Talewukum.
14.
Sabeka ne aldew, miggendiye si Samsun te Timna. Ne diye, due nakita rin ne mengebay ne Pilistihanen. 
Te peg-uli din, ingkahiyan din ka amey rin wey iney rin, “Due nakita ku ne mengebay ne Pilistihanen diye te Timna; angaya niyu sikandin su eg-asaween ku.” 
Piru ingkahiyan sikandin te amey rin wey iney rin, “Mania te egpangasawa ka te kabuhalan te me Pilistihanen ne ware migpalintutuu te Manama? Masulug ka malitan kayi ne karumaan ta wey minsan diye te lein ne kabuhalan te Israil.” Piru migtabak si Samsun, “Sikandin de iya angaya niyu su sikandin de ka igkeupii ku te eg-asawa.” 
Ne ware nakataha ka amey rin wey iney rin ne igkeupii bes te Magbebaye ne Manama seeye ne egkeyitabu. Su egpamitew ka Manama te etew ne egsesamuk te me Pilistihanen. Te seeye ne timpu iyan migmandu te Israil ka me Pilistihanen. 
Ne migparumeey e ensi Samsun te amey rin wey te iney rin diye te Timna. Te diyad sikandan te dalan diye te parasan te Timna, due nati pad ne liyun ne egdula ki Samsun. 
Ne in-umaan sikandin te Panisingan te Magbebaye ne Manama minsan ware panganiban din, inggimatayan din ka liyun ne para kandin, iling de kahuye te nati te kambing. Piru ware din seini ipangguhud te amey rin wey iney rin. 
Ne miggendiyaan ni Samsun ka malitan wey migpakiglalag kandin. Amana ingkatelesi ni Samsun ka malitan. 
Te ware naluhey, miglibed sikandin ka egpangasawa te malitan. Ne migtulanan din pad ka liyun ne inggimatayan din. Pegpitew rin, iyan din en iya se patiyukan wey due teneb diye te lawa te liyun. 
Ne migkuwa sikandin te teneb wey ingkeen din seini te sasangan sikandin ne eggipanew. Te nakita rin ka amey rin wey iney rin, imbehayan din sikandan wey migkeen degma sikandan. Piru ware din ipangguhud kandan ne diye din kua ka teneb te lawa te napatey ne liyun. 
Ne migtupang ka amey ni Samsun diye te baley te eg-asaween ni Samsun. Ne migpasahakeen si Samsun diye su iling iya rue ka nabatasan ne eggimuwen te me kanakan ne egpangasawa. 
Te diyad si Samsun, nakita te me Pilistihanen ne ware duma rin, sikan naa ka imparumaan dan e sikandin te tatelu ne pulu (30) ne kanakan. 
Ne migkahiyan sikandan ni Samsun, “Due egpaantukan ku kaniyu. Emun ke egkaantukan niyu seini te kene pad egkeimpusan ka pitu ne aldew ne sahakeen, egbehayan ku sikaniyu te tatelu ne pulu (30) ne hinabel, wey tatelu ne pulu (30) ne lukut ne manggad. 
Piru emun ke kene niyu egkaantukan seini, sikaniyu ka egbehey keddi te tatelu ne pulu (30) ne hinabel, wey tatelu ne pulu (30) ne lukut ne manggad.” Ne migtabak sikandan, “Uya. Ne ihuhud nu lad ke nekey ka egpaantukan nu kanami.” 
Migkahi si Samsun, “Puun te talagkeen, miglihawang ka egkakeen; puun te manekal, miglihawang ka meemis.” Ne natateluwan e ne ware dan de due natabak ka impaantukan din. 
Te igkeep‑at e ne aldew, ingkahiyan dan ka asawa ni Samsun, “Ginaliha nu ka asawa nu eyew egpangguhud ke nekey ka tabak te impaantukan din. Su emun ke kene nu egginalihen, egsilaban ney sikeykew lagkes ka pamilya te amey nu. Ingnginggat key naan de nikaniyu kayi eyew egpaneleppian?” 
Purisu miggendiye ki Samsun ka asawa rin ne migsinehew wey migkahi, “Ware e bes nikeykew geyinawei! Igkeepes e bes nikeykew! Due impaantukan nu te me karumaan ku, piru wara a nikeykew guhuri ke nekey ka tabak.” Migtabak si Samsun, “Ware ku ma gani pangguhuri ka amey wey iney ku, iyan ku naan pa iya guhuri sikeykew?” 
Ne puun dutu, layun e egsinsinehew ka asawa ni Samsun te intiru ne sahakeen te pitu ne aldew. Purisu, te igkapitu e ne aldew, ingguhuran din e ka asawa rin su egpamehes ma. Ne ingguhud e degma seini te asawa rin diye te me karumaan din. 
Purisu, te ware pad nasagkup te igkapitu ne aldew, intabak dan e ka impaantukan din kandan. Kahi ran, “Liyun ka subla ne manekal. Teneb ka subla ne meemis.” Ne migtabak si Samsun, “Emun ke ware niyu pehesa ka asawa ku, ware kew perem nakaantuk.” 
Ne in-umaan e man‑e si Samsun te Panisingan te Magbebaye ne Manama. Ne miggendiye sikandin te Askalun wey impangimatayan din diye ka tatelu ne pulu (30) ne etew. Impangahew rin ka mateles ne me hinabel ran, wey imbehey rin seini te me etew ne nakatabak te impaantukan din. Nataman, mig-uli e sikandin diye te baley te amey rin ne nangebel-ebel se langet. 
Ne iyan e impaasawa te eg-asaween ni Samsun ka lukes ne migbulig kandin te kasal.