Talewukum.
15.
Te ware naluhey, te tinggaani te trigu, inleuy ni Samsun ka eg-asaween din wey mig-uyan sikandin te nati pad ne kambing. Ne ingkahiyan din ka anuhang din ne lukes, “Egkeupian a ne egseled diye te sinabeng te eg-asaween ku.” Piru ware sikandin paselera te anuhang din. 
Migkahi ka anuhang din, “Kahiyen ku naa ne nabelu-belu ka kandin, sikan naa ka impaasawaan kud sikandin te lukes ne migbulig keykew. Piru due hari rin ne mateles pad kandin. Sikandin e asawaa nu.” 
Piru migkahi si Samsun, “Ke iling ma rue, kena a senditi nikaniyu te mareet ne eggimuwen ku kaniyu te me Pilistihanen!” 
Sikan naa ka miggipanew sikandin wey migpandakep te tatelu ne gatus (300) ne laku. In-atag din ka me laku wey impeggiket din naa ka me ikug, wey inggiketan din te sulu diye te elat. 
Ne impareketan din ka me sulu wey impanlekaan din ka me laku wey nangendiyad te kamet te me Pilistihanen. Ne nasilaban e ka me pinamula ne me trigu, minsan ka nahaani e wey ka eggaaniyen pad, wey nasilaban degma ka me parasan wey me ulibu. 
Ne mig-inse ka me Pilistihanen, “Hentew ka migdereet kayi?” Ne migtabak sikandan, “Si Samsun ne mekaamung te matig-Timna ka migdereet kayi. Migbubual sikandin su impaasawaan ma ka eg-asaween din te lukes ne migbulig kandin.” Ne miggendiyaan dan e wey insilaban dan e ka asawa rin wey inlagkes dan ka anuhang din ne lukes. 
Migkahiyan sikandan ni Samsun, “Tenged te inggimu niyu keddi, egpahunlibet a ne kena a iya egpeeneng-eneng taman te egpakasuli a kaniyu!” 
Ne inlusuran din sikandan wey masulug ka neyimatayan din. Pegkeimpus dutu, migtupang e sikandin wey diyad sikandin mig-ugpe te sulung diye te pahangen te Itam. 
Ne nanakereg e ka me Pilistihanen ne eglusud te matig-Huda wey nangekampu sikandan diye te lungsud te Lihi. 
Mig-insaan sikandan te me mahinged te Huda, “Mania te inlusuran key nikaniyu?” Ne migtabak sikandan, “Miggendini key eyew egdakep ki Samsun wey eyew egpakasuli key kandin.” 
Seeye naa, miggendiye ka tatelu ne libu (3,000) ne mahinged te Huda te sulung diye te pahangen te Itam wey ingkahiyan dan si Samsun, “Ware ke bes nakataha ne iyan migmandu kanta ka me Pilistihanen? Ne kuntee, naapil key e te inggimu nu kandan.” Migtabak sikandin, “Migsuli e re te inggimu ran keddiey.” 
Ne migkahi sikandan, “Miggendini key ka egdakep keykew eyew igbehey ney sikeykew te me Pilistihanen.” Ne migtabak si Samsun, “Pahunlibet kew ne kena a nikaniyu eggimatayan.” 
Ne migkahi sikandan, “Uya. Kene ney eggimatayan sikeykew. Egbakuen ney re sikeykew wey igbehey ney e sikeykew te me Pilistihanen.” Purisu, imbaku dan e sikandin te daruwa ne iyam ne lubid, wey impalihawang dan e te sulung. 
Ne in-uuyan dan e sikandin diye te Lihi. Te pegkakita te me Pilistihanen ne neuyan si Samsun diye te kampu ran te Lihi, migpanguleyi sikandan ka egsinug-ung kandin. Sahuhune, in-umaan sikandin te Panisingan te Magbebaye ne Manama. Ne migmakeseg sikandin wey impamugtus din ka me lubid ne imbaku kandin ne iling de te bula-bula ne mahebu. 
Ne due nakita rin ne tul‑an te bake te asnu ne makehal pad. Ingkuwa rin seeye wey iyan din inggamit te pegpangimatey te sabeka ne libu (1,000) ne me Pilistihanen. 
Ne migkahi si Samsun, “Pinaahi te tul‑an te asnu, mig-um-umambu ka me etew ne neyimatayan ku. Pinaahi te tul‑an te bake te asnu, nakapatey a te sabeka ne libu (1,000) ne etew.” 
Te nekeimpus e sikandin ka eglalag, indegpak din e ka tul‑an te asnu. Ne ingngaranan ka seeye ne inged te Ramat-Lihi. 
Ne nammaraan e amana si Samsun, sikan naa ka migpangananey sikandin te Magbebaye ne Manama wey migkahi, “Impepanalu a nikeykew se suluhuanen nu. Ne kuntee, iyan ku re igpatey se egkammaraan wey igpatalu e naan de nikeykew te ware natulii ne me Pilistihanen?” 
Ne impabekabeka te Manama ka migleb-eng ne tane te Lihi wey due weyig ne miglepew. Te nekeinum e si Samsun te weyig, migmanekal e man‑e sikandin. Sikan naa ka egpuunan ne ingngaranan e ka sebseb te Sebseb te Migpanganey te Weyig. Ne diye ded kuntee seini te Lihi. 
Migdaruwa ne pulu (20) ne leg‑un si Samsun ne migpangulu te Israil. Piru sakup ded te me Pilistihanen ka tane dan.