Talewukum.
9.
Ne miggendiye te Sikim si Abimilik ne anak ni Gidyun, diye te karumaan te iney rin wey ingkahiyan din sikandan, 
“Insei niyu ka langun ne me pangulu te Sikim ke nekey ka igkeupii ran: ka egpanguluwan sikandan te pitu ne pulu (70) ne anak ni Gidyun, wey ke sabeka re ne etew? Sumsumana niyu ne karumaan e pad iya nikaniyu.” 
Purisu migpakiglalag ka me karumaan ni Abimilik diye te langun ne me pangulu te Sikim. Ne mig-uyun ka me pangulu te Sikim ne eg-ikul ki Abimilik tenged su nakakahi sikandan, “Suled te ma sikandin.” 
Ne imbehayan dan si Abimilik te pitu ne pulu (70) ne pelata puun te baley te diyus-diyus dan ne si Baal-Birit. Ne inggamit seini ni Abimilik te egpamayad te me lalung wey talaggimu te samuk eyew eg-ikul kandin. 
Miggendiye si Abimilik te Upra ne ugpaan te amey rin, wey indumaan sikandin te me sundalu rin wey induma rin degma ka me suled din ne pitu ne pulu (70) diye te ampew te sabeka ne batu wey impangimatayan din sikandan langun diye. Piru nakapallahuy wey nekeeles si Hutam ka kinaariyan ne anak ni Gidyun. 
Ne miglibulung ka langun ne me pangulu te Sikim wey Bit-Milu diye te lenged te uk ne kayu ne marani te sungkaleg ne batu diye te Sikim eyew eggimuwen dan e ne Hari si Abimilik. 
Te pegkarineg dutu ni Hutam, migtakereg sikandin diye te puntul te bubungan te Girisim wey migpanguleyi, “Pammineg kew keddi me pangulu te Sikim eyew egpamminehen kew te Manama! 
Sabeka ne timpu, miglihawang ka me kayu ne eg-alam te eghari kandan. Migkahiyan dan ka kayu ne ulibu, ‘Sikeykew ka eghari kanami.’ 
Piru migtabak ka kayu ne ulibu, ‘Kene ku eg-inniyuhan ka lana ku ne inggamit te pegpabantug te me etew wey te me manama, eyew re eghari kaniyu.’ 
Ne migkahi ka me kayu diye te kayu ne iggira, ‘Sikeykew ka eghari kanami.’ 
Piru migtabak ka kayu ne iggira, ‘Kene ku eg-inniyuhan ka memeemis ne behas ku, eyew re eghari kaniyu.’ 
Ne migkahi ka me kayu diye te paras, ‘Sikeykew ka eghari kanami.’ 
Piru migtabak ka paras, ‘Kene ku eg-inniyuhan ka binu ku ne egpakapahale te me etew wey te me manama, eyew re eghari kaniyu.’ 
Te katammanan, migkahiyan te langun ne kayu ka sapinit, ‘Hengkayi ka wey sikeykew ka eghari kanami.’ 
Ne migtabak ka sapinit te me kayu, ‘Emun ke igkeupii niyu iya ne eghari a kaniyu, aput kew keddi eyew egkaralungan ku sikaniyu. Piru ke kene kew eg-aput keddi, egpalihawang a te hapuy ne eggugmas te kayu ne me sidar diye te Libanun.’” 
“Kuntee, meupiya naa wey eleg ka inggimu niyu ki Abimilik ne eggimuwen ne Hari? Ne ka sika se inggimu niyu, meupiya naa ki Gidyun wey te me pamilya rin? Insulian niyu naa ka meupiya ne neyimu rin kaniyu? 
Sumsumana niyu ne migpakiggira sikandin eyew egkapangabangan kew. Mig-antus sikandin ka egluwas kaniyu puun te me matig-Midiyan. 
Piru kuntee, migsukul kew te pamilya te amey ku. Inggule niyu te egpangimatey ka pitu ne pulu (70) ne anak din diye te sabeka re ne batu. Ne in-alam niyu si Abimilik ka anak te duwey ne uripen din ne malitan ne egkeyimu ne Hari te Sikim tenged su karumaan niyu sikandin. 
Emun ke sika ka intuuwan niyu ne igpakasuli niyu te keupiya ni Gidyun wey te pamilya rin, ipabulus niyud sika. Ne gale-gale kew duma ki Abimilik. 
Piru ke kene, egdereetan kew perem ni Abimilik se me pangulu te Sikim wey Bitmilu. Ne egkareetan degma perem si Abimilik!” 
Nataman, migpallahuy e si Hutam wey miglenus peendiye te Biir wey diyad sikandin mig-ugpe tenged su naaldek sikandin ki Abimilik ne suled din. 
Mighari si Abimilik te Israil te tatelu ne leg‑un. 
Ne immeg-uney e meg-eheta te Manama si Abimilik wey ka me pangulu te Sikim. Ne migsupak e ka me pangulu te Sikim ki Abimilik. 
Neyitabu seini eyew egkalegparan si Abimilik wey ka me pangulu te Sikim ne migbulig kandin ne egpangimatey te pitu ne pulu (70) ne anak ni Gidyun. 
Ne warad e neupii ki Abimilik ka me pangulu te Sikim. Ne migsuhu sikandan te me etew ne egpahepasen diye te me puntul te me bubungan, eyew egpepanulisen te langun ne egmanlihad diye. Ne nanengnengan seeye ni Abimilik. 
Ne due etew ne egngaranan ki Gaal ne anak ni Ibid ne miggendiye te Sikim ne migduma te me suled din. Ne ware nabantali ka me pangulu te Sikim kandan. 
Ne miggingume e ka timpu te pegpamupu te behas te paras wey immamupu te me pangulu te Sikim seini. Ne ingkeles dan seini wey migsahakeen sikandan diye te baley te diyus-diyus dan. Te egmangekeen e sikandan wey egmangiinum, indilus dan e si Abimilik. 
Ne migkahi si Gaal, “Si Abimilik, iyan din amey si Gidyun ne kene ta ne karumaan. Ne mania te egparuma-ruma ki kandin? Si Hamur ma mule ka amey ta kayi te Sikim, ne mania te iyan ta egpaharien si Abimilik kanta wey mania te egpalintutuu ki ki Sibul ne sinalihan din? 
Emun ke sikeddi ka pangulu niyu, egkatalu ta iya si Abimilik. Egkahiyan ku sikandin, ‘Timuli nu pa ka me sundalu nu eyew egmasalig kew, wey egpahireey ki.’” 
Te pegkarineg ni Sibul ne pangulu te lungsud te ingkahi ni Gaal ne anak ni Ibid, nangebel-ebel ka langet din. 
Sikan naa ka migsuhu sikandin te seeye se egmahuhuran peendiye ki Abimilik diye te Aruma eyew te pegkahi, “Bantey ka su kayi te Sikim si Gaal ne anak ni Ibid duma te me suled din wey imbanasalan dan ka me etew ne egsupak keykew. 
Purisu keilangan ne eggipanew ka duma te me etew nu wey gepas kew te marusilem diye te me kamet ne diye te lihawangan te siyudad. 
Te egkaliwaswas pad, selem-selem ka enew wey lusuri niyu ka siyudad. Emun ke eglihawang e si Gaal duma te me etew rin eyew egkuntere keykew, himuwa nud ka igkeupii nu ne eggimuwen kandan.” 
Purisu te sabeka ne marusilem, nangipanew si Abimilik wey ka langun ne me etew rin. Migpasuwayey sikandan te hep‑at ne punduk ne nanggepas diye te lihawangan te Sikim. 
Te maselem e, miglihawang si Gaal ne anak ni Ibid wey migsasindeg sikandin diye te gumawan te siyudad. Ne nanlihawang ensi Abimilik wey ka me etew rin diye te inggelesan dan. 
Te pegkakita ni Gaal kandan, migkahiyan din si Sibul, “Tengteng ka! Due me etew ne nanupang puun te me bubungan!” Migtabak si Sibul, “Me alung de sika te me bubungan, kene ne me etew.” 
Ne migkahi e man‑e si Gaal, “Pitew ka iya! Due me etew ne nanupang seeye te bangalug, wey due man‑e lein ne punduk ne egpuun diye te uk ne kayu te egpahehane.” 
Ne ingkahiyan ni Sibul sikandin, “Hendei naan e ka impeggasal nu ubag te pegkahi nu te hentew naan de iya si Abimilik ne eggimuwen ta ne pangulu? Seini iya ka me etew ne inlemetan nu! Ne lihawang ka wey pakigkuntere ka kandan.” 
Purisu, impanguluwan ni Gaal ka me pangulu te Sikim ne egpakigkuntere ki Abimilik. 
Piru natalu si Gaal ni Abimilik wey nakapallahuy sikandin. Indel-as sikandin ni Abimilik wey masulug ka me matig-Sikim ne nenakabahed ne tahapali, taman diye te bayaanan te gumawan te siyudad. 
Ne miglibed si Abimilik diye te Aruma. Ne indeldel ni Sibul si Gaal duma te me suled din eyew kenad egpekeugpe te Sikim. 
Te seup ne aldew, nahuhuran si Abimilik ne nangendiye ka me matig-Sikim te me kamet dan. 
Sikan naa ka induma rin ka me etew rin wey imbaad-baad din te tatelu ne punduk, wey nanggepas sikandan diye te me kamet. Te pegkakita ni Abimilik ne nanlihawang e ka me etew te siyudad, miglihawang e degma sikandin wey ka me duma rin diye te inggelesan dan wey impangimatayan dan ka me etew. 
Ne mig-apas si Abimilik wey ka punduk din ne egparani diye te gumawan te siyudad eyew egbantayan dan seini, wey kalihet degma ne impangimatayan te daruwa ne punduk ka langun ne diye te me kamet. 
Naapunan de iya si Abimilik ka migpakigkuntere te me mahinged te siyudad. Te katammanan, naahew rin seini wey impangimatayan din ka me etew. Ne ingguhus din ka siyudad wey impanaweran din te asin ka tane. 
Napasayuwan nahuhuri ka langun ne pangulu te Sikim te miglusuran sikandan, purisu nangeles sikandan diye te maresen ne sinabeng te baley ni Baal-Birit. 
Natahaan ni Abimilik ne diye nanlibulung te baley ne titikangi ka langun ne pangulu te Sikim. 
Purisu, induma rin ka me etew rin diye te bubungan te Salmun. Migkuwa sikandan te wasey wey migpannempug sikandan te me sugpang te kayu, impamagkes dan wey intiang dan e. Ne ingkahiyan din ka me etew rin ne duma rin, “Apas kew! Ilingi niyu ka eggimuwen ku.” 
Sikan naa ka mig-atul-atul sikandan migpanempug te me sugpang te kayu. Ne insinundul ran si Abimilik peendiye te siyudad wey intambu dan seini diye te selib te malig‑en ne sinabeng te baley wey insilaban dan seini. Seeye naa ka migpatey degma ka langun ne diye te baley ne titikangi; me sabeka ne libu (1,000) ka me lukes wey me malitan ka nammatey. 
Pegkeimpus dutu, miggipanew e ensi Abimilik eyew eglusuran dan ka Tibis, wey naahew ran ded man‑e seini. 
Piru due malig‑en ne baley ne titikangi ne in-aputan te langun ne etew diye te seled te siyudad. Miglelekeb sikandan wey migmamaneyik diye te atep te baley ne titikangi. 
Ne migparani si Abimilik ka egguhus te baley ne titikangi wey egsilaban din e perem seini. 
Piru due malitan ne mig-ulug te galingan ne batu te ulu ni Abimilik wey nabagbag ka pulu din. 
Te sikan de, in-umew rin e ka kanakan ne talag-uyan te panganiban din wey ingkahiyan din, “Hulabuta nu ka kampilan nu wey himatayi a su kena a egkeupian ne due egkahi te malitan de ka nakapatey keddiey.” Sikan naa ka insundang e sikandin te kanakan wey napatey e sikandin. 
Te pegkakita te me Israilita ne napatey e si Abimilik, nanguli e sikandan diye te ugpaan dan. 
Purisu, insulian ded te Manama si Abimilik te neyimu rin te amey rin su impangimatayan din ma ka pitu ne pulu (70) ne suled din. 
Inlegparan degma te Manama ka me matig-Sikim tenged te langun ne mareet ne inggimu ran. Purisu, natuman ka pegdilus kandan ni Hutam ne anak ni Gidyun.