Huswi.
22.
Ne inlibulung ni Huswi ka me kabuhalan ni Rubin, Gad, wey katenge te me kabuhalan ni Manasis. 
Ne ingkahiyan sikandan ni Huswi, “Inggimu niyu ka langun ne insuhu kaniyu ni Muwisis ne suluhuanen te Magbebaye ne Manama, wey intuman niyu degma ka langun ne insuhu ku kaniyu. 
Ne minsan kuntee, ware niyu engkeri ka me duma niyu ne me kabuhalan ni Israil. Maayad-ayad kew ne migtuman te me suhu kaniyu te Magbebaye ne Manama niyu. 
Ne kuntee, nakarawat e ka me duma niyu ne me kabuhalan ni Israil te keupianan ne insaad kandan te Magbebaye ne Manama. Sikan naa, uli kew e diye te inged niyu ne diye te talipag te Hurdan ne imbehey kaniyu ni Muwisis ne suluhuanen te Magbebaye ne Manama. 
Piru kene niyu kalingawi te egtuman ka insuhu kaniyu wey ka impanulu kaniyu ni Muwisis ne suluhuanen te Magbebaye ne Manama: geyinawei niyu ka Magbebaye ne Manama niyu, tumana niyu ka igkeupii rin, wey ka me suhu din. Keilangan ne matinumanen kew kandin, wey pamakaya niyu sikandin te mapahetpet.” 
Nataman, impanalanginan e sikandan ni Huswi wey impeuli e. 
(Imbehey ni Muwisis ka inged ne diye te Basan te seeye se katenge te me kabuhalan ni Manasis, wey imbehey degma ni Huswi diye te dangeb ne katenge te kabuhalan ni Manasis wey te duma ne tribu ka inged ne diye te iglineb te Hurdan.) Impanalanginan sikandan ni Huswi te peg-uli dan e. 
Migkahi sikandin, “Eg-uli kew ne matubung amana: masulug se me ayam, pelata, bulawan, burunsi, putew, wey me manggad. Ne baari niyu ka me karumaan niyu diye te kaniyu te minsan nekey ne naahew niyu diye te me kuntere niyu.” 
Sikan naa ka nanguli e ka me kabuhalan ni Rubin, Gad, wey katenge te kabuhalan ni Manasis. In-engkeran dan ka me karumaan dan ne me kabuhalan ni Israil diye te Silu ne sakup te inged te Kanaan, wey miglibed e sikandan diye te Gilyad, ka tane ne naangken dan sumale te suhu te Magbebaye ne Manama pinaahi ki Muwisis. 
Te nekeume e ka me kabuhalan ni Rubin, Gad, wey katenge te kabuhalan ni Manasis diye te Gililut ne marani te Hurdan, miggimu sikandan te dakel ne altar. Ka seini ne inged sakup pad te Kanaan. 
Te nanengnengan te duma ne me kabuhalan ni Israil ne miggimu sikandan te altar diye te Gililut ne marani te Weyig ne Hurdan ne eletanan te Kanaan, miglibulung sikandan diye te Silu eyew egpakiggira kandan. 
Ne impeendiye te me kabuhalan ni Israil si Pinihas ne anak ni Ilyasar ne talagpanubad diye te Gilyad te me kabuhalan ni Rubin, Gad, wey katenge te kabuhalan ni Manasis. 
Indumaan si Pinihas te sapulu ne pangulu te tagse kabuhalan te Israil. Ka tagse sabeka kandan, me pangulu te tagse me pamilya te me kabuhalan dan. 
Te pegginguma ran diye te Gilyad, ingkahiyan dan e ka me kabuhalan ni Rubin, Gad, wey katenge te me kabuhalan ni Manasis, 
“Ka intiru ne keet-etawan te Magbebaye ne Manama egkeupian ne egpakataha ke mania te in-akalan niyu ka Manama te Israil. Insupak niyu ka Magbebaye ne Manama pinaahi te peggimu niyu te altar para kaniyu. Ware niyud ikula sikandin. 
Kene naan pad ne eleg ka sale ne neyimu ta diye te Piyur? Tenged dutu, inlegparan ki te Magbebaye ne Manama wey minsan kuntee mig-antus ki re due. 
Ne kuntee, eg-inniyuhan niyud man‑e ka Magbebaye ne Manama! Ke egsupak kew pad man‑e kandin kuntee, egkalangetan sikandin kaaselem te langun ne kabuhalan ni Israil. 
Sikan naa, emun ke keilangan niyu ka altar tenged su kene ne likes ne egsimbaan ka inged niyu, hendiye kew naan de kanami, diye te inged te Magbebaye ne Manama ne due Matulus ne Balungbalung ne In-alad, wey egpekeugpe kew diye. Kene kew re iya himu te lein ne altar angin e te altar te Magbebaye ne Manama ta. 
Sumsumana niyu si Akan ne anak ni Sira ne ware migtuman te suhu meyitenged te me kasangkapan ne nakahalad e wey nakapanubad e langun diye te Magbebaye ne Manama. Inlegparan sikandin wey ka langun ne kabuhalan ni Israil. Kene ne si Akan de ka napatey tenged te sale din.” 
Ne migtabak ka me kabuhalan ni Rubin, Gad, wey katenge te kabuhalan ni Manasis te seeye se me pangulu te me pamilya te Israil, 
kahi ran, “Ka Magbebaye ne Manama, Amana ne Maresen ne Manama! Ka Magbebaye, Amana ne Maresen ne Manama! Nakataha sikandin ke mania te inggimu ney seini, wey keilangan degma ne egkatahaan niyu seini. Emun ke malehet ne migsupak key te Magbebaye ne Manama, wey ke mig-inniyug key kandin, himatayi key e nikaniyu te seini ne aldew. 
Ne emun ke insupak ney ka Magbebaye ne Manama pinaahi te peggimu ney te altar ney mismu ne para egtutungan te me igpanubad, egkakeen ne egpuun te egketuen ne pinamula ne halad, wey ke me igpanubad para te meupiya ne rilasyun te Magbebaye ne Manama, eglegparan key perem te Magbebaye ne Manama. 
Inggimu ney re seini tenged su naaldek key ne kema ke egginguma ka timpu ne ka me kabuhalan niyu egkahi te me kabuhalan ney, ‘Nekey‑a ka labet niyu te Magbebaye ne Manama te Israil? 
Inggimu te Magbebaye ne Manama ne eletanan ta ka Hurdan te pegpasuwey kaniyu puun kanami. Ne ware labet niyu se me kabuhalan ni Rubin wey Gad te Magbebaye ne Manama.’ Ne kema ke egkenaan e te me kabuhalan niyu ka me kabuhalan ney ne egsimba te Magbebaye ne Manama. 
Sikan naa ka miggimu key te altar, kene ne eyew egtutungan, wey ke eghalaran naa te me halad ney, 
ke kene, eyew limlimuan para kanami, para kaniyu, wey para te me kabuhalan, ne egsimba key iya te Magbebaye ne Manama diye te balungbalung pinaahi te pegtutung te me igpanubad, me igpanubad para te meupiya ne rilasyun, wey te duma pad ne me halad. Purisu, te egginguma ne timpu, kene egpakakahi ka me kabuhalan niyu diye te me kabuhalan ney ne ware labet dan te Magbebaye ne Manama. 
Ne emun ke egkamalehet ne egkahiyan dan ka me kabuhalan ney te iling due, egpakakahi sikandan te, ‘Tengtengi niyu! Miggimu ka me kaap-apuan ney te altar ne iling te altar te Magbebaye ne Manama, kene ne egtutungan wey ke eghalaran naa te me halad, ke kene, eyew due limlimuan para kanami wey kaniyu.’ 
Kene ney egkeyimu ne egsupak wey ke eg-inniyug te Magbebaye ne Manama pinaahi te peggimu te kanami ne altar ne para te egtutungan te me igpanubad, egkakeen ne egpuun te egketuen ne pinamula ne halad, wey duma pad ne me halad. Iyan de eghalaran ka altar te Magbebaye ne Manama ta ne diye nakatahu te balungbalung ne egsimbaan kandin.” 
Ne amana nahale si Pinihas ne talagpanubad wey ka me pangulu te me pamilya te me kabuhalan ni Israil te pegkarineg dan te ingkahi te me kabuhalan ni Rubin, Gad, wey katenge te kabuhalan ni Manasis. 
Sikan naa ka ingkahiyan ni Pinihas ne anak ni Ilyasar ne talagpanubad ka me kabuhalan ni Rubin, Gad, wey katenge te me kabuhalan ni Manasis, “Natahaan tad kuntee ne indumaan ki te Magbebaye ne Manama tenged te ware kew migsupak kandin. Inluwas niyu ka me kabuhalan ni Israil puun te legpad te Magbebaye ne Manama.” 
Ne nanguli e ensi Pinihas wey ka me pangulu diye te Kanaan, wey ingguhud dan te me karumaan dan ne me kabuhalan ni Israil ka neyingumaan dan ne guhud puun te me kabuhalan ni Rubin, wey ni Gad ne diye te Gilyad. 
Te narineg seini te me kabuhalan ni Israil, nahale sikandan wey indeyrey ran ka Manama. Ne warad sikandan migsuman-suman ne eglusud diye te inged ne nangugpaan te me kabuhalan ni Rubin wey Gad. 
Ne ingngaranan te me kabuhalan ni Rubin wey ni Gad ka altar te “Limlimuan” su migkahi sikandan, “Seini ka limlimuan ta langun te ka Magbebaye, iyan ka Manama ta.”