Talewukum.
8.
Ne mig-inse ki Gidyun ka keet-etawan te Ipraim, “Mania te inggimu niyu seini kanami? Mania te ware key nikaniyu ipeumew te peggira niyu te me matig-Midiyan?” Amana ka pegsagsahukul dan ki Gidyun. 
Ne migtabak sikandin kandan, “Kene de egpakalepeng ka neyimu ku te neyimu niyu. Minsan ka deisek ne neyimu niyu kenad egkeilingan te neyimu te pamilya ku. 
Impatalu te Manama kaniyu ka me pangulu te matig-Midiyan ne si Urib wey si Siib. Na, nekey‑a ka neyimu ku ne egpakalepeng te neyimu niyu?” Te pegkarineg te keet-etawan te Ipraim te tabak ni Gidyun, nenabewu e ka langet dan. 
Ne miglapas si Gidyun diye te Weyig ne Hurdan duma te tatelu ne gatus (300) ne etew rin, wey minsan nenabeley e sikandan, migpabulus pad man‑e sikandan ka egpanlupug te me kuntere dan. 
Te pegginguma ran diye te lungsud te Sukut, mighangyu si Gidyun te me mahinged diye ne migkahi, “Behayi niyu ubag ka me sakup ku te egkakeen. Nenabeley e sikandan, wey egpabulus key pad ka egtalukun ki Siba wey ki Salmuna ne me Hari te Midiyan.” 
Piru migkahi ka me upisyal te Sukut, “Egbehayan ney re iya te paan ka me sakup nu ke narakep niyud si Siba wey Salmuna.” 
Ne migtabak si Gidyun, “Ke iling due, emun ke igpatalu e keddi te Magbebaye ne Manama si Siba wey si Salmuna, eglibed a kayi wey egpamarasan ku sikaniyu te duhi wey me sapinit ne puun te disirtu eyew egkalundisan kew.” 
Ne puun diye, migtakereg ensi Gidyun diye te Pinuil wey mighangyu e man‑e te mahinged diye, piru ka intabak dan iling ded te intabak te me etew ne diye te Sukut. 
Ne ingkahiyan din ka me etew te Pinuil, “Ke egpakalibed a kayi ne meupiya wey ware egkeyitabu keddi, egguhusen ku seini se titikangi ne baley niyu.” 
Te seeye ne timpu, diye si Siba wey si Salmuna te Karhur duma te me sundalu ran. Duen naan de sapulu wey lalimma ne libu (15,000) ne me sundalu ran ne egpuun te igsile ne migbulig kandan su me sabeka ne gatus wey daruwa ne pulu man e ne libu (120,000) ka nammatey. 
Ne migpabulus ensi Gidyun ka egtalukun te me kuntere dan, ne diye migbaye sikandan te lenged te ugpaan te me etew ne nangugpe te me balungbalung ne diye dapit te egkatangkaan te Nuba wey Hugbiha. Ne intigkew ran lusuri ka me kuntere dan. 
Ne namallahuy ensi Siba wey si Salmuna, piru inlupug sikandan ni Gidyun wey narakep din sikandan, wey nenewukag ka langun ne sundalu ran. 
Nataman, miglibed e ensi Gidyun ne anak ni Huwas puun te gira wey diye sikandan migbaye te takerehen te Hiris. 
Ne due narakep dan ne sabeka ne kanakan ne matig-Sukut, wey impasulat din te kanakan ka pitu ne pulu wey pitu (77) ne me upisyal wey me igbuyag te lungsud te Sukut. 
Ne miglibed e ensi Gidyun diye te Sukut wey migkahiyan din ka me upisyal, “Nasuman-suman niyu naan pad ka pegdali-di niyu keddi te pegkahi niyu, ‘Egbehayan ney re iya te paan ka me sakup nu ke narakep niyud si Siba wey Salmuna?’” 
Ne in-uyan ni Gidyun ka me igbuyag te lungsud, wey impamarasan din sikandan eyew egkapanulu. Me duhi wey me sapinit ka imbaras din kandan puun te disirtu. 
Ingguhus din degma ka titikangi ne baley diye te Pinuil, wey impangimatayan din ka me lukes te seeye ne lungsud. 
Nataman, mig-insaan din si Siba wey si Salmuna, “Mamenu ka me lukes ne impangimatayan niyu diye te Tabur?” Migtabak sikandan, “Egpekeiling sikandan keykew, ne egpekeiling te anak te Hari.” 
Ne migtabak si Gidyun, “Me suled ku sikandan, migpahibeey key pad iya te iney ney. Mengeyibet te Magbebaye ne Manama ne emun ke ware niyu sikandan pangimatayi, kene ku degma perem sikaniyu eggimatayan.” 
Ne migkahiyan din ka kinakakayan ne anak din ne egngaranan ki Hitir, “Himatayi nu sikandan!” Piru naaldek si Hitir su bate-bate pad sikandin, wey ware sikandin miggulabut te kampilan din. 
Ne migkahiyan si Gidyun ni Siba wey ni Salmuna, “Apas ka, sikeykew en iya himatey kanami su kene ne himu seini te bate.” Sikan naa ka inggimatayan e ni Gidyun si Siba wey si Salmuna wey impanguwa rin e ka me dayan-dayan diye te lieg te me kamil ran. 
Ne ingkahiyan si Gidyun te me Israilita, “Tenged su inluwas key ma nikeykew puun te me matig-Midiyan, sikeykew e wey ka me kabuhalan nu ka egpangulu kanami.” 
Migkahiyan sikandan ni Gidyun, “Kene ne sikeddi wey ka me kabuhalan ku ka egpangulu kaniyu, iyan de egpangulu kaniyu ka Magbebaye ne Manama.” 
Ne migkahiyan din pad man‑e sikandan, “Due ighangyu ku kaniyu, ibehey niyu keddi ka me eritis ne naahew niyu diye te me matig-Midiyan.” (Su due me eritis ne bulawan te me matig-Midiyan tenged su nabatasan dan nahud.) 
Ne migtabak sikandan, “Uya, igbehey ney keykew ka me eritis.” Ne migbelat sikandan te hinabel wey diye dan ipanahu ka nenaahew ran ne me eritis. 
Me daruwa ne pulu (20) ne kilu ka me eritis ne bulawan, ware pad labet te me dayan-dayan, me balieg ne bulawan, wey malugtem ne me manggad ne insaluub te me Hari te Midiyan wey te me dayan-dayan te lieg te me kamil ran. 
Ne inggimu ni Gidyun ne ipud ka me bulawan wey intahu din seini diye te Upra ne lungsud din. Piru insimba mule seeye te me Israilita wey seeye ka nakasahilut ki Gidyun wey te pamilya rin. 
Natalu te me Israilita ka me matig-Midiyan wey warad e migpakiggira kandan ka me matig-Midiyan. Ne ware samuk te Israil te hep‑at ne pulu (40) ne leg‑un, taheed te neuyag pad si Gidyun. 
Ne mig-uli e si Gidyun ne anak ni Huwas diye te baley rin wey diyad sikandin mig-uugpe. 
Due pitu ne pulu (70) ne me anak din ne me lukes tenged su masulug ka asawa rin. 
Due duwey rin ne diye mig-ugpe te Sikim wey due anak dan ne lukes, ne iyan ngaran si Abimilik. 
Nataman, migpatey e si Gidyun. Ne diye ded degma sikandin ilebeng te inlebengan te amey rin ne si Huwas diye te Upra ne inged te kabuhalan ni Abisir. 
Te migpatey re iya si Gidyun, warad migmatinumanen te Manama ka me Israilita, wey migsimbe e man‑e sikandan te me larawan ni Baal, wey inliwanan dan e ka Manama ki Baal-Birit wey iyan dan e insimba. 
Nalingawan dan e ka Magbebaye ne Manama ran, ne iyan migluwas kandan puun te langun ne me kuntere dan ne nakalingut kandan. 
Minsan meupiya ka neyimu ni Gidyun te Israil, piru warad iya meupiya ne impapitew ran te pamilya rin.