Numiru.
27.
Ne si Silupihad due anak ne me malitan ne iyan ensi Mala, si Nua, si Hugla, si Milka, wey si Tirsa. Anak ni Hipir si Silupihad wey apu ni Gilyad. Ne si Gilyad ka anak ni Makir wey apu ni Manasis. Ne si Manasis ka anak ni Husi. 
Ne nangendiye te gumawan te Balungbalung ne Temuwanan ka me anak ni Silupihad wey migmanasindeg sikandan diye te tangkaan ni Muwisis, ni Iliyasar ne talagpanubad, te me pangulu, wey te langun ne kabuhalan ni Israil. Ne migkahi sikandan, 
“Namatey ka amey ney diye te disirtu, piru kene sikandin ne duma te seeye se migpakigsabeka ki Kura ne migsukul te Magbebaye. Namatey sikandin tenged te sale din mismu, wey ware anak din ne lukes. 
Ne eg-aween naa ka ngaran te amey ney puun te kabuhalan din tenged de te ware anak din ne me lukes? Baari key te egkapanunud te amey ney iling te baad te me karumaan ney.” 
Ne ingguhud ni Muwisis diye te Magbebaye ka ingkahi te me malitan. 
Ne ingkahiyan te Magbebaye si Muwisis, 
“Eleg ka ingkahi te me malitan ne me anak ni Silupihad. Keilangan ne egbaaran nu sikandan te tane iling te me karumaan dan. Ibehey nu kandan ka tane ne baad perem te amey ran. 
Ne kahii nu ka me kabuhalan ni Israil te emun ke egpatey ka sabeka ne etew ne ware anak ne lukes, keilangan ne igbehey ka karatuan ne egkapanunud din diye te me anak din ne malitan. 
Ne emun ke ware man‑e me anak din ne malitan, igbehey ka egkapanunud din diye te me suled din ne lukes. 
Ne emun ke ware man‑e me suled din ne lukes, igbehey ka egkapanunud din diye te me lukes ne suled te amey rin. 
Ne emun ke ware man‑e me lukes ne suled te amey rin, igbehey ka egkapanunud din diye te amana rin pad iya ne karumaan wey ka sika ne karumaan din, iyan e egpakakamuney kayi. Keilangan ne egtumanen sika te me kabuhalan ni Israil isip balaud wey suhu, sumale te insuhu ku keykew Muwisis.” 
Sabeka ne aldew, ingkahiyan e man‑e te Magbebaye si Muwisis, “Takereg ka diye te Bubungan ne Abarim wey pamantawa nu ka tane ne imbehey ku te me kabuhalan ni Israil. 
Ke egkakita nud e seini, egpatey kad e degma iling te suled nu ne si Aarun, 
su migsupak kew ma se daruwa te me suhu ku diye te disirtu, diye te Sin. Te timpu ne migmanagsahukul keddi ka me kabuhalan ni Israil diye te Miriba, ware niyu ipeila kandan ka pegkamatulus ku.” Ka Miriba iyan seeye ka weyig ne diye te disirtu, diye te Sin. 
Ne mig-ampu si Muwisis diye te Magbebaye ne migkahi, 
“He Magbebaye, ka Manama ne migbehey te umul te langun ne etew, alam ka te etew ne egpangulu te me kabuhalan ni Israil, 
wey iyan eggun‑a kandan minsan hendei sikandan egpabaye wey egpangulu kandan te gira eyew ka keet-etawan nu Magbebaye, kene egpekeiling te me karniru ne ware talagtameng.” 
Ne ingkahiyan te Magbebaye si Muwisis, “Ipeumew nu ka etew ne napenu te Panisingan ne iyan si Huswi ne anak ni Nun, wey itel-eb nu kandin ka belad nu. 
Pasasindeha nu sikandin diye te tangkaan ni Iliyasar ne talagpanubad, wey diye te tangkaan te me kabuhalan ni Israil, wey ipataha nu kandan ne in-alam ku si Huswi ne egsubal keykew. 
Behayi nu sikandin te duma ne katenged nu eyew egtuman kandin ka langun ne kabuhalan ni Israil. 
Ne pasasindeha nu sikandin diye te tangkaan ni Iliyasar ne iyan egnengneng ke nekey ka igkeupii ku pinaahi te Urim wey Tumim. Te seini ne paahi, egkabulihan ni Iliyasar si Huswi wey ka langun ne kabuhalan ni Israil ke nekey ka eleg ne eggimuwen dan.” 
Ne intuman ni Muwisis ka insuhu kandin te Magbebaye. Impeumew rin si Huswi wey impasasindeg din diye te tangkaan ni Iliyasar ne talagpanubad wey diye te tangkaan te langun ne kabuhalan ni Israil. 
Ne intel-eb din ka belad din ki Huswi wey impataha rin ka langun ne si Huswi ka egsubal kandin sumale te insuhu te Magbebaye.