Numiru.
34.
Ne ingkahiyan te Magbebaye ne Manama si Muwisis, 
“Kahii nu ka me kabuhalan ni Israil: ‘Emun ke egseled kew e diye te tane te Kanaan, ka tane ne igbehey ku kaniyu, seini ka me eletanan: 
ka eletanan diye te igkakawanan ne balabahan, iyan ka disirtu diye te Sin ne nakapaayun te inged ne Idum. Ne ka eletanan diye te igkakawanan ne balabahan, egpuun te tamanan te dahat ne egngaranan te Namatey ne Dahat. 
Ne migbatiku seini diye te igkakawanan ne balabahan peendiye te igtakereg te Akrabim ne egpeendiye te inged ne ware mig-ugpe, diye te Sin. Ne egpabulus seini diye te igkakawanan ne balabahan te Kadis-Barniya peendiye te Hasar-Adar taman diye te Asmun. 
Ne puun te Asmun, egbatiku man‑e seini diye te Bangalug te Ihiptu taman te Dahat ne Miditiranyu. 
“‘Ne ka diye te dapit te iglineb, iyan niyu eletanan ka Dahat ne Miditiranyu. 
“‘Ne ka eletanan diye te igkahibang ne balabahan, egbunsud diye te Dahat ne Miditiranyu peendiye te Bubungan ne Hur. 
Ne puun te Bubungan ne Hur, egpabulus seini diye te Hamat peendiye te Sidad 
wey Sipruna, taman diye te Hasar-Inan. 
“‘Ne ka eletanan diye te igsile, egbunsud te Hasar-Inan peendiye te Sipam. 
Ne egpabulus seini diye te Ribla dapit te igsile te Ayin, peendiye te igsile ne ilis te Lanew te Galiliya. 
Ne egpabulus seini diye te Hurdan taman diye te Namatey ne Dahat. “‘Sika ka tane niyu wey ka me eletanan kayi.’” 
Purisu ingguhuran e ni Muwisis ka me kabuhalan ni Israil te migkahi, “Sika ka egkapanunud niyu ne tane ne egba-baaren niyu pinaahi te pegpintut-pintut. Migsuhu ka Magbebaye ne Manama te iyan naan de egpamehayan due ka siyam wey katenge ne tribu, 
su nabehayan man‑e ka me kabuhalan ni Rubin, ni Gad, wey katenge te kabuhalan ni Husi ne iyan ka me kabuhalan ni Manasis. 
Ka daruwa ne tribu wey ka katenge te tribu ni Manasis, nakarawat e te baad dan ne iyan ka diye te talipag te Hurdan dapit te igsile ne egkatalipag te Hiriku.” 
Ne ingkahiyan te Magbebaye si Muwisis, 
“Si Iliyasar ne talagpanubad wey si Huswi ne anak ni Nun ka egbaad-baad te tane para te me kabuhalan ni Israil. 
Ne alam kew naa te tigsabeka ne pangulu puun te tagse tribu eyew egpabulihen kandan te pegbaad-baad te tane.” 
Ne seini ka me ngaran te me etew ne impangalam te Magbebaye: te me kabuhalan ni Huda, si Kalib ne anak ni Hipuni; 
te me kabuhalan ni Simyun, si Simuwil ne anak ni Amihud; 
te me kabuhalan ni Binhamin, si Ilidad ne anak ni Kislun; 
te me kabuhalan ni Dan, si Buki ne anak ni Hugli; 
te me kabuhalan ni Manasis ne anak ni Husi, si Haniil ne anak ni Ipud; 
te me kabuhalan ni Ipraim ne anak ded ni Husi, si Kimuwil ne anak ni Siptan; 
te me kabuhalan ni Sabulun, si Ilisapan ne anak ni Parnak; 
te me kabuhalan ni Isakar, si Paltiil ne anak ni Asan; 
te me kabuhalan ni Asir, si Ahihud ne anak ni Silumi 
te me kabuhalan ni Naptali, si Pidahil ne anak ni Amihud. 
Sikandan ka in-alam te Magbebaye ne Manama ne egpabulihen te pegbaad-baad te tane te Kanaan ne egkapanunud te me kabuhalan ni Israil.