Talewukum.
3.
Inggaat te Magbebaye ne Manama ka seeye ne keet-etawan eyew te peg-eleg-eleg te seeye se langun ne Israilita ne ware pad nakaheram ne egpakiggira diye te Kanaan. 
Inggimu rin de seeye eyew egpanuluen ka me Israilita ne egkabasbas sikandan se ware pad nakaheram ne egpakiggira. 
Seini ka nasame ne keet-etawan: ka me Pilistihanen ne nangugpe te lalimma ne siyudad, ka langun ne Kanaanen, ka me Sidunihanen, ka me Hibihanen ne diye nangugpe te me bubungan te Libanun, puun de iya te bubungan te Baal-Hirmun taman diye te Libu-Hamat. 
Insame sikandan eyew ig-eleg-eleg te me Israilita te pegnengneng ke eg-ikulen dan naan ded ka me suhu ne impabehey te Magbebaye ne Manama ki Muwisis diye te me kaap-apuan dan. 
Su miglemung ma ka me Israilita te me Kanaanen, me Hitihanen, me Pirisihanen, me Hibihanen, wey te me Hibusihanen. 
Ne migmangasawa sikandan te me mengebay te duma ne me kabuhalan, wey impaasawa ran ka me mengebay ran te me kanakan te seeye ne me kabuhalan wey migpamakey e sikandan te me diyus-diyus dan. 
Ne miggimu ka me Israilita te mareet diye te tangkaan te Magbebaye ne Manama; imbalahad dan e sikandin, wey migpamakey e sikandan te me diyus-diyus ne me Baal wey me Asira. 
Purisu, nangebel-ebel ka langet te Magbebaye ne Manama diye te me Israilita, wey intuhutan din sikandan ne egkatalu ni Kusan-Risataim ne Hari te Misuputamya. Ne nasakup din ka me Israilita te walu ne leg‑un. 
Ne migpangananey ka me Israilita diye te Magbebaye ne Manama, wey mig-alam sikandin te etew ne egluwas kandan ne iyan si Utnil ne anak ni Kinis ne hari ni Kalib. 
Ne immanduan sikandin te Panisingan te Magbebaye ne Manama, wey neyimu sikandin ne pangulu te Israil. Ne migpakiggira sikandin ki Kusan-Risataim ne Hari te Misuputamya, wey impepanalu sikandan te Magbebaye ne Manama. 
Sikan naa ka ware samuk te Israil te hep‑at ne pulu (40) ne leg‑un. Ne nataman, migpatey e si Utnil ne anak ni Kinis. 
Ne miggimu ka me Israilita te mareet diye te tangkaan te Magbebaye ne Manama. Tenged te inggimu ran, impeuripen sikandan te Magbebaye ne Manama diye ki Iglun ne Hari te Muwab. 
Migpabulig si Iglun te me Amunihanen wey me Amalikanen. Ne inlusuran dan ka Israil wey natalu ran seini, wey naahew ran ka siyudad te me Palmira. 
Ne migtrabahu ka me Israilita para ki Iglun ne Hari te Muwab te sapulu wey walu (18) ne leg‑un. 
Ne migpangananey e man‑e ka me Israilita diye te Magbebaye ne Manama. Ne mig-alam sikandin te egluwas kandan ne iyan si Ihud, gibang sikandin wey anak ni Gira ne puun te kabuhalan ni Binhamin. Ne si Ihud naa ka egsugsuhuen te me Israilita ne egparulungen te buhis dan diye ki Iglun ne Hari te Muwab. 
Te ware pad migligkat si Ihud, migsayab pad sikandin te mahalang ne sundang ne liware te mitrus ka kalayat, wey inggiket din seini diye te kawanan ne bubun din ne nabunbunan te kumbale din. 
Ne in-uyan din e ka buhis diye ki Iglun ne Hari te Muwab. Lelambehi ne etew si Iglun. 
Te nakabehey e ni Ihud ka buhis, impeuli din e ka me etew ne duma rin ne mig-uyan te buhis. 
Migduma pad sikandin kandan, piru te diyad e sikandan te me larawan ne me batu ne marani te Gilgal, migpalilibed e si Ihud diye te Hari wey migkahi, “Mahal ne Hari, due igguhud ku keykew ne sikanta re.” Ne ingkahiyan te Hari ka me sinalihan din, “Awe kew pa.” Ne nanlihawang e ka langun ne sinalihan din. 
Taheed te migsabsabeka re ka Hari ne migpinpinnuu te sinabeng din ne diye te atep, migparani si Ihud kandin wey migkahi, “Due igguhud ku keykew ne migpuun te Manama.” Te egsasindeg e ka Hari, 
inggulabut e ni Ihud te gibang ne belad din ka mahalang ne sundang diye te kawanan ne bubun din, wey indugsu din e seini te getek te Hari. 
Naalep-alep ka sundang lagkes ka subeng wey mig-abas seini diye te peka te Hari wey nabukusan te tabe din. Ne warad seini baruta ni Ihud. 
Ne impanlekeban e ni Ihud ka me gumawan wey impamagulan din e seini, wey diyad sikandin migbaye te gumawan ne diye te liyu ka migpallahuy. 
Te nakaayun e sikandin, nangingume e ka me sinalihan te Hari wey nakita ran ne nalekeban ka me gumawan te sinabeng diye te dibabew, nakakahi sikandan, “Mig-indes bu re sikandin diye te liyuan din.” 
Migtetahad sikandan diye te lihawangan. Piru te nalingengen e sikandan ka egtetahad, nabantalan e sikandan su ware ma miglulukat ka Hari te me gumawan te sinabeng. Purisu, in-angey ran ka yabi wey impanlukatan dan e ka me gumawan. Ne iyan dan en iya nakita ka Hari dan ne nakabahed de diye te seeg ne napatey e. 
Ne taheed te natalehen sikandan, migpallahuy e si Ihud. Miglihad sikandin diye te liyu te me larawan ne me batu wey migpallahuy sikandin peendiye te inged ne Siira. 
Te miggingume e sikandin diye, imparahing din e ka trumpita diye te bubungan te Ipraim eyew te peg-umew te me Israilita. Ne migtupang e ka me Israilita puun te me bubungan, wey impanguluwan din sikandan. 
Ne migkahi sikandin, “Sinundul kew keddi! Su impepanalu kew e te Magbebaye ne Manama te me Muwabihanen ne me kuntere niyu.” Sikan naa ka migsinundul e sikandan kandin ka migpatupang wey naahew ran ka lapasanan te me Muwabihanen peendiye te Hurdan. Ne ware minsan sabeka ne impalapas dan dutu. 
Te seeye ne aldew, nakapatey sikandan te sapulu ne libu (10,000) ne me Muwabihanen ne neelin ne mannekal. Ne ware minsan sabeka ne etew ne nakapallahuy. 
Te seeye ded ne aldew, natalu te me Israilita ka me Muwabihanen, wey ware samuk te Israil te walu ne pulu (80) ne leg‑un. 
Ne due nakasinundul ki Ihud ne pangulu ne iyan si Samgar ne anak ni Anat. Inluwas din degma ka Israil puun te me Pilistihanen. Nakapatey sikandin te hen‑em ne gatus (600) ne me Pilistihanen ne iyan din de inggamit ka tuked ne ig-alew te baka.