Talewukum.
2.
Ne puun te Gilgal, miggendiye ka panalihan te Magbebaye ne Manama te Bukim wey ingkahiyan ka me Israilita, “Impalihawang ku sikaniyu puun te Ihiptu, wey in-uyan ku sikaniyu diye te tane ne insaad ku ne igbehey te kaap-apuan niyu. Ne migkahi a, ‘Kene ku egbalbalawan ka kasabutan ku kaniyu. 
Ne kene kew himu te kasabutan te me mahinged te sika ne inged. Guhusa niyu ka me altar dan.’ Piru ware niyu tumana ka suhu ku. Mania te iling due ka inggimu niyu? 
Sikan naa ka egkahiyan ku sikaniyu kuntee te kene ku egdeldelen sikandan due te kaniyu. Egpekeiling sikandan te duhi diye te egbayaan niyu, wey egpakasahilut kaniyu ka me diyus-diyus dan.” 
Te nalalag e seeye te panalihan te Magbebaye ne Manama diye te langun ne Israilita, migpanaman-taman e sikandan migpaninehew. 
Ne ingngaranan dan ka seeye ne inged te Bukim, wey diyad e sikandan migpanubad te Magbebaye ne Manama. 
Te impeyipanew e ni Huswi ka me Israilita, miggendiyad e ka tagse kabuhalan te tane isip karatuan ne inggaat kandan eyew sikandan e ka egkamkamuney. 
Migpamakey te Magbebaye ne Manama ka me kabuhalan ni Israil te timpu ne neuyag pad si Huswi. Ne minsan te migpatey e si Huswi, migpabulus ded man‑e sikandan migpamakey te Magbebaye ne Manama taheed te neuyag pad ka me igbuyag dan ne nakakita te langun ne kein-inuwan ne inggimu te Magbebaye ne Manama diye te Israil. 
Ne migpatey ka suluhuanen te Magbebaye ne Manama ne si Huswi ne anak ni Nun, te mahatus wey sapulu (110) ne leg‑un ka idad din. 
Inlebeng dan sikandin diye te eletanan te tane ne imbehey kandin diye te Timnat-Hiris, ne diye te bubungan te Ipraim, ne egpakarapit te igkahibang ne balabahan ne dapit te igsile te bubungan te Gaas. 
Te migpatey e ka langun ne etew te seeye ne kabuhalan, warad nekeila te Magbebaye ne Manama ka nakasinundul ne kabuhalan ne ware kalintahaan te immangimu te Manama diye te Israil. 
Miggimu ka me Israilita te mareet diye te tangkaan te Magbebaye ne Manama wey migpamakey sikandan te me larawan ni Baal. 
In-engkeran dan ka Magbebaye ne Manama te kabuybuyahan dan ne iyan migpalihawang kandan puun te Ihiptu. Mig-ikul sikandan wey migsimba te me diyus-diyus te me etew ne nakalingut kandan; impeyibelu dan ka Magbebaye ne Manama. 
In-engkeran dan ka Magbebaye ne Manama, wey migpamakey e sikandan te me larawan te diyus-diyus ne si Baal wey Astarut. 
Ne tenged te nangebel-ebel ne langet te Magbebaye ne Manama te me Israilita, imbalahad din e sikandan ne egpanlusuran te me kuntere ne egpangahew te me karatuan dan. Intuhutan din e sikandan ne egkatalu te me kuntere ne nakalingut kandan, wey warad egpakapangabang kandan puun te me kuntere dan. 
Minsan hendei egpakiggira ka me kabuhalan ni Israil, egkatalu sikandan su imbalahad man e sikandan te Magbebaye ne Manama iling te impaney-paney rin kandan, wey impahunlibet din kandan. Sikan naa ka amana miglised sikandan. 
Ne mig-alam ka Magbebaye ne Manama te me pangulu, ne iyan egluwas kandan puun te seeye se egpangahew te me karatuan dan. 
Piru minsan pad due, ware sikandan migpammineg te me pangulu ran. Ware sikandan migmatinumanen te Manama wey nasi migsimba te me diyus-diyus. Kene sikandan ne iling te me kaap-apuan dan, tenged su mahaan de sikandan eg-inniyug te me suhu te Magbebaye ne Manama ne in-ikul dengan te me kaap-apuan dan. 
Indumaan te Magbebaye ne Manama ka langun ne pangulu ne in-alam din. Ne taheed te neuyag pad ka me pangulu ran, egluwasen din sikandan puun te me kuntere dan. Tenged su igkeyid‑u rin ka keet-etawan din ne egdeg-uy tenged te pegbayad-bayad wey te pegpanleig-leig kandan. 
Piru te timpu ne napatey e ka pangulu, miglibed e man‑e ka me etew te subla pad ne mareet ne hinimuwan dan ne iyan ka pegpamakey wey pegsimba te me diyus-diyus. Nasublaan dan pad ka sale te me kaap-apuan dan. Ne ware sikandan mig-engked ka miggimu te maddeet wey te pegpakehal ran te me ulu ran. 
Sikan naa ka nangebel-ebel ka langet te Magbebaye ne Manama te me Israilita. Migkahi sikandin, “Tenged su insupak te seini ne me keet-etawan ka kasabutan ne inggimu ku te me kaap-apuan dan, wey ware dan tumana ka me suhu ku, 
kene kud e igpariyu kandan ka me etew diye te inged ne ware nasakup ni Huswi te neuyag pad sikandin. 
Eggamiten ku sikandan eyew te peg-eleg-eleg te me Israilita, ke egtumanen dan naa ka me suhu ku iling te inggimu te me kaap-apuan dan.” 
Sikan naa ka intuhutan te Magbebaye ne Manama ne egpalunggehaat ka seeye ne me etew te seeye ne inged, ware din sikandan ga-gaani te egdeldel, wey ware din tuhuti ne egkatalu sikandan ni Huswi.