Talewukum.
18.
Te seeye ne timpu, ware Hari te Israil. Ne ka me kabuhalan ni Dan egpamitew degma te egkeugpaan dan, su te seeye ne timpu sikandan naan de ka kabuhalan te Israil ne ware pad tane. 
Sikan naa ka mig-alam ka me kabuhalan ni Dan te lalimma ne etew ne bahani ne egpuun te lungsud te Sura wey te Istaul. In-alam sikandan te langun ne etew eyew egpepamitawen wey egpepanleuyen te tane ne eg-angkenen dan. Ne nangendiyad sikandan wey migginguma diye te bubungan te Ipraim, wey diyad sikandan nakaaran te baley ni Mikiyas. 
Te diyad sikandan te baley ni Mikiyas, neilaan dan ka peglalag-lalag te kanakan ne Libita. Sikan naa ka migtulan sikandan wey mig-insaan dan sikandin, “Mania te nekeendini ka? Hentew‑a ka mig-uyan keykew kayi? Nekey ka egkuen nu kayi?” 
Ne migtabak ka Libita, “Ingkuwa a ni Mikiyas ne talagpanubad din wey egbayaran a nikandin.” 
Ingkahiyan dan sikandin, “Insei nu ubag ka Manama ke meupiya red ka egpabulusan te hipanew ney.” 
Ne migtabak ka Libita, “Kene kew kalaggew. Egtantanuran kew te Magbebaye ne Manama te hipanew niyu.” 
Purisu, migpabulus ka lalimma ne etew wey nekeyinguma sikandan diye te lungsud te Lais. Nakita ran ne meupiya ka peg-ugpe te me etew ne ware gubut wey ware igkabantali iling te peg-ugpe te me Sidunihanen. Matubung sikandan wey due ka langun ne egkeilanganen dan. Mariyu de ka Lais te ugpaan te me Sidunihanen wey ware egpakabulig kandan. 
Te peglibed te lalimma ne etew diye te Sura wey te Istaul, mig-insaan sikandan te me karumaan dan, “Nekey‑a ka nakita niyu?” 
Migtabak sikandan, “Nakita ney ne meupiya ka tane diye. Purisu kene kid e eglamu-lamu ka eglusud eyew egkaahew ta ka seeye ne tane wey eg-ugpaan tad. 
“Emun ke diye kid e, kene sikandan egsuman-suman ne eglusuran ta sikandan. Maluag ka tane dan, wey matubung pad iya man‑e. Imbehey seini te Manama kanta.” 
Sikan naa ka migtaggel e ne eglusud ka hen‑em ne gatus (600) ne etew ne kabuhalan ni Dan ne egpuun te lungsud te Sura wey te Istaul. 
Migpanakereg sikandan wey nangekampu diye te lenged te Kiryat-Hiyarim ne sakup te Huda. Sikan naa, minsan kuntee ingngaranan ka seeye ne inged te Kampu ni Dan. 
Nataman, migpabulus sikandan taman te nekeyinguma sikandan diye te baley ni Mikiyas ne diye te bubungan te Ipraim. 
Ne ingkahiyan te lalimma ne etew ne mig-iipat diye te Lais ka me karumaan dan, “Nakataha kew naa ne due me ipud kayi te seini ne baley, wey larawan? Ne kuntee, nekey ka meupiya ne eggimuwen ta?” 
Sikan naa ka miggendiye sikandan te kanakan ne Libita diye te baley ni Mikiyas, wey mig-insaan dan ka Libita ke nekey e se peg-ugpe din. 
Taheed mule te migsasindeg ka Libita wey ka hen‑em ne gatus (600) ne sundalu diye te gumawan ne andam e ne egpakiggira, migseled ka lalimma ne talag-iipat diye te baley ni Mikiyas, wey ingkuwa ran e ka me ipud, wey ka larawan. 
Te pegkakita te talagpanubad ne impanguwe e te lalimma ne etew ka larawan, ka me ipud, mig-inse sikandin, “Mania te impanguwa niyu sika?” 
Migtabak sikandan, “Peeneng-eneng kad due! Duma ke re kanami su eggimuwen ney sikeykew ne talagtambag ney wey talagpanubad ney. Hendei bes ka meupiya: ka egkeyimu ka ne talagpanubad te senge-pamilya re, wey ke talagpanubad te intiru ne tribu ni Dan?” 
Nabennalan ka talagpanubad te ingkahi ran. Purisu, impanguwa rin ka me kumbale ne ipud, ingkulit ne larawan, wey inggimu ne larawan. Ne migdume e sikandin kandan. 
Te peggipanew ran duma te me pamilya ran, impewun‑a ran ka me bate wey me ayam. Impewun‑a ran man‑e ipeuyan ka me kasangkapan dan. 
Te bayew e mariyu sikandan te baley ni Mikiyas, human pad nalibulung ka me sumbaley rin eyew eglupug ka egpakigkuntere te kabuhalan ni Dan. 
Ne imbalukanan dan ka kabuhalan ni Dan eyew egpekeengked ka eggipanew. Ne miglilingey sikandan wey ingkahiyan ensi Mikiyas, “Nekey‑a ka igkeupii niyu, mania te miglupug kew kanami?” 
Ne migtabak si Mikiyas, “Mania te eg-inse kew pad? Ingkuwa niyu ka inggimu ku ne me diyus-diyus, wey ka talagpanubad ku? Ne warad nasame kayi te keddi.” 
Ingkahiyan sikandin te kabuhalan ni Dan, “Kene ka lalag te iling due su kema ke due egkabelu ne duma ney, wey eggimatayan ka nikandan lagkes ka pamilya nu!” 
Ne migpabulus e miggipanew ka me kabuhalan ni Dan. Nakita ni Mikiyas ne kene din egkatalu sikandan, sikan naa ka mig-uli naan de sikandin. 
Ne migpabulus ka me kabuhalan ni Dan diye te Lais. Ne in-uyan dan ka immangimu ni Mikiyas wey ka talagpanubad din. Inlusuran dan ka Lais, ka inged ne ware igkabantali wey ware gubut. Impangimatayan dan ka me mahinged diye, wey insilaban dan ka intiru ne siyudad. 
Ne ware nakapangabang te me matig-Lais su mariyu ma sikandan te Sidun, wey ware sikandan migpakigsabeka te lein ne me etew. Diye seini ne inged te napu te Bit-Rihub. Ne imbalbalawan ipasasindeg te me kabuhalan ni Dan ka siyudad, wey diyad sikandan nangugpe. 
Ingngaranan dan seini ne siyudad te Dan su impasangey te ngaran te kaapuan dan ne si Dan ne sabeka te me anak ni Hakub. Piru Lais dengan ka ngaran te sika ne siyudad. 
Impasasindeg dan ka larawan ne inggimu ni Mikiyas wey insimba ran seeye. Si Diyunatan ne anak ni Hirsun ne apu ni Muwisis ka talagpanubad dan. Puun te seeye ne timpu, ka kabuhalan e ni Diyunatan ka talagpanubad dan taman te narakep e ka me Israilita. 
Taheed te diye ka timplu te Manama te Silu, ka diyus-diyus degma ni Mikiyas ka insimba diye te Dan.