Huswi.
8.
Ne migkahiyan te Magbebaye ne Manama si Huswi, “Kene ka kaaldek wey ke egmahuye naa. Dumaa nu ka langun ne sundalu nu wey lusuri niyu abeyi ka Ay, su igbehey kud e kaniyu ka Hari te Ay, wey ka me etew rin, ka siyudad din, wey ka me inged din. 
Himuwa niyu diye te Ay wey te Hari dutu, ka iling te inggimu niyu diye te Hiriku wey te Hari diye. Piru te seini ne timpu, egkaayun e ne egpanguen niyud ka me kasangkapan dan wey ka me ayam dan. Andam kew wey tigkawa niyu sikandan lusuri, ne diye kew baye te liyu te siyudad.” 
Sikan naa ka migpangandam si Huswi wey ka me sundalu rin ne eglusud te Ay. Mig-alam si Huswi te tatelu ne pulu ne libu (30,000) ne me bahani, wey impeyipanew rin sikandan te marusilem. 
Ne seini ka impanaha-taha rin kandan, “Heles kew diye te liyu te siyudad, piru kene kew re amana pariyu. Ne pangandam kew layun ne eglusud te minsan nekey ne uras. 
Ne sikeddi wey ka duma ku ne me sundalu, eglusud diye te tangkaan te siyudad. Ne emun ke eglihawang e sikandan ka egkuntere kanami, egpallahuy key iling te an-anayan ne peglusud ta kandan. 
Ne kahiyen dan e ne naaldek key kandan iling te an-anayan. Sikan naa ka egtalukunan key e nikandan taman te egpakapariyu e sikandan te siyudad. 
Ne lihawang kew naan e diye te inggelesan niyu wey lusuri niyud ka siyudad, su imbehey e seini kaniyu te Magbebaye ne Manama niyu. 
Emun ke egkaahew niyud ka siyudad, silabi niyu seini sumale te insuhu te Magbebaye ne Manama. Tumana niyu seini se insuhu ku kaniyu.” 
Purisu, impeendiyad e sikandan ni Huswi, wey nangeles sikandan diye te lenged te Ay, diye dapit te iglineb, diye seini te elat-elat te Ay wey Bitil. Ne migpalunggaat de mule si Huswi wey ka me duma rin diye te kampu ran te seeye ne marusilem. 
Te napawe e, migselem-selem mig-enew si Huswi wey inlibulung din ka me sundalu rin. Ne iyan migpangulu si Huswi wey ka me igdatu te Israil te peggendiye dan te Ay. 
Ne nekeuma sikandan diye te inged ne egpakatangke te siyudad te Ay, wey diyad sikandan migkekampu. Diye seini te igkahibang ne balabahan te siyudad. Ne due bangalug ne nakataliware kandan wey te Ay. 
Ne duen e impewun‑a ni Huswi ne lalimma ne libu (5,000) ne sundalu ne impeeles din diye dapit te iglineb te siyudad, diye seini te elat-elat te Ay wey Bitil. 
Iling kayi ka pegteil ni Huswi te me sundalu: ka masulug ne me sundalu diye te lenged te siyudad, te igkahibang ne balabahan, wey ka impeeles diye lenged te peka te siyudad, dapit te iglineb. Te marusilem e, miggendiye si Huswi wey ka me duma rin diye te napu. 
Te pegkakita te Hari te Ay te me kabuhalan ni Israil, migdagdahew sikandin miglihawang wey ka langun ne sundalu rin te siyudad te pegkamaselem. Ne miggendiye sikandan te inged ne egpakapantew te napu te Hurdan eyew egpakiggira te me kabuhalan ni Israil. Ware sikandan nakataha ne duen bes eglusud kandan ne egpuun diye te liyu te siyudad. 
Ne miglilibat si Huswi wey ka langun ne me bahani rin ne ubag kun natalu sikandan, wey namallahuy sikandan diye te disirtu. 
Purisu migtalukunan sikandan te langun ne lukes te Ay taman te nakapariyu e sikandan te siyudad. 
Ne puun su naamin langun migtalukun te me kabuhalan ni Israil ka me lukes te Ay, sikan naa ka ware dan e nalekebi ka siyudad. 
Ne ingkahiyan te Magbebaye ne Manama si Huswi, “Itinuru nu ka deldeg nu diye te Ay, su igbehey kud seini kaniyu.” Sikan naa ka intinuru e ni Huswi ka deldeg din diye te Ay. 
Te pegtinuru ni Huswi te deldeg din, nanlihawang e ka me etew rin diye te inggelesan dan. Ne inlusuran dan e ka siyudad wey migdagdahawan dan seini te egsilab. 
Miglilingey ka me matig-Ay, wey nakita ran ne mig-eebel e ka siyudad dan. Ne dutu, warad egkapallahuyan dan su migpalilibed man‑e diye te kandan ka me kabuhalan ni Israil ne immanalukunan dan diye te disirtu. 
Su nakita ni Huswi wey te me etew ne migduma kandin ne nakalasud e ka me duma ran diye te siyudad, wey nasilaban dan e seini. Sikan naa ka migpalilibed e sikandan wey impangimatayan dan ka me matig-Ay. 
Ne nanlihawang e seeye se me kabuhalan ni Israil ne miglasud te siyudad wey migbulig sikandan migpangimatey te me matig-Ay. Nalingutan dan ka me matig-Ay wey impangimatayan dan langun, wey warad iya nakapallahuy wey ke nasame naa. 
Piru in-uyag dan ka Hari te Ay, wey in-uyan dan diye ki Huswi. 
Te naamin e neyimatayi te me kabuhalan ni Israil ka langun ne matig-Ay ne miglupug kandan diye te me kamet wey diye te disirtu, miglibed e sikandan diye te siyudad wey impangimatayan dan ka langun ne nasame diye. 
Te seeye ne aldew, naamin neyimatayi ka langun ne matig-Ay—migginguma ka langun ne me lukes wey me malitan te sapulu wey daruwa ne libu (12,000). 
Ne migpabulus si Huswi ka migtinuru te deldeg din diye te Ay taman te neyimatayan e ka langun ne mahinged diye. 
Ne impanguwa te me kabuhalan ni Israil ka me ayam, wey me kasangkapan puun te siyudad sumale te insuhu te Magbebaye ne Manama ki Huswi. 
Ne insilaban ni Huswi ka Ay wey warad seini nabalbalawi napasasindeg. Ne minsan kuntee warad mig-ugpe diye. 
Ne inggimatayan ni Huswi ka Hari te Ay wey imbitin diye te kayu wey imbalahad din diye taman te naapunan. Te egkasagkup e, impaangey e ni Huswi ka minatey wey imparegpak din diye te lihawangan te gumawan te siyudad. Ne imbunbunan dan e seini te me batu, wey minsan kuntee egkakita red diye ka me batu. 
Ne miggimu si Huswi te altar diye te bubungan te Ibal para te Magbebaye ne Manama te Israil. 
Inggimu rin seeye tenged te suhu ni Muwisis ne suluhuanen te Magbebaye ne Manama diye te me kabuhalan ni Israil ne nasulat te libru te Balaud ni Muwisis ne miggenendue, “Himuwi a te altar ne inggimu puun te batu ne ware nasapsapi te minsan nekey ne putew.” Ne diye te ampew te sika ne altar, migpanubad sikandan te igpanubad para te keupianan diye te Magbebaye ne Manama. 
Ne diye te tangkaan te me kabuhalan ni Israil, in-ikul sulata ni Huswi diye te me batu ka Balaud ne insulat ni Muwisis. 
Ka langun ne me kabuhalan ni Israil duma te igdatu dan, me upisyal ran, me talewukum dan wey ka seeye se me lapu ne mig-ugpe duma kandan, migsasindeg ne migpatangkeey. Nabaad sikandan te daruwa ne punduk, wey egkeinniyuhan te senge-punduk ka bubungan te Girisim, wey ka sabeka ne punduk, egkeinniyuhan dan ka Ibal. Ne diye te taliware dan migsasindeg ka me talagpanubad ne kabuhalan ni Aarun ne migyayung te Tahuanan te Kasabutan te Magbebaye ne Manama. Naluhey e isuhu ni Muwisis ne suluhuanen te Manama, ne eggimuwen dan seeye eyew te pegdawat te panalangin dan. 
Ne imbasa ni Huswi te meemen ka intiru ne Libru te Balaud, lagkes ka me panalangin wey ka me dilus ne nasulat. 
Imbasa rin te tigsalimbeka ka me suhu ni Muwisis diye te tangkaan te me kabuhalan ni Israil, me malitan, me bate, wey te seeye se me lapu ne mig-ugpe duma kandan.