Huswi.
12.
Ne nasakup e te me kabuhalan ni Israil ka me inged diye te igsile te Hurdan, bunsud seini te bangalug te Arnun peendiye te Bubungan ne Hirmun, nalagkes e kayi ka inged diye te igsile te Araba. Ne seini ka me Hari te seeye ne me inged ne natalu te me kabuhalan ni Israil: Si Sihun ne Hari te me Amurihanen ne mig-ugpe diye te Hisbun. Nasakup te migharian din ka katenge te Gilyad, bunsud seini te Aruwir ne dangdang te bangalug te Armun wey bunsud te taliware te bangalug taman diye te Weyig te Habuk, ka eletanan te me Amunihanen. 
Nasakup din pad man‑e ka diye te igsile te bangalug te Hurdan, bunsud te Lanew te Galiliya peendiye te Bit-Hisimut taman diye te igsile te Namatey ne Dahat, wey peendiye te igkakawanan ne balabahan te Bubungan ne Pisga. 
Ne si Ug ne Hari te Basan ka igkarangeb ne natalu te me kabuhalan ni Israil. Sikandin dengan ka nasame te kabuhalan ni Ripaim ne mig-ugpe diye te Astarut wey te Idrii. 
Ne nasakup te migharian din ka Bubungan ne Hirmun, Silika, intiru ne Basan peendiye te eletanan te Gisur wey te Maaka, wey ka katenge te Gilyad taman diye te eletanan te Hisbun ne migharian ni Sihun. 
Ne natalu sikandan te me kabuhalan ni Israil wey ni Muwisis ne suluhuanen te Magbebaye ne Manama. Ne imbehey ni Muwisis ka inged dan diye te me kabuhalan ni Rubin, ni Gad, wey katenge te me kabuhalan ni Manasis eyew egkakandan e. 
Ne nasakup degma ni Huswi wey te me kabuhalan ni Israil ka inged diye te iglineb te Weyig ne Hurdan, bunsud seeye te Baal-Gad diye te napu te Libanun taman diye te Bubungan ne Halak peendiye te Siir. Ne imbehey ni Huswi ka inged diye te me kabuhalan ni Israil eyew egkakandan e. Imbaad-baad din seeye diye te tagse tribu. Nalagkes te seeye ne inged ka me bubungan, me napu diye te iglineb, ka bangalug te Hurdan, ka kalandihan te me bubungan, ka disirtu, wey ka inged te Nigib. Sika ne me inged ka nangugpaan dengan te me Hitihanen, me Amurihanen, me Kanaanen, me Pirisihanen, me Hibihanen, wey me Hibusihanen. Ne seini ka me Hari te seeye ne me inged ne natalu ni Huswi wey te me kabuhalan ni Israil: 
ka Hari te Hiriku, ka Hari te Ay ne marani te Bitil, 
ka Hari te Hirusalim, ka Hari te Hibrun, 
ka Hari te Harmut, ka Hari te Lakis, 
ka Hari te Iglun, ka Hari te Gisir, 
ka Hari te Dibir, ka Hari te Gidir, 
ka Hari te Hurma, ka Hari te Arad, 
ka Hari te Libna, ka Hari te Adulam, 
ka Hari te Makida, ka Hari te Bitil, 
ka Hari te Tapuwa, ka Hari te Hipir, 
ka Hari te Apik, ka Hari te Lasarun, 
ka Hari te Madun, ka Hari te Hasur, 
ka Hari te Simrun-Mirun, ka Hari te Aksap, 
ka Hari te Taanak, ka Hari te Migidu, 
ka Hari te Kadis, ka Hari te Hukni-Am ne diye te Karmil, 
ka Hari te Dur ne diye te ilis te dahat, ka Hari te Guyim ne diye te Galiliya, 
wey ka Hari te Tirsa. Migginguma ka langun ne Hari te tatelu ne pulu wey sabeka (31).