1 Samwil.
15.
Ne ingkahiyan ni Samwil si Saul, “Sikeddiey ka impeendini te Magbebaye ne Manama eyew te peg-itis keykew te lana isip Hari te keet-etawan din, ne iyan ka me matig-Israil. Purisu pammineha nu seini se lalag ne egpuun te Amana ne Maresen ne Magbebaye ne miggenendue, 
‘Egdusaan ku ka me Amalikanen tenged te peggepas dan te me matig-Israil te timpu te peglihawang dan puun te Ihiptu. 
Sikan naa, lusuri nu ka me Amalikanen wey dereeti nu sikandan langun, lagkes ka langun ne diye te kandan. Pangimatayi nu ka me lukes, me malitan, me bate, wey ka me egsusu pad, ka me baka, me karniru, me kamil, wey ka me asnu.’” 
Purisu impeumew ni Saul ka keet-etawan peendiye te Tilim wey inseel rin sikandan diye. Ne daruwa ne gatus ne libu (200,000) ne sundalu ka egpuun te Israil wey sapulu ne libu (10,000) ne sundalu ka egpuun te Huda. 
Ne miggendiye si Saul te siyudad te Amalik duma te me sakup din wey miggepas sikandan diye te weyig ne wey re egkaweyihi ke ting-uran. 
Ne migkahiyan ni Saul ka me Kinihanen, “Pangawe kew, pariyu kew te me Amalikanen eyew kene ku sikaniyu iglagkes te egpangimatey duma kandan tenged su in-ay-ayaran niyu ka langun ne matig-Israil te timpu ne miglihawang sikandan te Ihiptu.” Purisu migpariyu e ka me Kinihanen puun te Amalikanen. 
Ne natalu ni Saul ka me Amalikanen puun te Habila taman te Sur ne diye dapit te igsile te Ihiptu. 
Ne indakep din si Agag ne Hari te me Amalikanen, piru impangimatayan din ka langun ne etew rin pinaahi te kampilan. 
Ne ware himatayi ni Saul wey te me sundalu rin si Agag wey ka subla ne meupiya ne me karniru wey me baka, minsan ka mallambeg ne me nati ran, wey ka langun ne meupiya. Piru indereetan dan mule ka langun ne egkasamsamilian wey ka ware karuan. 
Ne impanengneng te Magbebaye si Samwil, 
“Nekegsendit a te inggimu ku ne Hari si Saul su in-engkeran ad nikandin wey ware din e tumana ka me suhu ku.” Nabelu si Samwil wey mig-ampu te Magbebaye te intiru ne marusilem. 
Te pegkapawe, migselem-selem mig-enew si Samwil eyew egpakiglalag ki Saul, piru due nakanangen kandin ne miggendiye si Saul te Karmil wey migpeg-untud-untud te me batu ne tuus te pegkeetew rin. Te nekeimpus e sikandin, miggendiyad e sikandin te Gilgal. 
Ne miggendiyaan ni Samwil si Saul. Te neumaan din e sikandin, migkahi e si Saul, “Egpanalanginan ka perem te Magbebaye. Natuman kud e ka me suhu din.” 
Ne migkahi si Samwil, “Mania te due egmammihi-mihi ne me karniru wey egmangngaa-ngaa ne me baka?” 
Migtabak si Saul, “Impanguyan sika te me sundalu puun te me Amalikanen. Ware dan pangimatayi ka subla ne meupiya ne me karniru wey me baka su eyew igpanubad dan te Magbebaye ne iyan ka Manama nu. Piru in-amin ney te egpangimatey ka duma.” 
Ne ingkahiyan ni Samwil si Saul, “Peeneng-eneng ka! Egnangenan ku sikeykew te inlalag keddi te Magbebaye ganna te marusilem.” Ne migkahi si Saul, “Uya, nangeni a.” 
Ne migkahi si Samwil, “Minsan se migsuman-suman ka ne kene ne impurtanti ka pegkeetew nu piru inggimu ka te Magbebaye ne pangulu pinaahi te peg-alam keykew isip Hari te me tribu te Israil. 
Insuhu ka te Magbebaye te sabeka ne hipanawan. Migkahi sikandin, ‘Hipanew ka, gulaa nu te egpangimatey ka langun ne makasesale ne iyan ka me Amalikanen. Giraa nu sikandan taman te egkaamin nu sikandan te egpangimatey.’ 
Piru mania te ware nu tumana ka Magbebaye? Mania te nasi ka naalamlam ka migpanguwa te me kasangkapan dan? Mania te inggimu nu seini se mareet diye te tangkaan te Magbebaye?” 
Ne migtabak si Saul, “Intuman ku ka Magbebaye wey innipanawan ku ka insuhu din keddi. Inggule ku te egpangimatey ka me Amalikanen wey indakep ku si Agag ne Hari dan. 
Piru nanguyan ka me sundalu te subla ne meupiya ne me karniru wey me baka puun te seeye se eleg ne egdereetan. In-uyan dan seini kayi te Gilgal su eyew igpanubad dan te Magbebaye, ne iyan ka Manama nu.” 
Ne migkahi si Samwil, “Subla naa ne egkahale ka Magbebaye te igmanubad wey te me egtutungen ne igpanubad du te pegtuman kandin? Tantanuri nu ne meupiya pad ka pegtuman wey ka pegpammineg te Magbebaye du te igpanubad ne egtutungen wey te kalambuan te me lukesan ne karniru. 
Su ka pegsukul te Magbebaye egpekeiling te sale te pegpanlambus. Ka pegkamakehal te ulu egpekeiling te sale te pegsimba te me diyus-diyus. Tenged su insamsamilian nu ma ka lalag te Magbebaye, insamsamilian kad degma nikandin isip Hari.” 
Ne ingkahiyan ni Saul si Samwil, “Nakasala a su nasupak ku ka suhu te Magbebaye wey seeye se inlalag nu keddi, su naaldek a te me etew, purisu imparumdumaan ku sikandan. 
Purisu pasayluwe e re ubag nikeykew te me sale ku, wey dumeyi e red nikeykew eyew egsimbeen ku ka Magbebaye.” 
Ne ingkahiyan ni Samwil si Saul, “Kene ku egdumaan sikeykew su insamsamilian nu ma ka lalag te Magbebaye, purisu insamsamilian kad degma te Magbebaye isip Hari te Israil.” 
Te peg-inniyug e ni Samwil eyew eggipanew e, inggen-genan ni Saul ka pulipusan te kumbale din wey nahisi seini. 
Ne migkahiyan sikandin ni Samwil, “Te seini ne aldew, in-awe e te Magbebaye due te keykew ka migharian te Israil iling te peggen-gen nu te kumbale ku ne nahisi. Ne imbehey rin e seini diye te sabeka ne sumbaley nu ne meupiya pad keykew. 
Kene eg-uubat wey kene egkaalin ka suman-suman te Manama ne imbantug te Israil su kene sikandin ne iling te etew ne egkaalin ka suman-suman.” 
Ne migkahi si Saul, “Piru minsan pad nakasala a, tahure e red diye te tangkaan te me igbuyag te keet-etawan ku wey diye te tangkaan te intiru ne Israil, wey dumeyi e red nikeykew eyew egsimbeen ku ka Magbebaye ne iyan ka Manama nu.” 
Sikan naa ka migdumaan e ni Samwil si Saul, wey migsimba te Magbebaye si Saul. 
Ne migkahi si Samwil, “Uyana niyu kayi te keddi si Agag, ka Hari te me Amalikanen.” Ne migparani si Agag diye te kandin ne ware ingkalaggew, wey migkahi sikandin diye te suman-suman din, “Malehet iya ne kena ad nikandan eggimatayan.” 
Piru migkahi si Samwil, “Nawaraan ka me malitan te me anak dan tenged te pegpangimatey nu pinaahi te kampilan, ne puun due, egkawaraan degma te anak ka iney nu.” Ne intadtad e ni Samwil si Agag diye te tangkaan te Magbebaye diye te Gilgal. 
Te neimpusan e sika, miggendiyad e si Samwil te Rama. Ne si Saul, mig-uli e degma diye te baley rin diye te Gibiya. 
Ne warad mig-abey migpakigkita si Samwil ki Saul taman te migpatey e sikandin piru miglungku sikandin te neyitabu ki Saul. Ne nekegsendit ka Magbebaye te inggimu rin ne Hari te Israil si Saul.