Diyuturunumiyu.
5.
Ne impeumew ni Muwisis ka me kabuhalan ni Israil wey ingkahiyan din sikandan, “Me kabuhalan ni Israil, pammineg kew te me balaud wey me suhu ne igpangguhud ku kaniyu kuntee ne aldew. Iskuyleyi niyu seini wey tumana niyu te mapahetpet. 
Miggimu ka Magbebaye ne Manama ta te kasabutan duma kanta diye te Bubungan ne Sinay. 
Inggimu rin seini ne kasabutan kene ne para re te me kaap-apuan ta, ke kene, para degma kanta langun te seini kuntee ne aldew. 
Migpakiglalag kaniyu ka Manama, puun te taliware te hapuy diye te Bubungan ne Sinay. 
Te seeye ne aldew, migsasindeg a diye te taliware niyu wey te Magbebaye eyew te pegpasabut kaniyu te egmanlalahen din, su nenaaldek kew ma te hapuy wey ware kew nanakereg diye te bubungan. Ne migkahi ka Magbebaye: 
“Sikeddiey ka Magbebaye ne Manama niyu ne mig-angey kaniyu puun te inged te Ihiptu, wey ka migpaawe kaniyu te neneuripen. 
“Kene kew simba te duma ne manama, su sikeddi de iya simbaa niyu. 
“Kene kew himu te larawan te minsan nekey ne diye te langit, diye te tane, wey diye te weyig eyew egsimbeen niyu. 
Kene kew panimbuel wey ke egsimba naa rue, su sikeddi se Magbebaye ne Manama niyu, talikuren a ne Manama; igkeupii ku ne sikeddi de ka egsimbeen. Iglagkes ku te egparusa ka me anak tenged te sale te me amey ran, peendiye te apu dan te mata, tenged su eg-apul sikandan keddiey. 
Piru igpakita ku ka geyinawa ku ne kene egkabalbalawan diye te libu-libu ne kabuhalan ne miggeyinawa keddi wey migtuman te me suhu ku. 
“Kene niyu gamita ka ngaran te Magbebaye ne Manama niyu te mareet ne tuyu. Su egdusaan ku iya seeye se eggamit te ngaran ku te mareet ne tuyu. 
“Himuwa niyu ka igpeyimu ku kaniyu te Aldew te Peggimeley, wey iteil niyu seini ne aldew para keddi te Magbebaye ne Manama niyu sumale te insuhu ku kaniyu. 
Trabahu kew te hen‑em ne aldew, wey himuwa niyu ka langun ne eggimuwen niyu, 
piru ka igkapitu ne aldew, Aldew sika te Peggimeley, wey iteil niyu para te Magbebaye ne Manama niyu. Kene kew trabahu te minsan nekey, sikaniyu langun se taltalaanak, minsan ka me suluhuanen niyu ne lukes wey malitan, me baka, me asnu, wey duma pad ne me ayam niyu. Ne iling ded degma ka me mahaliyug niyu ne miglapu due te kaniyu. Te seini ne paahi, egpekeyimeley ubag degma ka me uripen niyu iling kaniyu. 
Sumsumana niyu ne me uripen kew degma dengan diye te Ihiptu, wey sikeddi ka Magbebaye ne Manama niyu ka migpalihawang kaniyu pinaahi te karesen wey geem ku. Purisu sikeddi se Magbebaye niyu, migsuhu a kaniyu ne keilangan ne eggimuwen niyu ka langun ne igpeyimu ku kaniyu te Aldew te Peggimeley. 
“Tahura niyu ka amey wey iney niyu sumale te insuhu ku kaniyu, eyew egmalayat ka umul niyu wey egmeupiya ka peg-ugpe niyu diye te tane ne igbehey kaniyu te Magbebaye ne Manama niyu. 
“Kene kew himatey. 
“Kene kew panlibug. 
“Kene kew panakew. 
“Kene kew uubat ka egpamalehet eyew igdakesel ka duma ne etew. 
“Kene kew keimma te asawa te senge-etew, te baley rin, te kamet din, te me suluhuanen din ne me lukes wey me malitan, te me ayam din, wey te minsan nekey ne kandin.” 
Ne ingkahiyan ni Muwisis ka me kabuhalan ni Israil, “Sika ka me suhu te Magbebaye kaniyu te migmanlibulung kew diye te Bubungan ne Sinay. Te timpu ne miglalag sikandin te meemen ne laheng ne egpuun te taliware te hapuy ne nalingutan te makepal ne gapun, sika iya ne me suhu ka ingkahi rin wey warad duma pad. Ingkulit din seini diye te daruwa ne malumpayag ne batu wey imbehey rin e keddi.” 
“Te pegkarineg niyu te laheng ne egpuun te taliware te makepal ne gapun taheed te migkanlabkanlab ka bubungan, migparani e keddi ka langun ne pangulu te me kabuhalan niyu wey ka me igdatu niyu, 
wey migkahi sikandan, ‘Impapitew te Magbebaye ne Manama ta ka geem wey katelesan din, wey narineg ney ka laheng din puun te taliware te hapuy. Ne nakanengneng key e kuntee ne kene bes egpatey ka etew ke egpakiglalag ka Manama kandin. 
Piru egkammatey key mule pinaahi te sika ne hapuy ke egpakarineg key pad man‑e te laheng te Magbebaye ne Manama ta. 
Ware etew ne kene egpatey ke egpakarineg te laheng te manekal ne Manama ne egpakiglalag kandin puun te taliware te hapuy. 
Sikeykew re ubag Muwisis ka egparani diye te Manama ta eyew egpammineg te iglalag din. Ne guhuri key re te langun ne iglalag din su egpamminehen ney wey egtumanen ney seini.’ 
“Ne narineg te Manama ka ingkahi niyu keddi, wey ingkahiyan a nikandin, ‘Narineg ku ka ingkahi ran keykew, wey eleg iya ka ingkahi ran. 
Meupiya iya perem ke layun sikandan egsuman-suman ne egtahud keddi, wey egtuman te me suhu ku eyew egmatubung sikandan wey ka me kabuhalan dan, te ware egtamanan. 
Hendiye ke naan e wey peulia nud sikandan diye te me balungbalung dan. 
Piru palunggaat ka mule kayi duma keddiey eyew iglalag ku keykew ka langun ne balaud wey me suhu ne keilangan ne igpanulu nu te me kabuhalan ni Israil eyew egtumanen dan diye te tane ne igbehey ku kandan.’” 
Ne ingkahiyan e man‑e ni Muwisis ka me kabuhalan ni Israil, “Purisu tumana niyud iya te mapahetpet ka me balaud te Magbebaye ne Manama niyu; kene kew en iya supak minsan sabeka te me balaud din. 
Tumana niyu seini langun eyew egmeupiya ka peg-ugpe niyu wey egmalayat pad ka umul niyu diye te tane ne eg-angkenen niyu.”