Diyuturunumiyu.
2.
Ne ingkahiyan e man‑e ni Muwisis ka me kabuhalan ni Israil, “Ne nataman migmambatiku kid diye te disirtu peendiye te Malalab ne Dahat, sumale te insuhu kanta te Magbebaye, wey nenakalingut-lingut ki re diye te me bubungan te inged ne Idum te naluhey ne timpu. 
“Ne ingkahiyan a te Magbebaye, 
‘Naluhey kew e ka eglingut-lingut kayi te me bubungan. Batiku kew diye te igkahibang ne balabahan. 
Ne kahii nu ka me kabuhalan ni Israil: Mahaan kew e eglihad te eletanan te me inged te me karumaan niyu ne me kabuhalan ni Isaw ne nangugpe diye te Siir. Egkengaaldek sikandan kaniyu, 
piru keilangan ne kene kew pakiggira kandan, su kene ku igbehey kaniyu ka minsan hendei ne baad te tane dan, su imbehey ku ma ka me inged te Idum diye te me kabuhalan ni Isaw isip kandan mismu ne tane. 
Ne taheed te eggipanew kew diye te tane dan, kaayun kew ne egbebeli te egkakeen wey weyig ne egkeinum puun kandan. 
“‘Impalampus kew te Magbebaye ne Manama niyu te langun ne inggimu niyu. Intamengan kew nikandin te peggipanew niyu kayi te luluahi ne disirtu. Indumaan kew nikandin te hep‑at ne pulu (40) ne leg‑un, wey ware kew nakulangi te minsan nekey ne ingkeilangan niyu.’ 
“Purisu immanliharan te re ka me lungsud te me karumaan ta ne me kabuhalan ni Isaw ne nangugpe diye te Siir. Ware ki namaye te dalan te Araba puun te Ilat wey Isiyun-Gibir, su diye ki re namaye te disirtu peendiye te Muwab. 
Ne impanpanayan ki te Magbebaye te migkahi, ‘Kene kew pakiggira te me Muwabihanen ne me kabuhalan ni Lut, su kene ku igbehey kaniyu ka minsan hendei ne baad te tane dan su imbehey ku ma ka Ar diye te kandan isip tane dan mismu.’” 
(Te ware pad ibehey te Manama diye te me Muwabihanen ka Ar, iyan pad dengan nangugpe diye ka me kabuhalan te me eleggasi ne egngaranan te Imim ne mannekal wey masulug. Me mallangkew degma sikandan iling te me eleggasi ne Anakim. 
Ne iling te me Anakim, neilaan degma sikandan ne me Ripaimhanen, piru me Imim ka igngengaran kandan te me Muwabihanen. 
Ne iyan degma dengan nangugpe diye te Siir ka me Hurihanen piru immandeldel wey impangimatayan sikandan te me kabuhalan ni Isaw wey iyan e mule nangugpe diye, iling te inggimu te me kabuhalan ni Israil diye te tane ne imbehey kandan te Magbebaye.) 
Ne migpabulus-bulus si Muwisis ka migkahi te me kabuhalan ni Israil, “Ne nataman migmanlapas kid te weyig diye te Bangalug ne Sirid sumale te insuhu kanta te Magbebaye. 
Tatelu ne pulu wey walu (38) e ne leg‑un ka miglihad puun te peg-awe ta te Kadis-Barniya, taman te nammatey e ka langun ne kabuhalan ne me bahani, sumale te impahunlibet te Magbebaye meyitenged kandan. 
Inlegparan iya sikandan te Magbebaye taman te nammatey sikandan langun. 
“Te nammatey e sikandan langun, 
ingkahiyan kid te Magbebaye, 
‘Kuntee, lihad kew e te eletanan te inged te Muwab ne marani te Ar. 
Ne emun ke egpalinggumaan kew e te eletanan te inged te me Amunihanen ne me kabuhalan ni Lut, kene kew himu te samuk kandan wey ke egpakiggira naa kandan su kene ku igbehey kaniyu ka minsan hendei ne baad te tane dan, su imbehey ku ma sika kandan isip kandan mismu ne tane.’” 
(Neilaan degma dengan sika ne inged te Ripaimhanen, su in-ugpaan ma dengan sika te me kabuhalan ni Ripaim, piru me Sumsumim ka igngengaran kandan te me Amunihanen. 
Mabbulut degma sikandan, masulug, wey mallangkew iling te me Anakim. Piru impangimatayan sikandan te Magbebaye, purisu iyan e nangugpe te tane dan ka me Amunihanen. 
Ne iling ded degma ka inggimu te Magbebaye diye te me Hurihanen, impangimatayan din sikandan. Purisu iyan e nangugpe te tane dan ka me kabuhalan ni Isaw taman kuntee. 
Ne iling degma kayi ka neyitabu te me Abihanen ne nangugpe diye te me bariyu ne ilis te Dahat ne Miditiranyu taman te Gasa. Impangimatayan sikandan te me Kiritihanen wey iyan e mule nangugpe te me inged dan.) 
Ne migpabulus-bulus si Muwisis ka migkahi te me kabuhalan ni Israil, “Ne ingkahiyan a te Magbebaye, ‘Panines kew e wey lapas kew e te Weyig ne Arnun. Lusuri niyud si Sihun ka matig-Hisbun ne Hari te me Amurihanen su igbehey kud sikandin kaniyu, eyew egkaangken niyud ka tane din. 
Puun kuntee, egtuhutan ku ne egpangelkelen te pegkaaldek kaniyu ka langun ne etew te intiru ne kalibutan ke egpakarineg sikandan kaniyu.’” 
Ne ingkahiyan e man‑e ni Muwisis ka me kabuhalan ni Israil, “Purisu te diye kid e te disirtu, diye te Kidimut, migsuhu a te me suluhuanen te peggendiye ki Hari Sihun, eyew te peghangyu kandin te pegkahi, 
‘Pabayaa key ubag nikeykew te tane nu. Eg-ikul key re te kelesadda wey kene key egsuwey diye te igkakawanan wey ke igkahibang naa. 
Ne egbayaran ney re ka egkakeen wey egkeinum ney. Ka ighangyu ney re ubag ne egpabayeen key re nikeykew 
iling te pegpabaye kanami te me matig-Idum ne nangugpe diye te Siir, wey te me Muwabihanen ne nangugpe diye te Ar, taman te nakalapas key te Weyig ne Hurdan peendiye te tane ne igbehey kanami te Magbebaye ne Manama ney.’ 
“Piru ware ki pabayaa ni Sihun, ka Hari ne matig-Hisbun su impakehal ma te Magbebaye ne Manama niyu ka suman-suman din eyew igpakabehey rin sikandin kayi te kanta wey egkaahew ta ka tane din ne seinid iya kuntee se in-ugpaan ta. 
“Ne ingkahiyan a te Magbebaye, ‘Igbehey kud kuntee kaniyu si Sihun wey ka tane din, purisu lusuri niyud sikandin wey ahawa niyud ka tane din.’ 
Ne miglihawang si Sihun puun te lungsud te Hisbun duma te me sundalu rin wey migpakiggira kanta diye te Hahas. 
Ne impangabangan ki te Magbebaye ne Manama ta, wey natalu ta sikandin lagkes ka langun ne anak wey me sundalu rin. 
Ne impanlundus ta patamtamani ka me lungsud din wey impangimatayan ta ka langun ne etew, wey warad iya insame ta minsan sabeka. 
Ne impanuyuk ta mule ka langun ne ayam wey impanguyan ta ka langun ne karatuan ne naahew ta puun te me lungsud dan. 
Ne imbulihan ki degma te Magbebaye eyew egkatalu ta ka me lungsud te Aruwir ne diye te ilis te weyig te Bangalug ne Arnun lagkes ka siyudad ne diye te seeye ne bangalug, taman te Gilyad. Warad iya lungsud ne ware ta naahew. 
Piru in-alihu ta mule ka me lungsud te me Amunihanen, ka me lungsud diye te ilis te Weyig te Habuk, wey ka me lungsud ne nakalingut te me labuntud sumale te insuhu kanta te Magbebaye ne Manama ta.”