1 Samwil.
2.
Ne mig-ampu si Hana ne migkahi, “Magbebaye ne Manama, amana a nahale tenged te inggimu nu keddi! Ka keseg ku, diye migpuun keykew. Ingngisiyan ku ka kuntere ku tenged su nahala a te pegbulig nu keddi. 
“Ware lein ne matulus ne iling keykew Magbebaye, ware iya iling keykew. Ware batu ne aputanan ne egpekeiling keykew te Manama ney. 
Ne egnangenan ku seeye se me hambuhen, ‘Peeneng-eneng kew e ka egpaambug; kene kew e pegpeggasal. Tenged su ka Magbebaye nakataha te langun wey ka eggukum te eggimuwen te me etew.’ 
“Magbebaye, impanggepu nu ka me pane te me etew ne mannekal, piru impamanekal nu ka me etew ne magguye. 
Ka matubung dengan, migpanginaldew naan de eyew egpakakeen piru kenad e eggutasan seeye se miggutasan dengan. Mig-anak te pitu seeye se kene egpakaanak dengan piru migsabsabeka naan de seeye se masalig se me anak dengan. 
Eggimatey ka wey eg-uyag, Magbebaye. Ne igpeendiye nu ka me etew te inged te me gimukud ne egngaranan te Hadis wey sikeykew red ka eg-angey kandan puun diye. 
Eggimuwen nu ne egkaayu-ayu ka meyaman wey eggimuwen nu ne meyaman ka egkaayu-ayu. Sikeykew degma ka eggimu ne egmapariralemen ka duma wey eggimu ne talahuren ka duma. 
In-enew nu ka egkengaayu-ayu puun te subla ne keyirapan wey ingkayew nu sikandan wey impapinnuu duma te me talahuren wey impasubal nu te pinnuuwan te amana ne me talahuren. Su sikeykew Magbebaye ka kamuney te pabunsuranan te tane wey kayi nu itahu ka kalibutan. 
Ne egtamengan nu ka matinumanen ne keet-etawan nu, piru egguleen nu te egdereet ka maddeet se hinimuwan, su kene egmalampusen ka etew pinaahi te keseg din mismu. 
Ne egdereetan nu Magbebaye ka me kuntere nu. Egparagsangan nu sikandan te luhung. Sikeykew Magbebaye ka eggukum te intiru ne kalibutan. Egbehayan nu te keseg ka in-alam nu ne Hari, wey egmaresen ka peghari din.” 
Ne mig-uli e si Ilkana wey si Hana diye te baley ran diye te Rama. Piru inggaat dan de mule si Samwil eyew egpamakey te Magbebaye isip talagbulig te talagpanubad ne si Ili. 
Ne maddeet ka me anak ni Ili ne me lukes ne si Hupni wey si Pinihas ne me talagpanubad. Ware dan ilaa ka katenged te Magbebaye 
wey ka me balaud ke nekey ka egkakuwa te me talagpanubad diye te me etew. Su ke due egpanubad, egparani seeye se suluhuanen te talagpanubad ne eg-uyan te dakel ne tinidur, wey taheed te impakalkalaan pad ka igpanubad, 
igtiyuk din seini diye te kuren. Ne ka langun ne egkaangey kayi, egkuen te talagpanubad. Iling kayi ka eggimuwen te me anak ni Ili diye te me matig-Israil ne eggendiye te Silu eyew egpanubad. 
Senge-kakuwa, te kene pad egtutungen ka kalambuan, egparani ka suluhuanen te talagpanubad diye te etew ne migpanubad wey egkahi, “Behayi nu te sapu ka talagpanubad eyew egtuuhen din su kene sikandin egdawat te ngalap ne impakalkalaan e, ke kene, ka meyilew pad.” 
Ke egkahi ka seeye se etew ne migpanubad, “Egtutungen te pad ka kalambuan ne egkaayun kad e ne eg-angey taman te igkeupii nu,” ne egtabak ka suluhuanen te talagpanubad, “Kene egkaayun. Keilangan ne igbehey nu kuntee seini keddi, su ke kene, eg-ahawen ku seini.” 
Dakel amana ka sale ne neyimu te me anak ni Ili diye te tangkaan te Magbebaye su ware dan ma tahura ka pegpanubad. 
Ne migpabulus ne migpamakey te Magbebaye si Samwil wey migsaluub sikandin te hinabel ne egngaranan te ipud. 
Te tagse leg‑un, eggimu ka iney rin te egpekeiling te deisek ne linayun ne malayat se belad, wey eg-uyanen din seini diye ki Samwil ke eggendiye sikandan se alunggun te Silu eyew te pegpanubad te tagse leg‑un ne pegpanubad. 
Ne impanalanginan ni Ili si Ilkana wey ka igbeyi rin te migkahi, “Egbehayan ka perem te Magbebaye te duma pad ne me bate pinaahi te igbeyi nu ne igliwan te sabeka ne bate ne imbuyu din ne inlibed din ded ibehey te Magbebaye.” Te neimpusan e seini, nanguli e sikandan. 
Ne impanalanginan te Magbebaye si Hana. Ne nakaanak pad sikandin te tatelu ne me lukes wey daruwa ne me malitan. Ne migtulin ka bate ne si Samwil ne migpamakey te Magbebaye. 
Na, kuntee te buyag e amana si Ili, narineg din ka langun ne inggimu te me anak din diye te langun ne matig-Israil wey ka peggulid dan te me malitan ne migtrabahu diye te gumawan peendiye te Balungbalung ne Temuwanan. 
Ne ingkahiyan din sikandan, “Mania te inggimu niyu seini? Narineg ku puun te langun ne etew ka mareet ne me himu niyu. 
Peen-enengi niyud sika me anak! Kene ne meupiya ne guhuren ka narineg ku puun te keet-etawan te Magbebaye! 
Ke egpakasale ka sabeka ne etew diye te duma rin, egpataliware ka Magbebaye kandan. Piru ke egpakasale ka etew te Magbebaye, hentew naa ka egpataliware kandan?” Piru ware dan pammineha ka amey ran tenged su igkeupii e te Magbebaye ne eggimatayan sikandan tenged te me sale dan. 
Ne migpabulus migtulin si Samwil wey ingkeupii sikandin te Magbebaye wey te me etew. 
Ne due prupita te Manama ne miggendiye ki Ili ne migkahi, “Seini ka ingkahi te Magbebaye, ‘Migpeila a diye te kaapuan nu ne si Aarun wey te me kabuhalan din te timpu ne uripen pad sikandan te Hari te Ihiptu. 
In-alam ku si Aarun puun te langun ne pamilya te Israil eyew egkeyimu ne talagpanubad ne egpamakey diye te altar ne tutunganan te igpanubad wey egtutung te insinsu. Egsaluub sikandin te mateles ne kumbale ne egngaranan te ipud diye te tangkaan ku. Imbehey ku degma diye te pamilya rin ka langun ne igpanubad ne egtutungen ne egpuun diye te keet-etawan te Israil. 
Ne kuntee, mania te imbaley-baley niyu ka igmanubad wey ka me halad ne insuhu ku ne igpeyimu te me etew? Mania Ili te subla nu pad tahura ka anak nu ne me lukes du te pegtahud nu keddi? Impalambeg nu sikandan pinaahi te meupiya ne baad te langun ne igmanubad te keet-etawan ku ne matig-Israil.’ 
“Purisu migkahi ka Magbebaye, ka Manama te Israil, ‘Migsaad a ne egpamakey keddi ka kabuhalan nu wey ka kabuhalan te amey nu te ware egtamanan.’ Piru sikeddi se Magbebaye, migpanengneng, ‘Kene ku sika eggimuwen su ka migtahud keddi, egtahuren ku degma wey ka miglemet keddi, eglemetan ku degma. 
Egginguma ka aldew ne egdereetan kud e ka kabuhalan nu wey ka kabuhalan te amey nu su eyew ware due te pamilya nu ne egpekeyinguma te kabuyahi rin. 
Ne eg-antus ka wey egkasekel ka te Israil tenged te egkakita nu ne keupianan ne igbehey ku kandan, piru ware mule kabuhalan nu ne egkabuyag pad human egpatey. 
Sabeka re ne etew ne egpuun te kabuhalan nu ka kene ku eggimatayan su eyew egpakapabulus sikandin ka egpamakey keddi isip talagpanubad. Piru egpakabaye sikandin te subla ne keyirapan. Ne ka langun ne kabuhalan nu, egpatey ne kene pad ne me buyag. 
Egkaamin egpatey ka daruwa ne anak nu ne si Hupni wey si Pinihas te sabeka re ne aldew isip palinneu ne malehet ka ingkahi ku. 
Ne eg-alam a te matinumanen ne talagpanubad ne eggimu ke nekey ka kayi te pusung ku wey suman-suman. Egtamengan ku sikandin wey ka kabuhalan din eyew egpamakey sikandan te in-alam ku ne Hari te ware egtamanan. 
Ne ka tagse sabeka ne kabuhalan nu ne kene pad egpatey, eggendiye te sika ne talagpanubad wey egpeyid‑u-hid‑u ne egbehayan te seleppi wey paan. Ne eghangyu sikandan ne eggimuwen ne talagbulig te talagpanubad eyew egpakakeen de.’”