Diyuturunumiyu.
32.
“Sikaniyu langun se due te langit wey sikaniyu langun se due te ampew te tane, pammineg kew te eglalahen ku. 
Egpanihis perem iling te uran ne egbisbis te me pinamula, wey iling te demmug diye te me sagbet, ka me lalag ku. 
Igpangguhud ku ka ngaran te Magbebaye ne Manama ta, wey egdayanen ku ka kabantug din! 
Sikandin ka batu ne aputanan ku, su matareng ma ka langun ne paahi rin. Matinumanen sikandin ne Manama; matulus wey matareng. 
Piru migsupak kew kandin, wey kene kew ne eleg ne eg-isipen ne me anak din tenged te maddeet ne hinimuwan niyu. Kene kew ne matinumanen ne me etew! 
Mareet iya ka batasan niyu diye te tangkaan te Magbebaye ne Manama! Me ungel kew iya wey kene egmanulik. Sikandin ka amey niyu ne miggimu kaniyu wey migpasasindeg kaniyu isip sabeka ne nasud. 
Sumsumana niyu ka nanlihad ne me leg‑un; ka me timpu te masulug ne me kabuhalan. Ne panginse kew te me igdatu wey te me pangulu niyu meyitenged kayi su igpasabut dan seini kaniyu. 
Te timpu ne impamehey te Amana ne Mabantug ne Manama ka tane diye te me nasud, wey te timpu ne immeglein-lein din ka me etew, impanahuan din seini te me eletanan sumale te kasuluhan te me kabuhalan ni Israil. 
Ne in-alam te Magbebaye ne Manama ka me kabuhalan ni Hakub isip kandin mismu ne keet-etawan. 
Nakita rin ka me kabuhalan ni Hakub diye te disirtu ne warad iya pinamula ne egtubu, wey intanggu rin sikandan wey intamengan iling te pegtanggu rin te kandin mismu ne pegkeetew. 
Egpekeiling ka Magbebaye ne Manama te agila ne migbebantey te me pispis din, taheed te egpanuluen din te eglayang. Andam layun sikandin ne egbekad te me pakpak din te pegsalu wey peg-uyan kandan. 
Ka Magbebaye ne Manama re ka migpangulu te keet-etawan din, wey ware lein ne manama ne migbulig kandin. 
Impabaye din ka me kabuhalan ni Israil te me bubungan, wey impakeen din kandan ka uma te me kamet, wey impeinum din kandan ka teneb ne egpuun te pahang. Ne miglambeg de due ka me ulibu ran diye te tane ne batuwen. 
Ne imbehayan din sikandan te me kisu ne egpuun te me baka, wey gatas te me karniru wey kambing ne mallambeg ne egpuun te Basan. Impamehayan din man‑e sikandan te memeupiya ne trigu, wey impeinum din te mannanam ne binu. 
Migmallambeg wey migmanderakel ka me kabuhalan ni Israil, piru neneyimu sikandan ne masinupaken. In-engkeran dan ka Manama ne miggimu kandan; indali-dian dan ka mabantug ne migluwas kandan. 
Inhanggat dan ka pegkatalikuren wey ka langet te Manama pinaahi te pegsimba ran te lein ne me manama wey tenged te maddeet ne hinimuwan dan. 
Migmanubad sikandan diye te me busew wey kene ne diye te Manama; sikan dan pad neileyi ka seini ne me manama— me manama ne ware simbaa te me kaap-apuan dan. 
Nalingawan dan ka batu ne aputanan dan ne iyan ka Manama ne migbehey te umul ran. 
Nakita seini te Magbebaye ne Manama wey tenged te langet din, in-engkeran din ka me anak din. 
Ne migkahi sikandin, ‘Eg-inniyuhan ku sikandan, wey egpipitawen ku re ke nekey ka egtamanan dan, wey kene ku egbulihan, su me ungel ma sikandan ne me kabuhalan, wey masinupaken ne me anak. 
Inhanggat dan ka pegkatalikuren ku pinaahi te pegsimba ran te lein ne me manama, wey nalangetan a kandan tenged te me diyus-diyus dan. Purisu eggimuwen ku degma sikandan ne egkabbelu te lein ne keet-etawan, wey egpeim-immeen ku pinaahi te pegpanalangin ku te nasud ne ungel. 
Egkanlabkanlab ka langet ku iling te hapuy ne egpakasilab taman te inged te me minatey; egpakasilab seini te tane wey te langun ne eg-uma, wey te pabunsuranan te me bubungan. 
Egpasalerepen ku sikandan te me karereetan; ig-amin ku igpane kandan ka me tunud ku. 
Ne egmagguye e sikandan tenged te gutas wey lusung, wey egkammatey e tenged te mangune-kune ne dalu. Ne egpalusuran ku sikandan te leew ne me mananap, wey igmakahat ku te egmanggilu ne uled. 
Ne masulug ka egkammatey diye te lihawangan te me baley ran tenged te gira. Ne ka diye te me sinabeng, iyan egdapit ka liyas; egkammatey ka me kanakan, me mengebay, me bate ne egsusu pad, wey ka me buyag e. 
Nakakahi a te egmegsusuwayen ku sikandan diye te maddiyu ne inged taman te warad egpakasuman-suman kandan kayi te kalibutan. 
Piru migsuman-suman a ne kema ke egpeggasal ka me kuntere dan wey egkahi te, “Ware dereeti te Magbebaye ne Manama ka Israil. Sikanami ka nakarereet kayi pinaahi te keseg ney mismu!” ’” 
Ne migpabulus-bulus si Muwisis ka migkahi, “Sabeka ne nasud ka me kabuhalan ni Israil ne kene egpatambag wey kene egpakasabut. 
Ke me matagseb pa perem sikandan, egpakasabut perem sikandan ke nekey ka egkatamanan dan te mewuri ne me aldew. 
Egkatalu te sabeka ne sundalu te kuntere ka sabeka ne libu (1,000) ne sundalu te me kabuhalan ni Israil, wey egkatalu te daruwa ne kuntere ka sapulu ne libu (10,000) ne me kabuhalan ni Israil, su in-engkeran man‑e sikandan te Maresen ne Manama ne talagpangabang dan, wey intuhutan din e ne egkatalu sikandan te me kuntere dan. 
Ka batu ne aputanan te me kuntere ta, kene ne iling te Batu ne aputanan ta, wey minsan sikandan nakataha kayi. 
Ka me kuntere ta ne maddeet se hinimuwan iling te me matig-Suduma wey Gumura, iyan dan egkeilingan ka paras ne mapeit se behas wey eggilu; 
egpekeiling te lalas te uled ne egpakapatey ka binu ran. 
Piru inlista te Magbebaye ne Manama ka me sale dan, wey intines din pad seini diye te tinesanan din, wey migtahad pad sikandin te eleg ne timpu te pegparusa kandan. 
Ne migkahi ka Magbebaye ne Manama, ‘Sikeddi ka egsuli wey egparusa; mahaan e egginguma ka timpu ne egpakarugsu sikandan, wey egpakasalerep te me karereetan, wey sahuhune ne egkammatey sikandan.’ 
Eggukum ka Magbebaye ne Manama lapig te keet-etawan din, wey egkeyimenawan sikandin te me suluhuanen din ke egkakita rin ne warad keseg dan, wey ke deisek naan de ka egkasame kandan; uripen ma wey se kene ne uripen. 
Ne eg-inse ka Magbebaye ne Manama te keet-etawan din, ‘Hendeid naan e ka me diyus-diyus dan; ka batu ne aputanan dan; 
ka me manama ran ne migkeen te me tabe te immanubad dan, wey mig-inum te halad dan ne me binu? Egpakabulig wey ke egpakabantey naa kaniyu seeye ne me manama? 
Tengteng kew, sikeddi de iya ka Manama wey warad lein. Sikeddi ka eggimatey wey sikeddi ka eg-uyag; sikeddi ka egpali wey sikeddi ka egbawi. Ne ware egpakapangabang te minsan hentew ne egparusaan ku. 
Ne isip Manama ne ware kapatayan, egkayawen ku ka belad ku diye te langit wey igsaad ku, 
ne egkamangeen kud ka kampilan ku, wey eggamiten ku seini te peggukum, wey te pegsuli te me kuntere ku ne migdumut keddi. 
Egpanulayas ka langesa ran te me tunud ku wey egpanadtaren te kampilan ku ka me lawa ran. Ne ware egpakapallahuy lagkes ka nenapalian wey ka naddakep, wey egpanamperen ka ulu te me pangulu ran.’” 
Ne migkahi si Muwisis, “Deyraya niyu keet-etawan te langun ne nasud ka keet-etawan te Manama, su egsulian din iya ka migpangimatey te me suluhuanen din; egsulian din ka me kuntere din, wey eglinisan din e man‑e ka tane din wey egpasayluwen din ka me etew te me sale dan.” 
In-ulahing seeye ni Muwisis wey ni Huswi ne anak ni Nun eyew egkarineg te me kabuhalan ni Israil. 
Te nekeimpus e si Muwisis ka egpangguhud te me panulu te Manama diye te keet-etawan, 
ingkahiyan din e sikandan, “Tantanuri niyu naa layun ka langun ne ingguhud ku kaniyu kuntee ne aldew. Ne ipanulu niyu degma seini te me anak niyu eyew egtumanen dan te mapahetpet ka langun ne lalag te seini ne balaud. 
Ka me lalag te seini ne balaud, kene ne lerew re due; seini ka egpakabehey kaniyu te malayat ne umul ke egtumanen niyu seini diye te tane ne eg-angkenen niyu, ne diye te talipag te Hurdan.” 
Te sikan ded ne aldew, ingkahiyan te Magbebaye ne Manama si Muwisis, 
“Takereg ka diye te Bubungan ne Abarim te inged te Muwab ne egkatalipag te Hiriku, wey pamantawa nu ka inged te Kanaan ne igbehey ku te me kabuhalan ni Israil eyew egkaangken dan. 
Ne diye ka egpatey te seeye ne bubungan iling te suled nu ne si Aarun ne migpatey diye te Bubungan ne Hur, wey insabal, 
su ware kew ma migparuma-ruma keddiey se daruwa wey ware niyu tahura ka pegkamatulus ku diye te tangkaan te me kabuhalan ni Israil, te diye kew pad te weyig te Miriba ne diye te disirtu, diye te Sin ne marani te Kadis. 
Purisu tibbal ke re egpakapamantew te tane ne igbehey ku te me kabuhalan ni Israil, piru kene ka egpekeendiye.”