Huswi.
3.
Te seup ne aldew, migselem-selem mig-enew ensi Huswi wey ka langun ne me kabuhalan ni Israil wey migligkat e sikandan puun te Sitim. Ne miggendiyad e sikandan te Weyig ne Hurdan wey migkekampu sikandan diye, te ware pad sikandan miglapas. 
Te peglihad te tatelu ne aldew, inleug-leug te me pangulu te kabuhalan ni Israil ka kampu, 
wey ingkahiyan dan ka me etew, “Emun ke egkakita niyu ka me talagpanubad ne me kabuhalan ni Libi ne migyayung te Tahuanan te Kasabutan te Magbebaye ne Manama niyu, hipanew kew e wey sinundul kew kandan 
eyew egkatahaan niyu ke hendei kew egbaye su ware kew re due nakabaye kayi ne dalan. Piru diyu-diyu kew re te Tahuanan te Kasabutan te me sabeka ne kilumitru.” 
Ne ingkahiyan ni Huswi ka me etew, “Matulusa niyu ka pegkeetew niyu, su eggimu kaaselem ka Magbebaye ne Manama te kein-inuwan para kaniyu.” 
Ne ingkahiyan degma ni Huswi ka me talagpanubad, “Uyana niyu ka Tahuanan te Kasabutan wey hun‑a kew te me etew.” Sikan naa ka in-uyan dan e seini wey miggun‑a sikandan te me etew. 
Ne ingkahiyan te Magbebaye ne Manama si Huswi, “Tenged te eggimuwen ku kuntee ne aldew, egbantuhen ka te langun ne me kabuhalan ni Israil wey egkanengnengan dan ne indumaan ku sikeykew iling te pegduma ku ki Muwisis. 
Kahii nu ka me talagpanubad ne migyayung te Tahuanan te Kasabutan, ‘Emun ke egpakariek kew e langun diye te Weyig ne Hurdan, diye kew pa sesasindeg.’” 
Purisu ingkahiyan ni Huswi ka me kabuhalan ni Israil, “Hendini kew wey pammineg kew te inlalag te Magbebaye ne Manama niyu. 
Egkatahaan niyu kuntee ne egdumaan kew te manekal ne Manama. Te peglusud niyu, egdeldelen din iya ka me Kanaanen, me Hitihanen, me Hibihanen, me Pirisihanen, me Girgasihanen, me Amurihanen, wey me Hibusihanen. 
Ne iyan niyu ipewun‑a ipalapas te Weyig ne Hurdan ka egyayung te Tahuanan te Kasabutan te Magbebaye ne Manama ne egmandu te intiru ne kalibutan. 
Purisu kuntee, alam kew te sapulu wey daruwa (12) ne etew, tigsalimbeka puun te tagse tribu te Israil. 
Te timpu ne egpakariek e te weyig ka me talagpanubad ne egyayung te Tahuanan te Kasabutan te Magbebaye ne Manama te intiru ne kalibutan, egsanggel e ka weyig. Ne ka diye te diraya ne weyig, egkasubung e.” 
Sikan naa ka nangawe e ka me etew diye te me balungbalung dan su eglapas e sikandan te Hurdan. Miggun‑a kandan ka me talagpanubad ne migyayung te Tahuanan te Kasabutan. Tinggaani seeye ne timpu, wey migbaggiyu ka Hurdan. Te pegginguma te me talagpanubad ne migyayung te Tahuanan te Kasabutan diye te weyig, miglapas e sikandan 
wey sahuhune ne migsanggel ka weyig. Ne diye nasubung ka weyig te siyudad te Adam ne marani te Saritan. Ne warad degma weyig ne nakaleus diye te Namatey ne Dahat. Seeye naa ka nakalapas ka me etew diye te marani te Hiriku. 
Ne diye migmanasindeg te elat te Weyig ne Hurdan ne migmammare e ka me talagpanubad ne migyayung te Tahuanan te Kasabutan, taheed te miglapas ka me kabuhalan ni Israil. Ne ware mig-awe ka talagpanubad taman te naamin e nakalapas ka langun ne etew.