“Kahii nu ka me kabuhalan ni Israil: Emun ke egpakasale ka malitan te iglukes din, 
tenged su nalibuhan sikandin, wey ware seini nataheyi te iglukes din, wey ware iya egpakapamalehet kayi tenged su ware sikandin nasapeni ne nalibuhan, 
piru egpangalikud e kandin ka iglukes din minsan ware sikandin nakataha ne nalibuhan ka asawa rin, wey ke egpangalikud naa sikandin minsan ware mareet ne neyimu te asawa rin, 
keilangan ne eg-uyanen din ka asawa rin diye te talagpanubad. Ne eg-uyan sikandin te senge-kilu ne harina ne sibada ne ighalad para te asawa rin. Ne kene din seini eg-amutan te mentika wey ke meemut naa ne insinsu su egkakeen ma seini ne halad te pegpangalikud din te asawa rin. Halad seini ne egkakeen te pegnengneng te neyimu ne sale. 
“Ne egdumeen e te talagpanubad ka malitan, wey igpasasindeg din e diye te tangkaan te Magbebaye. 
Ne egkuwa ka talagpanubad te matulus ne weyig wey igtahu din te banga, wey eg-amutan din seini te alinepung ne egpuun te seeg te Matulus ne Balungbalung ne In-alad. 
Ne egpasasindehen te talagpanubad ka malitan diye te tangkaan te Magbebaye wey eggusengen din ka bulbul te malitan, wey egpahen-genan din te malitan ka halad ne egkakeen ne egpuun te egketuen ne pinamula. Ne eggen-genan te talagpanubad ka banga ne intahuan te weyig ne mapeit ne eg-uyan te dilus. 
Ne egpeuyunen te talagpanubad ka malitan te seini ne pahunlibet, ‘Emun ke ware ka nalibuhi, kene ka eg-utengan te dilus ne eg-uyanen te seini se mapeit ne weyig. 
Piru ke nalibuhan ka, 
eggimuwen ka perem te Magbebaye ne panunggilingan te me etew pinaahi te dilus din keykew ne iyan se kene kad egpakaanak. 
Egseled perem te bituka nu seini se weyig ne eg-uyan te dilus, wey tenged kayi, eglebag e ka getek nu wey egkipes e ka aanakan nu.’ Ne egtabak ka malitan, ‘Malehet iya, malehet iya sika.’ 
“Ne igsulat te talagpanubad ka seini ne dilus diye te laplap te ayam, wey eglu‑luan din seini te mapeit ne weyig su eyew egpekeendiyad te weyig ka me lalag te pegdilus. 
Ne egpeinumen din ka malitan te mapeit ne weyig ne eg-uyan te dilus. Ne emun ke nalibuhan iya ka malitan, eg-antus sikandin te masakit ne egkeuyan te mapeit ne weyig. 
Ne egkuen te talagpanubad puun te malitan ka egkakeen ne halad tenged te pegpangalikud, wey igkayew rin seini diye te tangkaan te Magbebaye wey eg-uyanen diye te altar. 
Ne egkuwa ka talagpanubad te senge-hamak te halad ne egkakeen ne egpuun te egketuen ne pinamula isip eglimlimuan ne halad, wey egtutungen din seini diye te altar. Ne pegkeimpus due, egpeinumen din ka malitan te mapeit ne weyig. 
Ke malehet ne nalibuhan iya ka malitan, eg-antus sikandin te subla ne masakit tenged te weyig ne eg-uyan te dilus ne in-inum din. Ne eglebag e ka getek din, wey egkipes e ka aanakan din wey egkeyimu e sikandin ne panunggilingan te me etew tenged te pegdilus kandin te Manama. 
Piru ke ware sikandin nakasale, kene sikandin egkamenu wey egpakaanak ded sikandin. 
“Seini ka balaud meyitenged te pegpangalikud. Emun ke inlinditan te malitan ka pegkeetew rin pinaahi te pegpalibug-libug, 
wey egpangalikud ka lukes te asawa rin: egpasasindehen te talagpanubad ka malitan diye te tangkaan te Magbebaye, eyew igpeyimu kandin ka sika ne me balaud. 
Ne kene eg-isipen ka lukes ne due sale. Piru eg-antus ka malitan ke nakasale sikandin.”