Numiru.
36.
Ne ka me pangulu te me kabuhalan ni Gilyad ne anak ni Makir wey apu ni Manasis ne anak ni Husi, migparani ki Muwisis wey te me pangulu te me pamilya te me kabuhalan ni Israil, 
wey migkahi, “Ahalen, te timpu ne insuhu ka te Magbebaye ne Manama te pegbaad-baad te tane ne egkapanunud te me kabuhalan ni Israil pinaahi te pegpintut-pintut, insuhu ka man‑e nikandin ne igpabehey ka baad te suled ney ne si Silupihad diye te anak din ne me malitan. 
Piru ke egmakaasawa sikandan te lein ne tribu, egpekeendiyad e te tribu te me iglukes dan ka tane ne egkapanunud dan. Te sika ne paahi, egkasalinan e ka baad te tribu ney. 
Te pegginguma te lalimma ne pulu (50) ne leg‑un ne iyan ka leg‑un te kaligwangan, igpanguli e ka tane ne nakaprinda, ne egmakatimul e ka tane te me anak ni Silupihad diye te tane te tribu te me iglukes dan. Purisu egkaawe e ka egkapanunud dan isip karatuan ne igpakahaat te me kaap-apuan ney.” 
Ne ingkahiyan ni Muwisis ka me kabuhalan ni Israil sumale te lalag te Magbebaye ne migkahi, “Eleg ka ingkahi te me tribu te kabuhalan ni Husi. 
Seini ka ingkahi te Magbebaye meyitenged te me malitan ne me anak ni Silupihad, ‘Egkaayun sikandan ne egpangasawa te igkeupii ran, piru keilangan ne sakup de degma te tribu ran ka eg-asaween dan. 
Te sika ne paahi, ka egkapanunud te tagse kabuhalan ni Israil, kene egpekeendiye te lein ne tribu, su keilangan iya ne kene egkaawe diye te tagse sabeka ka tane ne egkapanunud din puun te me kabuybuyahan din. 
Ka langun ne malitan ne egpakapanunud te tane puun te tribu ran, keilangan ne iyan de degma eg-asaween ka sakup ded te tribu ran, eyew kene egkaawe diye te tagse sabeka ka tane ne napanunud din puun te me kabuybuyahan din. 
Kene egkaayun ne egkaangken te sakup te lein ne tribu ka egkapanunud te senge-etew. Keilangan ne kene egkaawe diye te tagse tribu te Israil ka egkapanunud dan.’” 
Purisu intuman te me malitan ne me anak ni Silupihad ka ingkahi te Magbebaye pinaahi ki Muwisis. 
Ka me anak ni Silupihad ne me malitan iyan ensi Mala, si Tirsa, si Hugla, si Milka, wey si Nua. Ne iyan dan de impangasawa ka me lukes ne me anak te me anggam dan 
ne me kabuhalan ni Manasis ne anak ni Husi. Purisu ware ded naawe puun te tribu ran ka napanunud dan ne tane te amey ran. 
Sika ka me tulumanen wey me suhu ne imbehey te Magbebaye te me kabuhalan ni Israil pinaahi ki Muwisis te timpu ne diye sikandan te kanapnapuan te Muwab, te ilis te Weyig ne Hurdan ne egkatalipag te Hiriku.