Huswi.
4.
Te nakalapas e te Weyig ne Hurdan ka langun ne me kabuhalan ni Israil, ingkahiyan te Magbebaye ne Manama si Huswi, 
“Alam ka te sapulu wey daruwa (12) ne etew, tigsalimbeka puun te tagse tribu te Israil. 
Ne suhua nu sikandan ne eg-angey te sapulu wey daruwa (12) ne batu diye te taliware te Hurdan, diye te lenged te nasasindehan te me talagpanubad. Ipeuyan nu seini diye te inged ne egkampuwan niyu kangkuwa te marusilem.” 
Purisu, mig-alam si Huswi te tigsalimbeka puun te tagse tribu te Israil. Ne impeumew rin ka sapulu wey daruwa (12) ne me etew. 
Ingkahiyan din sikandan, “Hendiye kew te elat te Hurdan, diye te tangkaan te nalengeran te Tahuanan te Kasabutan te Magbebaye ne Manama niyu. Angey kew te tigsalimbeka ne batu wey tianga niyu seini, tigsalimbeka re ne batu te tagse tribu te Israil. 
Ka seini ne me batu, egkeyimu ne limlimuan te inggimu te Magbebaye ne Manama. Emun ke eg-inse kaniyu ka me anak niyu keureme ke nekey ka igpasabut te seini ne me batu, 
kahii niyu sikandan te migsanggel ka Weyig ne Hurdan te timpu ne impalapas ka Tahuanan te Kasabutan te Magbebaye ne Manama. Seini ne me batu, limlimuan te me kabuhalan ni Israil te ware egtamanan.” 
Ne intuman te sapulu wey daruwa (12) ne etew ka insuhu ni Huswi kandan sumale te inlalag te Magbebaye ne Manama ki Huswi. Mig-angey sikandan te sapulu wey daruwa (12) ne batu diye te elat te Hurdan, tigsalimbeka tagse tribu te Israil. Ne in-uyan dan seini diye te inged ne ingkekampuwan dan wey intahu dan seini diye. 
Migtahu degma si Huswi te sapulu wey daruwa (12) ne batu diye te elat te Hurdan, diye te nalengeran te me talagpanubad ne migyayung te Tahuanan te Kasabutan. Minsan kuntee diye ded ka seeye ne me batu. 
Migpabulus migsasindeg ka me talagpanubad ne migyayung te Tahuanan te Kasabutan diye te elat te Weyig ne Hurdan taman te neimpusan e ka langun ne impeyimu te Magbebaye ne Manama ki Huswi pinaahi ki Muwisis. Ne migdagdahew e miglapas ka me etew. 
Te nakalapas e ka langun ne etew, impalapas e degma ka Tahuanan te Kasabutan te Magbebaye ne Manama. Ne miggun-e e man‑e ka me talagpanubad te keet-etawan. 
Ne miggun‑a miglapas ka me kabuhalan ni Rubin, ni Gad, wey katenge te me kabuhalan ni Manasis ne kumplitu te panganiban wey andam ne egpakiggira sumale te insuhu ni Muwisis kandan. 
Migginguma ka me lukes ne andam ne egpakiggira ne hep‑at ne pulu ne libu (40,000), wey migdumaan sikandan te Magbebaye ne Manama te pegbaye dan diye te napu ne marani te Hiriku. 
Te seeye ne aldew, impabantug te Magbebaye ne Manama si Huswi diye te langun ne me kabuhalan ni Israil. Intahud sikandin te me etew te intiru ne umul rin iling te pegtahud te me etew ki Muwisis. 
Ne ingkahiyan te Magbebaye ne Manama si Huswi, 
“Kahii nu ka me talagpanubad ne migyayung te Tahuanan te Kasabutan ne eggakap e sikandan te Weyig ne Hurdan.” 
Purisu impahakap din e te Hurdan ka me talagpanubad. 
Te nakahakap e te weyig ka me talagpanubad ne migyayung te Tahuanan te Kasabutan, migduu e man‑e ka weyig iling te an-anayan. 
Miglapas ka me kabuhalan ni Israil diye te Hurdan te igkasapulu ne aldew te an-anayan ne bulan. Ne nangekampu sikandan diye te Gilgal ne lenged te Hiriku ne diye dapit te igsile. 
Ne diye itahu ni Huswi ka sapulu wey daruwa (12) ne batu ne impaangey rin diye te Hurdan. 
Ne ingkahiyan ni Huswi ka me kabuhalan ni Israil, “Emun ke eg-inse kaniyu ka me anak niyu keureme ke nekey ka igpasabut te seini ne me batu, 
kahii niyu sikandan, ‘Neetiyan ka Weyig ne Hurdan te peglapas te me kabuhalan ni Israil.’ 
Su impeetiyan te Magbebaye ne Manama niyu ka Weyig ne Hurdan taman te nakalapas key e, iling te peg-eti rin dengan te Malalab ne Dahat taman te nakalapas key e langun. 
Inggimu rin seini eyew eg-ileen sikandin te langun ne etew te kalibutan ne maresen iya sikandin, wey eyew egtahuren niyu sikandin ne Manama niyu te ware egtamanan.”