Diyuturunumiyu.
28.
Ne ingkahiyan e man‑e ni Muwisis ka me kabuhalan ni Israil, “Ke eg-ikulen wey egtumanen niyu iya te mapahetpet ka langun ne suhu te Magbebaye ne Manama niyu ne ingkahi ku kaniyu kuntee ne aldew, eggimuwen kew nikandin ne labew te langun ne nasud, 
wey egpanalanginan kew nikandin. 
“Egpanalanginan din ka me lungsud wey ka me kamet niyu. 
“Egpanalanginan kew nikandin te masulug ne anak, dakel ne eg-uma, wey masulug ne ayam. 
“Egpanalanginan te Magbebaye ne Manama ka eggaaniyen niyu wey egkakeen niyu. 
“Egpanalanginan din ka langun ne eggimuwen niyu. 
“Igbehey kaniyu te Magbebaye ne Manama ka me kuntere niyu; egsabeka sikandan ka eglusud kaniyu, piru egmakapallahuy sikandan wey egmemekegsuwey-suwey. 
“Egpanalanginan te Magbebaye ne Manama ka me lelapeng niyu wey ka langun ne eggimuwen niyu. Egpanalanginan kew nikandin diye te tane ne igbehey rin kaniyu. 
“Ne sumale te insaad din, eggimuwen kew nikandin ne matulus ne keet-etawan din, ke eg-ikul kew kandin wey egtumanen niyu ka kasabutan din. 
Ne egpakanengneng ka keet-etawan te intiru ne kalibutan ne in-alam kew te Magbebaye ne Manama ne keet-etawan din, wey egkengaaldek sikandan kaniyu. 
Egpanalanginan kew iya te Magbebaye ne Manama diye te tane ne igbehey rin kaniyu sumale te insaad din te me kaap-apuan niyu. Egpamasuluhen din ka me anak niyu, ka me ayam niyu, wey uma te me pinamula niyu. 
Egpeuranan te Magbebaye ne Manama ka tane niyu te eleg ne timpu puun te limuranan diye te langit ne ugpaan din. Egpanalanginan din ka langun ne eggimuwen niyu. Egpasambey kew te duma ne nasud, piru kene kew e mule egpanambey. 
Eggimuwen kew te Magbebaye ne Manama ne pangulu te me nasud, wey kene ne sakup de. Egkaribabew kew layun wey kene egkariralem ke egtumanen niyu ka me balaud wey me tulumanen te Magbebaye ne Manama niyu ne ingkahi ku kaniyu kuntee ne aldew. 
Purisu kene niyu supaka ka langun ne ingkahi ku kaniyu kuntee ne aldew; kene kew ikul wey pamakey te lein ne me manama.” 
Ne ingkahiyan e man‑e ni Muwisis ka me kabuhalan ni Israil, “Piru ke kene niyu egtumanen ka Magbebaye ne Manama niyu, wey ka me suhu wey ka me tulumanen ne ingkahi ku kaniyu kuntee ne aldew, egpakasalerep kew te langun ne dilus: 
“Egdilusen te Magbebaye ne Manama ka me lungsud wey me kamet niyu. 
“Egdilusen din ka me uma te me pinamula niyu, lagkes ka me pegkeen niyu. 
“Egdilusen kew nikandin ne deisek de ka me anak niyu, ka uma te me pinamula niyu, wey ka me ayam niyu. 
“Egdilusen din ka langun ne eggimuwen niyu eyew kene kew eglampus.” 
“Ke eg-inniyug kew te Magbebaye ne Manama wey eggimu te mareet, egpeuyanan kew nikandin te me karereetan eyew egkewukag kew wey kene kew eglampus te langun ne eggimuwen niyu, taman te egkammatey kew wey sahuhune ne egkengaawe. 
Egpeuyanan kew te Magbebaye ne Manama te makaalat-halat ne dalu taman te egkammatey kew diye te tane ne eggendiyaan wey eg-angkenen niyu. 
Egbaybayaran kew te Magbebaye ne Manama pinaahi te egpakapatey ne me dalu, iiniti ne lusung, wey pegpanlebag. Ne egpeuyanan kew nikandin te gulabung wey meinit ne kalamag eyew egkareetan ka me pinamula niyu. Egginguma kaniyu seini ne me karereetan taman te egkammatey kew. 
Ne kenad e eg-uran, wey egkehal e ka tane iling te putew. 
Ne kenad ne uran ka igbehey kaniyu te Magbebaye ne Manama, su alinepung e wey pantad; egpeuranan kew nikandin te alinepung taman te egkammatey kew. 
“Egtuhutan te Magbebaye ne Manama ne egkatalu kew te me kuntere niyu. Egsabeka kew ka eglusud kandan piru egmemekegsuwey kew ka egpamallahuy, wey egkengaaldek ka langun ne migharian te intiru ne kalibutan tenged te egkeumaan niyu. 
Ne egpangeenen e te me bayaku wey me mananap ka me lawa niyu ne nammatey, wey warad minsan sabeka ne egpakaalew kandan. 
Egbaybayaran kew te Magbebaye ne Manama pinaahi te me lebag, me buu, kehang, wey me dalehes ne kene egkabawian ne iling te impasalerep din te me Ihiptuhanen. 
Egpabusawan kew te Magbebaye ne Manama, eglibehen, wey egbuturan. 
Egmakapanamsam kew naan de minsan meudtu, iling te butud, wey kene kew eglampus te langun ne eggimuwen niyu. Ne egde-deehen kew wey egpanakawan layun, wey warad iya egpakapangabang kaniyu. 
“Egpangasawa kew, piru eg-ahawen de degma te lein; egmamebaley kew, piru kene ne sikaniyu ka egmekeugpe; egpamula kew te me paras, piru kene ne sikaniyu ka egmakapamupu te behas kayi. 
Egpanlapeen ka me baka niyu diye te tangkaan niyu, piru kene kew egpakakeen kayi; egpanuyuken ka me asnu niyu wey egpakapipitew kew re, wey kenad seini igpanguli kaniyu; egpanakawen ka me karniru niyu, wey ware egpakapangabang kaniyu. 
Ne egmakapipitew kew re te egpandakepen ka me anak niyu ne me lukes wey malitan wey egpanguyanen diye te lein ne me nasud; egtetahad kew te langun ne timpu ke egpakalibed e sikandan, piru ware egkeyimu niyu. 
Ne ka me etew ne ware niyu neneileyi, iyan egkeen te uma te langun ne inlasayan niyu te egpamula. Ne layun kew re egmande-deeha wey egbaybayari. 
Ne egpamusawen kew ke egkakita niyud seini langun. 
Egbaybayaran kew te Magbebaye ne Manama pinaahi te lebag ne kene egkabawian, puun te me paa niyu taman te ulu niyu. 
“Egtuhutan te Magbebaye ne Manama ne egpandakepen kew duma te Hari niyu, wey egpanguyanen diye te lein ne nasud ne ware niyu re due ken‑u nabayei. Ne diye, egsimba kew e te me manama ne kayu wey batu. 
Ne igkengaaldek kew, egdali-dian, wey eg-ay-ayuwen, te me mahinged te me inged ne egpanguyanan kaniyu. 
“Dakel ka igpamula niyu, piru deisek de ka egkahaani niyu su egkaamin ma te egkeen te talangas. 
Egpamula kew te me paras wey egtangguwen niyu eg-ay-ayari, piru ware egkapupu niyu ne behas wey ware egkeinum niyu ne binu, su egkaamin ma te me uled-uled te egketket. 
Egpamula kew te masulug ne ulibu te minsan hendei diye te inged niyu, piru ware lana ne egkakuwa niyu, su egkengatahak man de iya ka me behas kayi te kene pad egkeyinuhan. 
Egmakaanak kew te me lukes wey malitan, piru kene sikandan egmekeugpe duma kaniyu su egpandakepen ma sikandan. 
Egpangeenen te talangas ka me dewun te kayu wey me pinamula niyu. 
“Ne egmasulug e ka me lapu ne egpangugpe duma kaniyu, piru egdeisek kew e mule. 
Sikandan ka egpasambey kaniyu, piru ware mule egpasambayan niyu kandan; sikandan e ka egmandu kaniyu. 
“Ke kene niyu egtumanen ka me suhu wey ka me tulumanen te Magbebaye ne Manama niyu ne ingkahi ku kaniyu, egpakasalerep kew te seini se langun ne dilus taman te egkammatey kew. 
Ne ka seini ne me dilus, egkeyimu ne tuus wey me paney-paney ne ware egtamanan para kaniyu wey te me kabuhalan niyu. 
Impanalanginan kew te Magbebaye ne Manama niyu, piru ware kahale niyu te pegpamakey kandin. 
Purisu igbehey kew te Manama diye te me kuntere niyu, wey egtanggu kew e kandan. Ne egmanggutasan kew, egkammaraan, wey egkallebasan, piru ware egkeyimu niyu. Egbaybayaran kew te me kuntere niyu taman te egkammatey kew. 
Egpalusuran kew te Magbebaye ne Manama te lein ne keet-etawan ne egpuun pad te mariyu ne nasud, wey kene niyu egkasabut se linalahan. Eglusuran kew nikandan iling te agila ne egdagmang; 
mabbulut sikandan wey kene egkeyid‑u minsan te me buyag wey te me bate. 
Eg-aminen dan egpangua ka langun ne ayam niyu, wey egpangeenen dan ka uma te me pinamula niyu taman te egkammatey kew te gutas. 
Egpanlusuran dan ka langun ne siyudad ne imbehey kaniyu te Magbebaye ne Manama niyu taman te egkallundus ka insalihan niyu ne me matikang wey makepal ne alad ne me batu. 
“Ke eglingutan e te me kuntere ka me lungsud niyu, egpanggutasan kew e wey egpangeenen niyud ka me anak niyu ne imbehey kaniyu te Magbebaye ne Manama niyu. 
Ne minsan ka etew ne hiimenawen amana, kenad e egbehey te egkakeen te suled din, te asawa rin, wey te nenasame ne anak din; 
kenad sikandin egpamehey te duma rin te sapu te ingkeen din ne anak din, su egkalaggew man e sikandin ke egkaaminan te langun-langun. Sika ka egkeyitabu ke eglingutan e te me kuntere ka me lungsud niyu. 
Ne ka malitan ne due te kaniyu ne amana ne meupiya wey matanggutanggu ne warad iya miggipanew diye te tane ne ware sandal, egpalelehed e degma ke eglingutan e te me kuntere ka me lungsud din. Ne minsan ka anak din ne sikan pad miglesut lagkes ka inulunan, egkeenen din e te heles de su egkaaldek man e sikandin ke egkaaminan te langun-langun. 
“Ke kene niyu egtumanen te mapahetpet ka langun ne Balaud ne nasulat te seini ne baseen, wey ke kene niyu egtahuren ka matulus wey mabantug ne ngaran te Magbebaye ne Manama niyu, 
eglegparan kew nikandin wey ka me kabuhalan niyu te makaalat-halat ne me karereetan pinaahi te me dalu ne kene egkabawian; 
igpaneem-neem din kaniyu ka makaalat-halat ne dalu ne impasalerep din te me Ihiptuhanen, wey kene kew en iya egkeulian. 
Igpaneem-neem kaniyu te Magbebaye ne Manama ka langun ne dalu, minsan pad ka duma ne klasi te dalu ne ware naapil nasulat te seini ne baseen te Balaud, taman te egkammatey kew. 
Minsan pad iling kew kasulug te me bituen te langit, deisek naan de ka egkeuyag kaniyu, su ware niyu ma tumana ka Magbebaye ne Manama niyu. 
Ne iling te dengan ne ingkahale te Magbebaye ne Manama ka pegpamatubung wey pegpamasulug kaniyu, igkahale din degma ka pegdereet wey peggimatey kaniyu taman te egkengaawe kew e diye te tane ne eggendiyaan niyu. 
“Ig-empet kew te Magbebaye ne Manama diye te langun ne nasud te intiru ne kalibutan. Ne diye, egsimba kew e te me manama ne kayu wey me batu; me manama ne ware niyu re due neileyi wey te me kaap-apuan niyu. 
Ne ware kalinaw niyu diye wey ware egkeyimelayan. Ne egtuhutan te Magbebaye ne Manama ne iyan niyu re ugpe ka egkabantalan, egkalaggew, wey egkaawaan te pegpallateng. 
Ne layun kew re egpakasalerep te me karereetan—aldew wey marusilem iyan niyu re ugpe ka egkabantalan wey ware kasihuruwan. 
Ne tenged te kaaldek niyu te egkengakita niyu tagse maselem, egpakakahi kew te, ‘Meupiya perem ke marusilem pad kuntee,’ wey emun ke marusilem, egpakakahi kew te, ‘Meupiya perem ke maselem pad kuntee.’ 
Ne igpalibed kew te Magbebaye ne Manama diye te Ihiptu ne igmeuntud te me barku, minsan ke migsaad e sikandin kaniyu ne kene din e igtuhut ne egpakalibed kew pad diye. Ne igmamelegye niyud ka pegkeetew niyu diye te me kuntere niyu isip me uripen, piru ware egbeli kaniyu.”