Huswi.
13.
Ne hengkayi te egkabuyag e si Huswi, ingkahiyan sikandin te Magbebaye ne Manama, “Buyag kad amana kuntee wey maluag pad ka inged ne eg-ahawen. 
Seini ka me inged ne eg-ahawen pad: ka intiru ne inged te me Pilistihanen wey te me Gisurihanen, 
ne sakup te inged te me Kanaanen. Puun seini te Weyig ne Sihur peendiye te igsile te Ihiptu, taman diye te eletanan te Ikrun diye te igkahibang ne balabahan. Ne lagkes ka lalimma ne siyudad te me Pilistihanen: ka Gasa, ka Asdud, ka Askilun, ka Gat, wey ka Ikrun, lagkes ka inged te me Abihanen, 
ka diye te igkakawanan ne balabahan; ka intiru ne inged te me Kanaanen bunsud te Miyara ne iyan kamuney dengan ka me Sidunihanen taman diye te Apik ne eletanan te inged te me Amurihanen; 
ka inged degma te me Gibalihanen; wey ka intiru ne Libanun peendiye te igsile, bunsud te Baal-Gad ne diye te lenlen te Bubungan ne Hirmun taman diye te Libu-Hamat. 
Lagkes degma ka me bubungan bunsud te Libanun peendiye te Misriput-Maim ne iyan kamuney ka me Sidunihanen. Egdeldelen ku ka me mahinged te seeye ne me inged te timpu ne eglusuran niyu sikandan. Ba-baara nu ka seini ne me inged diye te me kabuhalan ni Israil isip karatuan ne inggaat kandan sumale te insuhu ku keykew. 
Ba-baara nu ka seini ne inged diye te siyam ne tribu wey diye te katenge te me kabuhalan ni Manasis isip karatuan ne inggaat kandan.” 
Ne ka me kabuhalan ni Rubin, Gad, wey katenge te me kabuhalan ni Manasis, imbehayan e ni Muwisis ne suluhuanen te Magbebaye ne Manama te karatuan ne inggaat kandan diye te igsile te Weyig ne Hurdan. 
Migbunsud ka inged dan diye te Aruwir ne dangdang te bangalug te Arnun, nalagkes e kayi ka siyudad ne diye te taliware te bangalug, peendiye seini te napu te Midiba taman diye te Dibun. 
Nalagkes e degma ka langun ne me siyudad ni Sihun ne Amurihanen ne mighari diye te Hisbun, diye taman seini te eletanan te me Amunihanen. 
Nalagkes degma ka Gilyad wey ka tane ne in-ugpaan te me Gisur wey te me Maaka, ka intiru ne bubungan te Hirmun, wey ka intiru ne Basan taman te Salika. 
Nalagkes man‑e ka intiru ne migharian ni Ug ne Hari te Astarut wey te Idrii. Si Ug iyan naan de nasame te me Ripaimhanen. Natalu sikandan enni Muwisis wey indeldel sikandan diye te inged dan. 
Piru ware deldela te me kabuhalan ni Israil ka me Gisur wey ka me Maaka, purisu minsan kuntee miglemung ded sikandan mig-ugpe te me kabuhalan ni Israil. 
Piru ware behayi ni Muwisis ka me kabuhalan ni Libi te karatuan ne inggaat kandan. Ka igpanubad de ne egtutungen diye te Magbebaye ne Manama te Israil, ka igbehey kandan isip karatuan ne inggaat kandan sumale te insuhu te Magbebaye ne Manama ki Muwisis. 
Ne impamaaran ni Muwisis te inged ka me pamilya te me kabuhalan ni Rubin isip karatuan ne inggaat kandan. 
Migbunsud ka inged dan te Aruwir ne dangdang te bangalug te Arnun, nalagkes e kayi ka siyudad ne diye te taliware te bangalug, taman seeye te intiru ne napu te Midiba. 
Nalagkes degma kayi ka Hisbun wey ka langun ne me siyudad diye te napu ne iyan ka Dibun, ka Bamut-Baal, ka Bit-Baal-Miyun, 
ka Hahas, ka Kidimut, ka Mipaat, 
ka Kiryataim, ka Sibma, ka Sirit-Sahar ne diye te labuntud te napu, 
ka Bit-Piyur, ka me kalandihan te Bubungan ne Pisga, ka Bit-Hisimut, 
ka langun ne me siyudad diye te napu, wey ka langun ne siyudad ne migmanduan ni Sihun ne Hari te Amurihanen ne diye migmandu te Hisbun. Natalu sikandin ni Muwisis wey ka me Hari te Midiyan ne si Ibi, si Rikim, si Sur, si Hur, wey si Riba; me pangulu sikandan langun te inged ne migmanduan ni Hari Sihun. 
Ne lagkes degma te inggimatayan te me kabuhalan ni Israil ka egpanagne ne si Balaam ne anak ni Biyur. 
Ne iyan eletanan te me kabuhalan ni Rubin ka Weyig ne Hurdan. Ne seeye ka me siyudad wey ka me lungsud ne karatuan ne inggaat te me kabuhalan ni Rubin, wey imbaad-baad dan seini diye te tagse pamilya ran. 
Ne impamaaran ni Muwisis te inged ka me pamilya te me kabuhalan ni Gad isip karatuan ne inggaat kandan. 
Ne nalagkes te inged dan ka Hasir, ka langun ne siyudad te Gilyad, wey ka katenge ne inged te me Amunihanen taman diye te Aruwir ne diye dapit te igsile te Raba. 
Nalagkes degma ka inged ne egbunsud te Hisbun peendiye te Ramat-Mispi wey Bitunim, wey bunsud te Mahanaim taman diye te Ludibir. 
Nalagkes degma ka inged diye te bangalug te Hurdan ne iyan ka Bit-Haran, ka Bit-Nimra, ka Sukut, ka Sapun, wey ka nasame ne migharian ni Sihun ne Hari te Hisbun. Ne ka eletanan diye te iglineb iyan ka Weyig ne Hurdan peendiye te Lanew ne Galiliya. 
Seeye ka me siyudad wey ka me lungsud ne inggaat ne karatuan te me kabuhalan ni Gad wey imbaad-baad dan seini diye te tagse pamilya ran. 
Ne imbaaran degma ni Muwisis te inged ka me pamilya ne katenge te me kabuhalan ni Manasis. 
Ne migbunsud ka inged dan te Mahanaim lagkes ka intiru ne Basan, ka intiru ne migharian ni Ug ne Hari te Basan, wey ka hen‑em ne pulu (60) ne me siyudad te Hair ne sakup te Basan. 
Nalagkes kayi ka katenge te Gilyad, ka me siyudad te Astarut wey Idrii ne migharian ni Ug diye te Basan. Imbehey seini diye te me pamilya te katenge te me kabuhalan ni Makir ne anak ni Manasis. 
Seeye ka pegbaad-baad ni Muwisis te tane ne diye te igsile te Hiriku wey te Hurdan. Ne ka pegbaad-baad te tane neyitabu diye te kanapnapuan te Muwab. 
Piru ware behayi ni Muwisis ka me kabuhalan ni Libi te tane isip karatuan ne inggaat kandan. Ingkahiyan din sikandan te iyan dan karatuan ne inggaat ka baad te me ighalad te me kabuhalan ni Israil diye Magbebaye ne Manama te Israil.