Talewukum.
11.
Ne due mabulut ne bahani ne egngaranan ki Hipta ne matig-Gilyad. Iyan din amey si Gilyad piru iyan din iney ka malitan ne egpamelegye te lawa. 
Ne due duma ne anak ni Gilyad te asawa rin. Te nanulin e sikandan, indeldel dan e ka suled dan ne si Hipta wey ingkahiyan, “Ware baad nu te karatuan te amey ta su anak ke ma te egpamelegye te lawa.” 
Sikan naa ka migpariyu si Hipta te me suled din wey diyad sikandin mig-ugpe te inged te Tub. Nataman, due me etew ne me lalung ne miglibulung diye ki Hipta wey mig-ikul e kandin. 
Te ware naluhey, inggira te me Amunihanen ka me Israilita. 
Seeye naa, impaangey te me igbuyag te Gilyad si Hipta diye te inged te Tub. 
Migkahi sikandan, “Kuwa kid, sikeykew ka egpangulu kanami te egpakiggira te me Amunihanen.” 
Piru migtabak si Hipta, “Ware e bes naa dumuti nikaniyu wey ware e bes naa deldela nikaniyu puun te baley te amey ku? Ne kuntee te nasamuk kew e human kew pad egpabulig keddi?” 
Ne migtabak ka me igbuyag kandin, “Tenged su keilangan ney sikeykew. Ne emun ke egpangulu ka kanami te egpakiggira te me Amunihanen, eggimuwen ney sikeykew ne pangulu te Gilyad.” 
Ne migtabak si Hipta, “Emun ke egdumeen a nikaniyu eyew egpakiggira te me Amunihanen wey egpepanaluwen a te Magbebaye ne Manama, sikeddi naan en iya ka pangulu niyu?” 
Migtabak ka me igbuyag, “Uya, egtumanen ney ka ingkahi nu, wey iyan talagpamalehet kayi ka Magbebaye ne Manama.” 
Purisu, migduma si Hipta te me igbuyag te Gilyad, wey inggimu sikandin te me etew ne pangulu wey talagmandu dan. Ne diye te Mispa, diye te tangkaan te Magbebaye ne Manama, migsaad si Hipta diye te me igbuyag. 
Ne migsuhu si Hipta te seeye se egmahuhuren diye te Hari te me Amunihanen te pegkahi, “Nekey ka ig-ehet niyu kanami? Mania te eglusuran niyu ka inged ney?” 
Ne intabak te Hari te me Amunihanen seeye se insuhu ne egpahuhuren ni Hipta, “Uya su in-ahew te me Israilita ka tane ney te pegginguma ran puun te Ihiptu. In-amin dan ka tane ney puun te Arnun peendiye te Habuk wey taman te Weyig ne Hurdan. Ne kuntee, iuli niyud e seini wey kene key e egpakiggira kaniyu.” 
Ne migsuhu e man‑e si Hipta te seeye se egmahuhuren din diye te Hari te me Amunihanen, 
wey impakahiyan din, “Ware ahawa te me Israilita ka tane te me Muwabihanen wey ke tane naa te me Amunihanen. 
Te peg-awe te me kabuybuyahan ney te Ihiptu, miggendiye sikandan te disirtu wey miglapas sikandan diye te Malalab ne Dahat wey taman diye te Kadis. 
Ne migsuhu sikandan te seeye se egmahuhuren ne impeendiye te Hari te inged ne Idum ne egpakahiyen, ‘Eglihad key ubag te tane niyu.’ Piru ware migpammineg ka Hari. Seeye ded degma ka inggimu te Hari te Muwab kandan. Sikan naa ka ware mig-awe sikandan te Kadis. 
Ne migpabulus sikandan diye te disirtu. Ne mig-alibed sikandan diye te inged ne Idum wey Muwab taman te nekeuma sikandan diye te kewun‑aan te Muwab ne dapit te igsile ne diye te talipag te Weyig ne Arnun. Ne migkekampu sikandan diye, piru ware sikandan miglapas te weyig tenged su eletanan ma seeye te Muwab. 
Ne migsuhu ka me Israilita te seeye se egmahuhuren diye ki Sihun ne Hari te Amurihanen diye te Hisbun eyew te pegkahi, ‘Palihara key ubag te tane niyu.’ 
Piru ware migsalig si Sihun te me Israilita ne eglihad te tane din. Nasi din libulunga ka langun ne sundalu rin wey nangekampu diye te Hahas wey inlusuran dan ka me Israilita. 
Piru impatalu te Magbebaye ne Manama te Israil ensi Sihun. Sikan naa ka naahew e te me Israilita ka tane te me Amunihanen ne mahinged te seeye ne inged. 
Naahew ran ka langun ne in-ugpaan te me Amurihanen puun te Weyig ne Arnun taman te Weyig ne Habuk, wey puun man‑e te disirtu peendiye te Weyig ne Hurdan. 
Purisu ka Magbebaye ne Manama te Israil ka migdeldel te me Amurihanen eyew egkeugpaan ka inged dan te me Israilita. Nekey naa ka katenged niyu ne eggawi kayi? 
Iyan niyu angkena ke nekey ka imbehey kaniyu te diyus-diyus niyu ne si Kimus, wey ke nekey degma ka imbehey te Magbebaye ne Manama ney, iyan ney degma eg-angkenen. 
Migpalintutuu kew naa ne meupiya kew pad te Hari te Muwab ne si Balak ne anak ni Sipur? Ware de due sikandin miglelalis ne eg-ehet te Israil, wey warad iya migbul‑ug migpakiggira kandan. 
Me tatelu ne gatus (300) ne leg‑un ka me Israilita ne nangugpe diye te Hisbun, Aruwir, wey te me lungsud ne nakalingut kayi, wey te langun ne lungsud ne diye te ilis te Weyig ne Arnun. Ne mania te kunteen niyu pad nasuman-suman ne eggawien seini? 
Ware neyimu ku ne seyyup kaniyu, piru sikaniyu ka miggimu te seyyup keddi tenged su egpakiggira kew keddi. Ne iyan eggukum ka Magbebaye ne Manama ke hentew ka due sale; ka me Israilita wey ke me Amunihanen naa.” 
Piru ware linglingaa te Hari te me Amunihanen ka impanaha ni Hipta. 
Ne in-umaan si Hipta te Panisingan te Magbebaye ne Manama. Ne miggendiye sikandin te Gilyad wey te Manasis, wey nataman miglibed e sikandin diye te Mispa ne sakup te Gilyad. Ne puun diye, inlusuran din ka me Amunihanen. 
Ne migsaad si Hipta diye te Magbebaye ne Manama te migkahi, “Emun ke egpepanaluwen a nikeykew te me Amunihanen, 
ka an-anayan ne eglihawang te baley ku eyew egsinug-ung keddi te peg-uli ku ne migpanalu, igbehey ku keykew sikandin wey ke igpanubad ku naa keykew ne egtutungen.” 
Ne inlusuran ni Hipta ka me Amunihanen, wey impepanalu sikandin te Magbebaye ne Manama. 
Natalu rin ka me Amunihanen wey nasakup din ka daruwa ne pulu (20) ne siyudad puun te Aruwir peendiye te inged ne nakalingut te Mimit, taman diye te Abil-Kiramim. Masulug amana ka me Amunihanen ne neyimatayan te me Israilita. 
Te peg-uli e ni Hipta diye te baley rin te Mispa, migsinug-ung kandin ka anak din ne mengebay ne migsayew ka migtetagpi te tamburin. Sabsabeka seeye ne anak din wey warad duma ne anak din ne lukes wey ke malitan naa. 
Te pegkakita ni Hipta kandin, inggisi din ka kumbale din tenged te pegkalange din wey migkahi sikandin, “Keyey, anak ku! Ka pegtemu nu keddi iyan egpuunan ne egkenenduenan a wey egkasakitan a amana. Nakasaad a te Magbebaye ne Manama wey kene ku seini egkasupak.” 
Ne migkahi ka anak din, “Ame, puun su migsaad ka te Magbebaye ne Manama, tumana nu ke nekey ka insaad nu kandin su migpanalu ke ma te inggira nu ka me Amunihanen.” 
Migkahi pad man‑e sikandin, “Piru duen pad ighangyu ku keykew. Kaayun ubag ne egbehayan a nikeykew te daruwa ne bulan eyew egleug-leug wey eglungku diye te me bubungan duma te me alukuy ku su kena ad ma egpakaasawa.” 
Ne migkahi si Hipta, “Uya, egkaayun ka ne eggipanew.” Seeye naa ka impaleleug din ka anak din duma te me alukuy rin te daruwa ne bulan wey miglungku sikandan tenged su kenad sikandin egpakaasawa. 
Pegkeimpus te daruwa ne bulan, mig-uli e sikandin diye te amey rin. Ne intuman ni Hipta ka insaad din te Magbebaye ne Manama wey warad nakaasawa ka anak din. Puun dutu, nabatasan e seeye te me Israilita, 
ne tagse leg‑un, eglungku te hep‑at ne aldew ka me malitan tenged te anak ni Hipta.