Numiru.
35.
Ne diye te kanapnapuan te Muwab, te ilis te Weyig ne Hurdan ne egkatalipag te Hiriku, ingkahiyan te Magbebaye ne Manama si Muwisis, 
“Kahii nu ka me kabuhalan ni Israil: ‘Behayi niyu ka me kabuhalan ni Libi te me siyudad wey me panabtaban ne nakalingut te sika ne me siyudad puun te tane ne egkarawat niyu. 
Ka sika ne me siyudad ka eg-ugpaan dan, wey ka me panabtaban, para te me ayam dan. 
Ne ka me panabtaban ne igbehey niyu te me kabuhalan ni Libi, keilangan ne lalimma ne gatus (500) ne mitrus ka kaluag ne nakalingut te alad te siyudad. 
Seked kew diye te lihawangan te alad te siyudad te tigsiyam ne gatus (900) ne mitrus diye te tagse pikungan: dapit te igsile, dapit te iglineb, dapit te igkakawanan ne balabahan, wey dapit te igkahibang ne balabahan. Sika ka egkeyimu ne me panabtaban te me ayam te me kabuhalan ni Libi. Ne diye naa te taliware te sika se hep‑at ne pikungan ka siyudad. 
Behayi niyu ka me kabuhalan ni Libi te hen‑em ne siyudad ne egkaaputan te seeye se etew ne egpallahuy ne nakapatey ne ware tuyui. Ne ware labet due ka hep‑at ne pulu wey daruwa (42) ne siyudad. 
Purisu egkeyimu e ne hep‑at ne pulu wey walu (48) ne siyudad ka igpakabehey niyu te me kabuhalan ni Libi duma te nakalingut ne me panabtaban diye te marani te sika ne me siyudad. 
Egpuun sika ne me siyudad te tane ne baad te me tribu te Israil. Ka dakel ne tribu, egbehey te masmasulug ne siyudad, wey ka deisek de ne tribu, egbehey te pila-pila re ne siyudad.’” 
Ne ingkahiyan te Magbebaye ne Manama si Muwisis, 
“Kahii nu ka me kabuhalan ni Israil: ‘Emun ke egpakalapas kew e te Weyig ne Hurdan wey egmekeugpe kew e diye te Kanaan, 
keilangan ne egteil kew te me siyudad ne aputanan te etew ne egpakapatey te ware tuyui. 
Sika ne me siyudad ka eg-aputan te egpakapatey eyew kene egkeyimatayan te egsuli kandin taheed te kene pad sikandin egkewukuman te langun. 
Keilangan ne hen‑em ne siyudad ne aputanan ka igteil niyu. 
Tatelu ne siyudad diye te igsile te Weyig ne Hurdan, wey tatelu degma diye te iglineb te tane te Kanaan. 
Ka sika se hen‑em ne siyudad ka egkeyimu ne aputanan niyu, wey te me lapu ne mig-ugpe due te kaniyu wey te me migmalmahaliyug de. Siyudad sika ne aputanan te etew ne egpakapatey ne ware tuyui. 
“‘Piru ka seeye se egpakapatey pinaahi te peglampes te putew, eg-isipen ne talaggimatey wey keilangan ne eggimatayan. 
Ne emun ke imbatu te etew ka senge-etew wey namatey e, eg-isipen ne talaggimatey ka migbatu kandin, wey keilangan ne eggimatayan. 
Ne emun ke inlampesan te kayu ka sabeka ne etew wey namatey e, eg-isipen ne talaggimatey ka miglampes kandin, wey keilangan ne eggimatayan. 
Ne ka karumaan pad iya mismu te inggimatayan ka egkaayun ne egsuli; keilangan ne eggimatayan din ka talaggimatey ke egpekegkita sikandan. 
“‘Ne emun ke indumutan te sabeka ne etew ka senge-etew, wey intuku din, wey ke indegpak din naa te minsan nekey, wey namatey e, 
wey ke insuntuk din naa wey namatey e, eg-isipen sikandin ne talaggimatey. Ne egkaayun degma sikandin ne eggimatayan te karumaan mismu te seeye se namatey ke egpekegkita sikandan. 
“‘Piru panunggiling ke nakapatey ka sabeka ne etew te ware din dumuti wey ware din tuyui su narugsuan wey ke naregpak din naa te minsan nekey, 
wey ke ware sikandin nakabantey te neuluhan din te batu ka sabeka ne etew ne kene ne kuntere din, wey namatey e, 
eglibulung ka langun eyew eggukuman sikandin wey ka seeye se egsuli perem kandin, sumale te me suhu. 
Ne emun ke egkapamalehetan ne ware din tuyui ka peggimatey, keilangan ne egpangabangan sikandin te keet-etawan puun te me etew ne egkeupian perem ne egsuli kandin, wey igpalibed sikandin diye te siyudad ne aputanan. Diye sikandin egpeugpaa taman te egpatey e ka Labew ne Talagpanubad ne in-itisan te matulus ne lana. 
Piru ke eglihawang sikandin te siyudad ne aputanan 
wey egkiteen sikandin te egkeupian ne egsuli, egkaayun sikandin ne eggimatayan, wey kene eg-isipen ne talaggimatey ka migsuli kandin. 
Purisu keilangan ne egpalunggehaat de diye te siyudad ne aputanan ka nakapatey taman te egpatey e ka Labew ne Talagpanubad. Ne egkaayun e ne eg-uli sikandin diye te ugpaan din. 
Sika ka me balaud wey me suhu ne ware egtamanan ne keilangan ne egtantanuran niyu wey te me kabuhalan niyu, minsan hendei kew eg-ugpe. 
“‘Ke miggimatey ka sabeka ne etew te senge-etew, keilangan ne eggimatayan sikandin, piru keilangan ne due me talagpamalehet te nakapatey sikandin. Piru ke sabeka re ka talagpamalehet, keilangan ne kene sikandin eggimatayan. 
Ne kene kew dawat te iglekat para te umul te talaggimatey ne nakapatey su keilangan iya ne eggimatayan sikandin. 
Ne kene kew man‑e dawat te iglekat te umul te etew ne mig-aput diye te siyudad ne aputanan eyew egpekeuli e sikandin te ware pad migpatey ka Labew ne Talagpanubad. 
Te sika ne paahi, egkapanalliyaan niyu ne egkalinditan ka tane ne eg-ugpaan niyu, su ka peggimatey egpakalindit te nasud. Ne ware egpakalinis kayi angin e te kamatayen te etew ne nakapatey. 
Purisu kene niyu linditi ka tane ne eg-ugpaan niyu, su sikeddi se Magbebaye ne Manama, eg-ugpe duma kaniyu te me kabuhalan ni Israil.’”