Diyuturunumiyu.
11.
Ne ingkahiyan ni Muwisis ka me kabuhalan ni Israil, “Geyinawei niyu ka Magbebaye ne Manama niyu, wey tumana niyu ka langun ne insuhu din kaniyu. 
Kene niyu kalingawi ka natuenan niyu meyitenged te Magbebaye ne Manama pinaahi te nenabbaybayaan niyu duma kandin. Sikaniyu mismu ka nakapamalehet kayi; kene ne ka me anak niyu. Ware sikandan nakakita te pegkatalahuren wey pegkamaresen te Magbebaye ne Manama, 
wey te me kein-inuwan ne inggimu rin diye te Hari te Ihiptu wey te intiru ne nasud din. 
Ware man‑e sikandan nakakita te inggimu te Manama diye te me sundalu te Ihiptu duma te me kudde wey te me karwahi ran; ke immenu sikandan te Magbebaye ne Manama te eglened te timpu ne impanlupug kew nikandan. Impangimatayan sikandan te Magbebaye ne Manama. 
Nakita niyu degma ka inggimu rin kaniyu diye te disirtu, taman te nekeuma kew kayi te Muwab. 
Sumsumana niyu ka inggimu rin engki Datan wey ki Abiram ne me anak ni Iliyab te tribu ni Rubin. Impabekabeka rin ka tane wey impaameluk din sikandan ne mannekal re due duma te me pamilya ran, me balungbalung, me suluhuanen, wey me ayam dan. 
Sikaniyu mismu ka nakakita te peggamit te Magbebaye ne Manama te dakel ne geem din te peggimu te seini se langun ne kein-inuwan.” 
Ne migkahi e man‑e si Muwisis, “Purisu tumana niyu ka langun ne suhu ne ingkahi ku kaniyu kuntee eyew egmanekal kew ka eggipanew wey eg-angken te tane diye te talipag te Hurdan. 
Ke egtuman kew, egmalayat ka umul niyu wey egmatubung kew diye te meupiya ne tane wey dakel se eg-uma ne insaad te Magbebaye ne Manama diye te me kaap-apuan niyu wey te me kabuhalan dan. 
Ka tane ne eggendiyaan niyu eyew eg-angkenen, kene ne iling te tane diye te Ihiptu ne impuunan niyu, ne emun ke egpamula kew, keilangan pad ne egpamisbisan. 
Piru ka tane ne eg-angkenen niyu, due me bubungan wey me bangalug ne layun de eg-urani; 
tane seini ne intanggu te Magbebaye ne Manama niyu, wey intetamengan din seini te langun ne timpu. 
“Ke egtumanen niyu re layun ka me suhu ne ingkahi ku kaniyu kuntee, ne keilangan ne eggeyinawaan niyu ka Magbebaye ne Manama niyu, wey egpamakayen niyu sikandin te mapahetpet, 
egpeuyanan kew nikandin te uran te eleg ne timpu, eyew egpakalilimud kew te me trigu, me behas te paras ne eggimuwen ne binu, wey te me ulibu eyew eggimuwen ne mentika, 
wey egpatubuen din ka me sagbet diye te panabtaban para te me ayam niyu. Ne egkakeen niyu ka langun ne igkeupii niyu ne egkeenen. 
Piru bantey kew su kema ke eg-inniyug kew te Magbebaye ne Manama niyu, wey iyan niyud egsimbeen ka lein ne me manama. 
Ke eggimuwen niyu sika, egkabelu kaniyu ka Magbebaye ne Manama, wey kene din egpeuranen, wey egkammare e ka tane wey kenad e egbehey te meupiya ne uma. Ne egkataman, egkammatey kew wey egkaawe kew e puun te meupiya ne tane ne igbehey kaniyu te Magbebaye ne Manama. 
“Purisu kene niyu kalingawi seini se me suhu ne ingkahi ku kaniyu. Isulat niyu seini wey ibagkes niyu te bakelawan niyu wey ilelangkus niyu eyew egkasuman-suman niyu seini. 
Ipanulu niyu layun seini diye te me anak niyu. Ne malalahey kew meyitenged kayi ke egpaminpinnuu kew diye te me baley niyu, emun ke eggipanew kew, ke egmangibat-hibat kew, wey ke egmangimata kew te maselem. 
Isulat niyu seini diye te sungkaleg te gumawan te me baley niyu, wey te me gumawan te me alad te me lungsud niyu. 
Himuwa niyu sika eyew sikaniyu wey ka me kabuhalan niyu, egmalayat ka umul niyu diye te Inged ne Insaad te Magbebaye ne Manama te me kaap-apuan niyu, taman te duen pad langit diye te dibabew te kalibutan. 
“Emun ke egtumanen niyu te mapahetpet ka langun ne suhu ne ingkahi ku kaniyu ne iyan ka eggeyinawaan niyu ka Magbebaye ne Manama niyu, wey egpalunggaat kew ne matinumanen kandin, 
egpandeldelen din ka langun ne nasud ke egpalinggumaan kew e te tane ne eg-angkenen niyu, minsan masmasulug sikandan wey madmaresen pad kaniyu. 
Egkaangken niyu ka tane ne egkabayaan niyu; puun de iya te disirtu, taman te Libanun, wey puun man‑e te Weyig ne Iyupratis taman te Dahat ne Miditiranyu dapit te iglineb. 
Ne ware minsan hentew ne egpakabalabag kaniyu sumale te insaad te Magbebaye ne Manama, su eggimuwen din ne egkengaaldek kaniyu ka langun ne etew diye te me inged ne egkabayaan niyu. 
“Pammineg kew! Alam kew kayi te daruwa, panalangin wey ke dilus naa. 
Egpanalanginan kew ke egtumanen niyu ka me suhu te Magbebaye ne Manama ne ingkahi ku kaniyu kuntee. 
Piru egdilusen kew ke egsupaken niyu seini, wey ke iyan niyu egsimbeen ka lein ne me manama ne ware niyu neileyi. 
Ne emun ke eg-uyanen kew e te Magbebaye ne Manama diye te tane ne eg-angkenen niyu, egpangguhud ka duma kaniyu diye te Bubungan ne Girisim ke egmenuwen kew te Manama te egdasag, wey egpangguhud degma ka duma kaniyu diye te Bubungan ne Ibal ke egmenuwen kew nikandin te egparusa. 
(Ka seeye ne me bubungan, neelin ne diye te talipag te Hurdan dapit te iglineb, ne iyan ka inged te me Kanaanen ne nangugpe te Araba ne egkatalipag te Gilgal, marani te matulus ne kayu ne egngaranan te Muri.) 
Mahaan kew e egmanlapas te Hurdan eyew te peggendiye te tane ne eg-angkenen niyu ne igbehey kaniyu te Magbebaye ne Manama niyu. Ne emun ke egkaangken niyud seeye ne tane wey egmekeugpe kew e diye, 
tumana niyud iya ka langun ne balaud wey me suhu ne ingkahi ku kaniyu kuntee.”