Huswi.
14.
Iling kayi ka pegbaad-baad te inged te me Kanaanen diye te me kabuhalan ni Israil isip karatuan ne inggaat kandan. Si Ilyasar ne talagpanubad, si Huswi ne anak ni Nun, wey ka me pangulu te me pamilya te tagse tribu te Israil ka migbaad-baad. 
Nabaad-baad seeye diye te siyam wey te katenge te me tribu pinaahi te pegpintut-pintut su sika ka insuhu te Magbebaye ne Manama ki Muwisis. 
Nabehayan e ni Muwisis ka daruwa ne tribu wey tenge isip karatuan ne inggaat kandan diye te igsile te Weyig ne Hurdan. 
(Ka me kabuhalan ni Husi, nabaad te daruwa ne me kabuhalan: me kabuhalan ni Manasis wey me kabuhalan ni Ipraim.) Ne ware nabaari ka me Libita te tane ne kandan degma ne baad, piru nabaaran ded sikandan te me siyudad ne eg-ugpaan dan wey panabtaban para te me ayam dan. 
Iling dutu ka pegbaad-baad te inged diye te me kabuhalan ni Israil sumale te insuhu te Magbebaye ne Manama ki Muwisis. 
Ne nangendiye ki Huswi diye te Gilgal ka duma ne me etew ne me kabuhalan ni Huda. Ne si Kalib ka sabeka kandan, anak sikandin ni Hipuni ne Kinisihanen. Ne ingkahiyan ni Kalib si Huswi, “Ware nu naan ded nalingawi ka ingkahi te Magbebaye ne Manama diye ki Muwisis ne suluhuanen te Manama meyitenged keykew wey keddi te diye ki pad te Kadis-Barniya? 
Hep‑at pad ne pulu (40) ka idad ku te insuhu a ni Muwisis ne suluhuanen te Magbebaye ne Manama puun te Kadis-Barniya eyew egsisilib te seini ne inged. Te peg-uli kud e, ingguhuran kud e iya sikandin ke nekey ka nakita ku. 
Piru ingginaaldek te me duma ku ne nanduma keddiey ka keet-etawan. Ne sikeddi mule, migmatinumanen a ne mig-ikul te Magbebaye ne Manama ku. 
Purisu, migsaaran a ni Muwisis te seeye ne aldew. Migkahi sikandin, ‘Tenged su migmatinumanen ka ne mig-ikul te Magbebaye ne Manama ku, sikeykew wey ka me kabuhalan nu iyan egpakakamuney te inged ne nabayaan nu te pegsisilib.’ 
Ne miglihad e ka hep‑at ne pulu wey lalimma (45) ne leg‑un te ingkahi seeye te Magbebaye ne Manama ki Muwisis. Te seeye ne timpu, nangipanew pad ka me kabuhalan ni Israil diye te disirtu. Ne kuntee, walu e ne pulu wey lalimma (85) ka idad ku, wey in-uyag e pad te Magbebaye ne Manama. 
Piru ka kanekal ku kuntee, iling pad te seeye te timpu ne insuhu a ni Muwisis. Duen pad kanekal ku te egpakiggira wey te peggimu te minsan nekey iling te dengan. 
Sikan naa ka ibehey nu keddi ka me bubungan ne insaad dengan keddi te Magbebaye ne Manama. Narineg nu dengan ne diye nangugpe ka me Anakanhen te me siyudad ne in-alad te matikang wey makepal ne batu. Piru pinaahi te bulig te Magbebaye ne Manama, egdeldelen ku sikandan te seeye ne inged sumale te insaad keddi te Magbebaye ne Manama.” 
Ne impanalanginan ni Huswi si Kalib ne anak ni Hipuni, wey imbehey e kandin ka inged te Hibrun isip karatuan ne inggaat kandin. 
Purisu minsan kuntee, naangken ded te me kabuhalan ni Kalib ne anak ni Hipuni ne Kinisihanen ka inged te Hibrun, tenged su matinumanen amana si Kalib te Magbebaye ne Manama, ka Manama te Israil. 
Te seeye ne timpu, iyan ngaran te inged te Hibrun ka Kiryat-Arba, isip eglimlimuan ki Arba, ka mabantug te me kabuhalan te Anakanhen. Te seeye ne timpu, neengked e ka gubut te seeye ne inged.