Numiru.
31.
Ne ingkahiyan te Magbebaye ne Manama si Muwisis, 
“Sulii nu ka me matig-Midiyan te inggimu ran diye te me kabuhalan ni Israil. Ne pegkeimpus due, egpatey kad.” 
Purisu ingguhuran e ni Muwisis ka me kabuhalan ni Israil te migkahi, “Pangandam kew te gira; eglusuran ta ka me matig-Midiyan, su igpaneem-neem te Magbebaye kandan ka pegsuli din. 
Keilangan ne egpeuyan te tigsenge-libu (1,000) ne etew ka tagse tribu te Israil eyew egpakiggira.” 
Purisu mig-alam sikandan te tigsenge-libu (1,000) ne etew puun te tagse tribu te Israil. Ne sapulu wey daruwa ne libu (12,000) ka langun wey nasangkap te me panganiban te gira. 
Ne impeendiye sikandan ni Muwisis te giraanan wey impanguluwan ni Pinihas ne anak te talagpanubad ne si Iliyasar. Ne migpanguyan si Pinihas te me kasangkapan ne egpuun te Balungbalung ne Temuwanan lagkes ka trumpita ne egparahingen te pegpepangandam. 
Inlusuran dan ka me matig-Midiyan sumale te insuhu te Magbebaye ki Muwisis, wey impangimatayan dan ka langun ne lukes. 
Inlagkes dan te egpangimatey ka lalimma ne Hari te Midiyan ne iyan ensi Ibi, si Rikim, si Sur, si Hur, wey si Riba. Inggimatayan dan degma pinaahi te kampilan si Balaam ne anak ni Biyur. 
Ne impandakep te me kabuhalan ni Israil ka langun ne malitan, lagkes ka me bate, wey impanguyan dan ka me kamil, ka me karniru, wey ka langun ne karatuan. 
Ne impanilaban dan ka langun ne siyudad lagkes ka me kampu te me matig-Midiyan, 
wey impanguyan dan ka langun ne naahew ran, lagkes ka me etew wey ka me ayam. 
Ne impanguyan dan seini langun diye ki Muwisis, ki Iliyasar ne talagpanubad, wey te langun ne kabuhalan ni Israil ne diye te me kampu diye te kanapnapuan te Muwab, te ilis te Weyig ne Hurdan ne egkatalipag te Hiriku. 
Ne insinug-ung sikandan enni Muwisis, ni Iliyasar, wey te me igbuyag te me kabuhalan ni Israil diye te lihawangan te kampu. 
Ne nabelu si Muwisis te me kumandir te linibu wey ginatus ne me sundalu ne migpuun pad te gira. 
Ne mig-inse si Muwisis kandan, “Mania te ware niyu pangimatayi ka me malitan? 
Sikandan ka mig-ikul te me tambag ni Balaam wey sikandan ka egpuunan ne mig-inniyug te Magbebaye ka me kabuhalan ni Israil diye te Piyur. Ne tenged due, impeuyanan te Magbebaye te karereetan ka me kabuhalan ni Israil. 
Purisu pangimatayi niyu ka langun ne bate ne lukes wey ka langun ne malitan ne neyilabetan e te lukes. 
Piru kene niyu re ilagkes ka me mengebay pad ne ware pad neyilabeti te lukes su kaniyud e sikandan. 
Ne sikaniyu langun se nakapatey wey ke nakasamsam naa te minatey, kene kew pa seled te kampu taman te pitu ne aldew. Te igkatatelu wey te igkapitu ne aldew, keilangan ne eglinisan niyu ka pegkeetew niyu lagkes ka nandakep niyu. 
Ne linisi niyu degma ka langun ne kumbale niyu wey ka langun ne kasangkapan niyu ne inggimu puun te bulbul wey ke laplap naa te kambing wey ke kayu naa.” 
Ne ingkahiyan ni Iliyasar ne talagpanubad ka me sundalu ne egpuun te gira, “Seini ka tulumanen ne imbehey te Magbebaye ki Muwisis: 
Ka minsan nekey ne kene egkatutung iling te bulawan, pelata, burunsi, putew, lata, wey timehe, 
keilangan ne igtuug niyu, eyew egkeyimu ne malinis, piru keilangan pad iya man‑e seini ne eglu‑luan te weyig te peglinis eyew egkeyimu ne matulus. Piru panlu‑lui niyu re mule te weyig ka minsan nekey ne kene egkaayun ne igtuug. 
Ne pami‑pii niyu ka me kumbale niyu te igkapitu ne aldew eyew egmalinis kew e, wey egkaayun kew e man‑e ne egseled te kampu.” 
Ne ingkahiyan te Magbebaye ne Manama si Muwisis, 
“Seela nu ka langun ne naahew lagkes ka me ayam wey ka naddakep ne etew. Pabulig ka ki Iliyasar ne talagpanubad wey te me pangulu te me pamilya. 
Baara niyu seini te daruwa ne baad: ka katenge, para te me sundalu ne me kabuhalan ni Israil ne migpakiggira, wey ka katenge, para te duma ne keet-etawan ne me kabuhalan ni Israil. 
Ne dapihi nu puun te baad te me sundalu, ka Magbebaye; sabeka te tagse lalimma ne gatus (500) te me etew, te me baka, te me asnu, te me karniru, wey te me kambing. 
Kua nu seini wey ibehey nu ki Iliyasar ne talagpanubad isip baad te Magbebaye. 
Ne puun te baad te me kabuhalan ni Israil, dapig ka te tigsabeka puun te tagse lalimma ne pulu (50) te me etew, te me baka, te me asnu, te me karniru, wey te me kambing. Ne ibehey nu naa seini diye te me kabuhalan ni Libi ne iyan impiyalan te Balungbalung te Magbebaye.” 
Ne intuman ni Muwisis wey ni Iliyasar ne talagpanubad ka insuhu te Magbebaye ki Muwisis. 
Ne seini ka kasuluhan te naahew te me sundalu: 675,000 ne buuk ka me karniru wey kambing, 
72,000 ne buuk ka me baka, 
61,000 ne buuk ka me asnu, wey 
32,000 ne buuk ka me malitan ne ware pad neyilabeti te lukes. 
Ne seini ka kasuluhan te katenge ne baad te me sundalu ne migpakiggira: 337,500 ne buuk ka me karniru wey kambing, 
675 ne buuk ka baad te Magbebaye, 
36,000 ne buuk ka me baka. Ne pitu ne pulu wey daruwa (72) ne buuk ka baad te Magbebaye, 
30,500 ne buuk ka me asnu. Ne hen‑em ne pulu wey sabeka (61) ne buuk ka baad te Magbebaye, 
16,000 ne buuk ka me malitan ne naddakep. Ne tatelu ne pulu wey daruwa (32) ne buuk ka baad te Magbebaye. 
Ne imbehey ni Muwisis ki Iliyasar ne talagpanubad ka baad ne para te Magbebaye sumale te insuhu kandin te Magbebaye. 
Ne seini ka baad te me kabuhalan ni Israil ne katenge te imbehey ni Muwisis te me sundalu ne migpakiggira: 
337,500 ne buuk ka me karniru wey me kambing, 
36,000 ne buuk ka me baka, 
30,500 ne buuk ka me asnu, 
wey sapulu wey hen‑em ne libu (16,000) ne buuk ka me malitan ne ware pad neyilabeti te lukes. 
Ne puun te seini se baad te me kabuhalan ni Israil, migdapig si Muwisis te tigsabeka puun te tagse lalimma ne pulu (50) ne etew wey ke ayam naa sumale te insuhu kandin te Magbebaye. Ne imbehey rin seini diye te me kabuhalan ni Libi ne iyan impiyalan te Balungbalung te Magbebaye. 
Ne migparani ki Muwisis ka me kumandir te linibu wey ginatus ne me sundalu, 
wey migkahi, “Ahalen, inseel ney ka me sundalu ne me sakup ney wey ware minsan sabeka ne naawe. 
Purisu in-uyan ney eyew igdasag para te Magbebaye ka seini se langun ne nakuwa ney ne me kasangkapan ne bulawan: me binukul, me sising, me ariyus, wey me balieg eyew kene key egparusaan te Magbebaye.” 
Ne indawat ni Muwisis wey ni Iliyasar ne talagpanubad ka me bulawan ne impanayab ne me kasangkapan. 
Ne sabeka ne gatus wey siyam ne pulu (190) ne kilu ka me kasangkapan ne bulawan ne immandasag te me kumandir te me sundalu para te Magbebaye. 
Ne migtines degma ka langun ne sundalu te me kasangkapan ne nenaahew ran. 
Ne impanguyan ni Muwisis wey ni Iliyasar ne talagpanubad ka me kasangkapan ne bulawan diye te Balungbalung ne Temuwanan eyew egkasuman-suman te Magbebaye ka me kabuhalan ni Israil.