Numiru.
26.
Pegkeimpus te karereetan, ingkahiyan te Magbebaye ne Manama si Muwisis wey si Iliyasar ne anak te talagpanubad ne si Aarun, 
“Sinsusa niyu ka tagse pamilya te langun ne kabuhalan ni Israil, ka egpuun te daruwa ne pulu (20) se idad wey ke buyag-buyag e ne egkaayun e ne eg-apil te gira.” 
Purisu inlalahan e ni Muwisis wey ni Iliyasar ne talagpanubad ka me kabuhalan ni Israil diye te kanapnapuan te Muwab, te ilis te Weyig ne Hurdan ne egkatalipag te Hiriku. Migkahi sikandan, 
“Sinsusa niyu ka me lukes ne puun te daruwa ne pulu (20) se idad wey me buyag-buyag e.” Suhu seini te Magbebaye ne Manama ki Muwisis. Ne seini ka listaan te me kabuhalan ni Israil ne nangawe te Ihiptu: 
Ka me kabuhalan ni Rubin ne kinakakayan ne anak ni Hakub, iyan ka me pamilya enni Hanuk, ni Palu, 
ni Hisrun, wey ni Karmi. 
Ne 43,730 ka langun ne kabuhalan ni Rubin. 
Ne ka anak ni Palu, iyan si Iliyab. 
Ne ka me anak ni Iliyab, iyan ensi Nimwil, si Datan, wey si Abiram. Si Datan wey Abiram, iyan ka me pangulu te me kabuhalan ni Israil ne migpakigsabeka ki Kura ne migsukul te Magbebaye, ki Muwisis, wey ki Aarun. 
Ne migbekabeka ka tane wey impangameluk sikandan duma ki Kura. Naamin nammatey pinaahi te hapuy ka 250 ne mig-ikul kandan. Ne neyimu seeye ne paney-paney te me kabuhalan ni Israil. 
Piru ware mule migpatey ka me anak ni Kura. 
Ne ka me kabuhalan ni Simyun, iyan ka me pamilya enni Nimwil, ni Hamin, ni Hakin, 
ni Sira, wey ni Saul. 
Ne 22,200 ka langun ne kabuhalan ni Simyun. 
Ne ka me kabuhalan ni Gad, iyan ka me pamilya enni Sipun, ni Hagi, ni Suni, 
ni Usni, ni Iri, 
ni Arud, wey ni Arili. 
Ne 40,500 ka langun ne kabuhalan ni Gad. 
Si Huda, due daruwa ne anak ne si Unan wey si Ir ne migpatey diye te tane te Kanaan. 
Piru duen ded me anak din ne neuyag ne iyan ka pamilya enni Sila, ni Piris, wey ni Sira. 
Ne ka me kabuhalan ni Piris, iyan ka me pamilya ne egpuun engki Hisrun wey ki Hamul. 
Ne 76,500 ka langun ne kabuhalan ni Huda. 
Ne ka me kabuhalan ni Isakar, iyan ka me pamilya enni Tula, ni Pua, 
ni Hasub, wey ni Simrun. 
Ne 64,300 ka langun ne kabuhalan ni Isakar. 
Ne ka me kabuhalan ni Sabulun, iyan ka me pamilya enni Sirid, ni Ilun, wey ni Haliil. 
Ne 60,500 ka langun ne kabuhalan ni Sabulun. 
Ne ka me anak ni Husi, iyan ensi Manasis wey si Ipraim. 
Ne ka me kabuhalan ni Manasis, iyan ka me pamilya ni Makir wey te anak din ne si Gilyad. 
Ne ka me kabuhalan ni Gilyad, iyan ka me pamilya enni Lisir, ni Hilik, 
ni Asril, ni Sikim, 
ni Simida, wey ni Hipir. 
Ne sabeka te me anak ni Hipir ne egngaranan ki Silupihad, ware anak ne me lukes, piru due me anak ne malitan ne iyan ensi Mala, si Nua, si Hugla, si Maaka, wey si Tirsa. 
Ne 52,700 ka langun ne kabuhalan ni Manasis. 
Ne ka me kabuhalan ni Ipraim, iyan ka me pamilya enni Sutala, ni Bikir, wey ni Tahan. 
Ne ka me kabuhalan ni Sutala, iyan ka me pamilya ni Hiran. 
Ne 32,500 ka langun ne kabuhalan ni Ipraim. Sika ka me pamilya enni Manasis wey ni Ipraim ne me anak ni Husi. 
Ne ka me kabuhalan ni Binhamin, iyan ka me pamilya enni Bila, ni Asbil, ni Ahiram, 
ni Sipupam, wey ni Hupam. 
Ne ka me kabuhalan ni Bila, iyan ka me pamilya enni Ard wey ni Naaman. 
Ne 45,600 ka langun ne kabuhalan ni Binhamin. 
Ne ka me kabuhalan ni Dan, iyan ka me pamilya ni Suham. 
Ne 64,400 ka langun ne kabuhalan ni Dan. 
Ne ka me kabuhalan ni Asir, iyan ka me pamilya enni Himna, ni Isbi, wey ni Biriyas. 
Ne ka me kabuhalan ni Biriyas, iyan ka me pamilya enni Hibir, wey ni Malkil. 
Ne due man e anak ni Asir ne malitan ne egngaranan ki Sira. 
Ne 53,400 ka langun ne kabuhalan ni Asir. 
Ne ka me kabuhalan ni Naptali, iyan ka me pamilya enni Hasil, ni Guni, 
ni Hisir, wey ni Silim. 
Ne 45,400 ka langun ne kabuhalan ni Naptali. 
Ne 601,730 ka langun ne lukes ne me kabuhalan ni Israil ne nalista. 
Ne ingkahiyan te Magbebaye ne Manama si Muwisis, 
“Pama-baara nu ka tane diye te me tribu isip karatuan ne egkapanunud dan sumale te kasuluhan te me ngaran ne nalista. 
Maluaha nu ka baad te tribu ne masulug se sakup, wey malig-eta nu re ka baad te tribu ne deisek de se sakup. Pamaari nu ka tagse tribu sumale te kasuluhan te me sakup. 
Piru keilangan ne pinaahi te pegpintut-pintut ka pegbaad-baad te tane. Ne egpakarawat ka tagse tribu te tane ne egkeilanganen dan, sumale te kasuluhan te nalista ne me ngaran. 
Egba-baaren pinaahi te pegpintut-pintut ka tane isip karatuan ne egkapanunud te me tribu ne masulug se sakup wey te me tribu ne deisek de se sakup.” 
Ne ka me kabuhalan ni Libi iyan ka me pamilya ni Girsun, ni Kuhat, wey ni Mirari. 
Ne ka duma pad man‑e ne me kabuhalan ni Libi iyan ka me pamilya ni Libni, ni Hibrun, ni Mali, ni Musi, wey ni Kura. Ne si Kuhat ka amey ni Amram. 
Ne ka asawa ni Amram, iyan si Husibid ne kabuhalan ded man‑e ni Libi. Diye neetew te Ihiptu si Husibid. Ne me anak en iya ni Amram ki Husibid ensi Aarun, si Muwisis, wey si Miryam. 
Ne si Aarun ka amey enni Nadab, ni Abihu, ni Iliyasar, wey ni Itamar. 
Piru migpatey ensi Nadab wey si Abihu diye te tangkaan te Magbebaye ne Manama tenged te peggamit dan te kene ne eleg ne hapuy te timpu ne migpanubad sikandan. 
Ne daruwa ne pulu wey tatelu ne libu (23,000) ka langun ne kabuhalan ni Libi ne senge-bulan pad se idad wey seeye se buyag-buyag e. Ware sikandan ilagkes te egpanlista su kene ma sikandan egkabaaran te tane isip karatuan ne egkapanunud te me kabuhalan ni Israil. 
Sika langun ka me kabuhalan ni Israil ne impanlista ni Muwisis wey ni Iliyasar ne talagpanubad, diye te kanapnapuan te Muwab, te ilis te Weyig ne Hurdan ne egkatalipag te Hiriku. 
Piru warad nasame te langun ne nalagkes te an-anayan ne pegpanlista ni Muwisis wey ni Aarun diye te disirtu, diye te Sinay, 
su migkahi ma ka Magbebaye ne Manama meyitenged kandan te, “Egpatey iya sikandan diye te disirtu, wey ware minsan sabeka kandan ne egkaluwas,” purisu ware iya nasame kandan angin e mule ki Kalib ne anak ni Hipuni wey ki Huswi ne anak ni Nun.