Diyuturunumiyu.
13.
“Ne emun ke due prupita wey ke talagpasabut naa te taheinep ne egkahi te egpapitew sikandin te me kein-inuwan 
eyew te peg-inniyat kaniyu ne egsimba wey egpamakey te me manama ne ware niyu simbaa dengan, wey minsan pad egkamalehet ka igkahi rin, 
kene kew linga-linga kandin. In-el-elehan kew re te Magbebaye ne Manama niyu eyew te pegnengneng ke inggeyinawaan niyu naan iya sikandin te mapahetpet. 
Iyan niyu re pamakaya wey tahura ka Magbebaye ne Manama niyu. Pammineha niyu sikandin wey tumana niyu ka me suhu din. Sikandin de simbaa niyu wey kene kew engked kandin. 
Piru keilangan ne eggimatayan ka prupita wey ke talagpasabut naa te taheinep, su sikandin ka egpakapanulu kaniyu ne egsukul kew wey egsupaken niyu ka suhu te Manama wey eyew egpakasuwey kew te igkeupii rin te migpalihawang kaniyu puun te Ihiptu, wey mig-angey kaniyu puun te pegkeuripen. Purisu keilangan ne eg-aween ka mareet ne himu due te kaniyu. 
“Ne panunggilingan ke egtipuwen kew te heles de te suled niyu, te anak niyu ne lukes wey ke malitan naa, ke asawa niyu wey ke amana niyu naa ne alukuy, eyew egsimba kew te me manama ne ware niyu neileyi wey te me kaap-apuan niyu, 
ke egbaggeten kew nikandin ne egsimba te me manama te me etew ne nangugpe diye te marani niyu wey te minsan hendei, 
kene kew pammineg wey ke egparuma-ruma naa kandin; kene niyu sikandin ikeyid‑u wey kene niyu pangabangi. 
Keilangan ne eggimatayan sikandin wey sikaniyu ka hun‑a ne egbatu kandin. Ne egkataman, ka me etew degma. 
Bebatuwa niyu sikandin taman te egpatey, su sikandin ka egpuunan ne egpakapariyu kew te Magbebaye ne Manama niyu ne iyan migpalihawang kaniyu puun te pegkeuripen diye te Ihiptu. 
Ne emun ke egpakanengneng ka duma ne me kabuhalan ni Israil meyitenged te neyitabu te sika ne prupita wey ke talagpasabut te taheinep, egkaaldek e sikandan, wey warad eggimu te iling due ne himu. 
“Ne emun ke due egkarinehan niyu diye te sabeka te me lungsud ne igbehey kaniyu te Magbebaye ne Manama niyu, 
ne due me etew ne maddeet se hinimuwan ne iyan egpuunan ne egpakasale ka me mahinged diye pinaahi te pegsimba te me manama ne ware niyu neileyi, 
keilangan ne egnengnengan niyu seini ke malehet naa wey ke kene. Ne emun ke egkapamalehetan niyu seini ne malehet, 
keilangan ne eggimatayan niyu ka langun ne mahinged te sika ne lungsud, lagkes ka me ayam dan. 
Ne libulunga niyu diye te taliware te plasa ka langun ne karatuan te seeye ne lungsud, wey panilabi niyu seini wey ka intiru ne lungsud, isip igpanubad ne egtutungen para te Magbebaye ne Manama niyu. Ne kenad iya egkabalbalawan ka seeye ne lungsud. 
Ne kene kew same te minsan nekey ne keilangan ne egsilaban, eyew kene egkabelu kaniyu ka Magbebaye ne Manama, wey egkeyimenawan sikandin kaniyu wey egpamasuluhen kew nikandin sumale te insaad din te me kaap-apuan niyu. 
Eggimuwen sika te Magbebaye ne Manama niyu ke egtumanen niyu ka langun ne suhu din ne ingkahi ku kaniyu kuntee, wey eggimuwen niyu ka matareng diye te tangkaan din.”