Talewukum.
6.
Ne miggimu e man‑e ka me Israilita te mareet diye te tangkaan te Magbebaye ne Manama, sikan naa ka intuhutan sikandan te Magbebaye ne egkeuripen te matig-Midiyan te pitu ne leg‑un. 
Ne natalu te me matig-Midiyan ka me Israilita. Ne tenged due, diyad miggeles ka me Israilita te me bubungan wey diye te me sulung, wey diye te me inged ne egkeelesan. 
Ne emun ke egpamula ka me Israilita, egpanlusuran sikandan te me matig-Midiyan, me matig-Amalik, wey te seeye se nangugpe diye te igsile. 
Egmangekampu sikandan diye te Israil wey egdereetan dan ka me pinamula te me Israilita taman te Gasa. Ne egpanguen dan ka me karniru, me baka, wey me asnu wey ware egsameen dan ne keuyahan te me Israilita. 
Eglusud sikandan ne egpanguyan te me baka wey te me balungbalung dan. Amana ne masulug sikandan iling kasulug te me talangas. Kenad e degma egkaseel ka kasuluhan dan wey te me kamil ran. Purisu te pegginguma ran, impangahew ran e ka langun-langun de iya ne egpuun te tane. 
Ne amana miglised ka me Israilita tenged te me matig-Midiyan. Sikan naa ka migpangananey sikandan te Magbebaye ne Manama. 
Te migpangananey e ka me Israilita te Magbebaye ne Manama tenged te me matig-Midiyan, 
impeuyanan sikandan te Magbebaye te prupita eyew te peglalag kandan te seini, “Impaawe ku sikaniyu te pegkeuripen diye te Ihiptu. 
Inluwas ku sikaniyu puun te me matig-Ihiptu wey te langun ne migbayad-bayad kaniyu. Indeldel ku sikandan wey imbehey ku kaniyu ka tane dan. 
Ne ingkahiyan ku sikaniyu, ‘Sikeddiey ka Magbebaye ne Manama niyu, wey keilangan ne kene kew egsimba te me diyus-diyus te me Amurihanen ne iyan kamuney te tane ne in-ugpaan niyu kuntee. Piru ware kew migtuman keddi.’” 
Ne migginguma ka panalihan te Magbebaye ne Manama wey migpinnuu diye te diralem te uk ne kayu ne diye te Upra, ne iyan kamuney si Huwas ne kabuhalan ni Abisir. Ne due anak ni Huwas ne egngaranan ki Gidyun ne migdiriek te trigu diye te kelesanan te behas te paras, ne diye te migbangbangalug eyew kene sikandin egkiteen te me matig-Midiyan. 
Ne migpakita ka panalihan te Manama ki Gidyun wey migkahi, “Indumaan ka te Manama, mabulut ne bahani.” 
Ne migtabak si Gidyun, “Piru ahalen, emun ke indumaan key te Magbebaye ne Manama, mania te neyitabu seini langun kayi te kanami? Hendeid naan e ka kein-inuwan ne ingkahi ran meyitenged kandin ne migpaawe kun kandan puun te Ihiptu? Piru kuntee, imbalahad key te Manama wey intuhutan din ne egkatalu key te me matig-Midiyan.” 
Ne migtangke ka panalihan te Manama wey migkahi, “Hipanew ka wey ipapitew nu ka kabulut nu wey luwasa nu ka Israil puun te me matig-Midiyan. Sikeddi ka migsuhu keykew!” 
Ne migtabak si Gidyun, “Piru Magbebaye ne Manama, egmenuwen ku te egluwas ka Israil te egkaayu-ayu ma ka pamilya ku te intiru ne kabuhalan ni Manasis. Ne sikeddi ka egkaleig-leig te kanami ne pamilya!” 
Migtabak ka Magbebaye ne Manama, “Egkaluwas nu ka Israil su egdumaan ku sikeykew. Egguleen nu ka me matig-Midiyan ne iling de te miggimatey ka te sabeka ne etew.” 
Ne migtabak si Gidyun, “Emun ke malehet iya ne egdumaan a nikeykew, papitawa a te palinneu ne iyan pamalehet te sikeykew iya seini se Magbebaye ne Manama ka migpakiglalag keddi. 
Kene ke naan pa ubag awe kayi taman te egpakalibed a su eg-angey e pad te ighalad ku keykew.” Migtabak sikandin, “Egtetahad a kayi taman te egpakalibed ka.” 
Purisu, migdagdahew mig-uli si Gidyun diye te baley rin. Miggilutu sikandin te nati pad ne kambing, wey miggilutu sikandin te paan ne ware patulin ne puun te harina ne diye itahu te nihu. Ne intahu din te nihu ka sere wey intahu din te kuren ka sabew. Ne in-uyan din ka langun ne inggilutu din diye te panalihan ne diye te lenged te uk ne kayu. 
Ne migkahiyan sikandin te panalihan te Manama, “Iuntud nu kayi te batu ka sere wey ka paan ne ware patulin wey itisi nu seini te sabew.” Ne inggimu seeye ni Gidyun. 
Ne indagketan te panalihan te Magbebaye ne Manama te pupul te tuked din ka sere wey paan. Ne sahuhune ne due migsiha ne hapuy puun te batu wey natutung ka sere wey ka paan, wey naawe e ka panalihan te Magbebaye ne Manama. 
Te nakamaan-maan e si Gidyun ne panalihan bes seeye te Magbebaye ne Manama, migkahi sikandin, “Ekeyey Magbebaye ne Manama! Nakita ku ka panalihan nu wey nekegtangke key pad iya!” 
Piru ingkahiyan sikandin te Magbebaye ne Manama, “Ka keupianan egduma keykew! Kene ka kaaldek. Kene ka egpatey.” 
Ne miggimu si Gidyun te altar diye para te Magbebaye ne Manama wey ingngaranan din seini te, “Keupianan ka Magbebaye ne Manama.” Ne minsan kuntee, diye ded ka altar te Upra ne iyan kamuney ka me kabuhalan ni Abisir. 
Te seeye ne marusilem, ingkahiyan te Magbebaye ne Manama si Gidyun, “Kua nu ka igkarangeb ne turu ne baka te amey nu, ka baka ne pitu e ne leg‑un. Ne guhusa nu ka altar te amey nu ne para ki Baal, wey pelera nu ka diyus-diyus ne sungkaleg ne si Asira ne diye te dangdang te altar. 
Pegkeimpus, himu ka te meupiya ne altar kayi te ampew te bubungan para keddi te Magbebaye ne Manama nu, ay-ayari nu peg-ampawa ka me batu te altar. Ne ipanubad nu ka igkarangeb ne turu ne baka dutu ne altar wey iyan nu itemeg ka diyus-diyus ne sungkaleg ne si Asira.” 
Seeye naa, migduruma si Gidyun te sapulu ne suluhuanen din, wey intuman din ka ingkahi te Magbebaye ne Manama. Piru marusilem din seeye himuwa su naaldek sikandin te duma ne karumaan te pamilya te amey rin wey te me mahinged te lungsud. 
Te pegpangimata te me mahinged te lungsud te egkasi-si e ka kaliwaswasan, nakita ran ne nahuhus e ka altar ni Baal wey napeled e ka dangdang ne diyus-diyus ne sungkaleg ne si Asira. Ne dutu, duen e neyimu ne iyam ne altar ne due nasame ne intutung ne impanubad ne turu ne baka. 
Ne migmein-inseey sikandan, “Hentew‑a ka miggimu kayi?” Ne mig-ay-ayaran dan seeye te eg-ugsi-ugsi, wey nanengnengan dan ne iyan miggimu dutu si Gidyun ne anak ni Huwas. 
Ne migkahiyan dan si Huwas, “Ipalihawang nu ka anak nu. Eggimatayan ney sikandin su ingguhus din ka altar ni Baal wey impeled din ka manama ta ne sungkaleg ne si Asira.” 
Piru intabak ni Huwas ka me mabbulut ne me etew ne nakalingut kandin, “Mania te egpangabang kew ki Baal? Ka minsan hentew ne egpangabang kandin, eggimatayan te kene pad egkapawe. Ke malehet pa ne manama si Baal, nakasukul perem sikandin su altar din ma ka nahuhus.” 
Puun dutu ne aldew, inggenalan e si Gidyun ki Hirub-Baal, ne iyan igpasabut ka, “Egsukul ki Baal” su ingguhus din ma ka altar ni Baal. 
Ne miglibulung ka langun ne matig-Midiyan, me matig-Amalik, wey ka me keet-etawan ne egpuun te igsile. Miglapas sikandan diye te Weyig ne Hurdan, wey nangekampu diye te bangalug ne egngaranan te Hisril. 
Ne in-umaan si Gidyun te Panisingan te Magbebaye ne Manama. Imparahing din ka trumpita te pegpangumew te kabuhalan ni Abisir eyew egduma kandin. 
Migsuhu sikandin te seeye se egmahuhuren diye te intiru ne kabuhalan ni Manasis eyew te peg-inniyat kandan ne egduma kandin. Ne migsuhu man‑e sikandin te seeye se egmahuhuren diye te intiru ne kabuhalan ni Asir, ni Sabulun, wey ni Naptali. Ne migtakereg sikandan ka egduma ki Gidyun. 
Ne ingkahiyan ni Gidyun ka Manama, “Ke malehet iya ne eggamiten a nikeykew eyew te pegluwas te Israil sumale te insaad nu, 
pamaleheti nu naa ne malehet iya. Egtahu a te bulbul te karniru diye te diekanan te trigu. Ne emun ke egkaremmuhan ka bulbul ne mammara ka tane, ne egkatahaan ku ne egbulihan a iya nikeykew te egluwas te Israil sumale te insaad nu keddi.” 
Ne neyitabu iya ka igkeupii ni Gidyun. Migselem-selem si Gidyun ka mig-enew, wey inggulipisan din ka bulbul te karniru, wey napenu ka yahung te migtihis ne demmug. 
Ne ingkahiyan e man‑e ni Gidyun ka Manama, “Kene ka ubag keubil keddiey. Pahangyue e pa ubag te kasabeka ne eg-el-elehan te pad man‑e ka bulbul te karniru. Eg-ilingen tad man‑e kayi, himaraa nu ka bulbul wey empeta nu te demmug ka nakalingut ne tane.” 
Ne inggimu seeye te Manama te seeye ne marusilem. Iyan de mammara ka bulbul, piru nasubid te demmug ka tane ne nakalingut te bulbul.