1 Samwil.
18.
Te nekeimpus e si Dabid ka egpakiglalag ki Saul, nekeg-alukuy e amana sikandan ki Diyunatan. Indakelan ni Diyunatan te geyinawa si Dabid ne alukuy rin iling te peggeyinawa rin te pegkeetew rin. 
Bunsud te seeye ne aldew, diyad e peugpaa ni Saul te kandin si Dabid, wey ware din e tuhuti ne eg-uli diye te baley te amey rin. 
Ne migpakigsabut si Diyunatan ki Dabid ne egpeunungey sikandan taman te katamanan su indakelan din ma sikandin te geyinawa iling te pegkeetew rin. 
Ne inluung e ni Diyunatan ka mateles ne diyakit din ne malayat wey imbehey rin e seini ki Dabid, lagkes ka me kumbale din, duma te kampilan din, pane, wey libed. 
Migpanpanalu si Dabid te langun ne impalusuran kandin ni Saul, sikan naa ka inggimu e sikandin ni Saul ne sabeka ne pangulu te me sundalu. Nakapahale seini te langun ne etew wey te me upisyal ni Saul. 
Pegkapenga neyimatayi ni Dabid si Gulayat, nanguli e ka me etew. Ne insinug-ung si Saul te me malitan ne namuun te me siyudad te Israil ne memaggale-gale ne nangulahing wey migmanesayew ne egbalesen te me tamburin wey te me alpa. 
Ne mig-ulahing sikandan te peggale-gale dan ne miggenendue, “Eglibu-libu ka neyimatayan ni Saul, piru egsapulu ne libu mule ka neyimatayan ni Dabid.” 
Ne nabelu-belu si Saul tenged su ka seeye ne lalag ware nakapahale kandin. Ne migkahi sikandin, “Mania te migkahi sikandan te tigsapulu ne libu ka napatey ni Dabid, piru libu-libu re ka neyimatayan ku? Ne egkataman, eggimuwen dan e sikandin ne Hari.” 
Ne puun te seeye ne aldew, eg-iipaten e ni Saul si Dabid tenged su nasekel sikandin kandin. 
Te seup ne aldew, in-umaan si Saul te mareet ne panisingan ne impeuyan te Manama, wey migpangasak sikandin diye te seled te baley rin ne hendue te egbusawen. Ne dutu, migpangelit e te alpa si Dabid sumale te ingkalayami rin ne eggimuwen. Ne miggen-gen si Saul te deldeg 
wey impilak din e si Dabid te migkahi diye te suman-suman din, “Igpakpak ku si Dabid diye te alabat.” Ne kararuwa pilaka ni Saul si Dabid, piru nakalikay sikandin. 
Ne migduma ka Magbebaye ne Manama ki Dabid, wey warad e sikandin migduma ki Saul. Purisu, naaldek si Saul ki Dabid. 
Sikan naa ka impaawe e ni Saul si Dabid diye te tangkaan din wey inggimu rin e ne pangulu te senge-libu ne me sundalu. Purisu, migpangulu e si Dabid te me sundalu rin te gira. 
Migpanpanalu si Dabid te langun ne inggimu rin su migduma ma kandin ka Magbebaye. 
Ne naaldek amana si Saul ki Dabid te pegkakita rin ne migpanpanalu sikandin. 
Piru inggeyinawaan si Dabid te langun ne matig-Israil wey matig-Huda su migpanpanalu ma sikandin ka migpangulu te gira. 
Ne migkahiyan ni Saul si Dabid, “Seini red si Mirab ka kinakakayan ne anak ku ne malitan. Igpaasawa ku sikandin keykew; piru ipapitew nu pa ka kabulut nu te egpakiggira para te Magbebaye ne Manama isip pegpanganuhang keddi.” Su migsuman-suman si Saul ne te iling kayi ne paahi: egkapatey te me matig-Pilistiya si Dabid wey kenad e ne sikandin pad ka eggimatey kandin. 
Ne migkahiyan ni Dabid si Saul, “Mahal ne Hari, kena a ne likes ne egkeyimu ne mekaamung nu tenged su kene ne impurtanti ka pamilya ku kayi te Israil.” 
Piru te pegginguma te timpu ne igpaasawe e ki Dabid si Mirab, nasi mule ipaasawa sikandin ni Saul ki Adriyil ne matig-Mihula. 
Ne due anak ni Saul ne egngaranan ki Mikal ne neupian ki Dabid. Innangen seeye te me etew ki Saul wey nahale sikandin te narineg din seeye. 
Ne migkahi si Saul diye te suman-suman din, “Igpaasawa ku si Mikal ki Dabid eyew egkeyimu sikandin ne sahilut ki Dabid taman te egkeyimatayan sikandin te me matig-Pilistiya.” Sikan naa ka ingkahiyan e man‑e ni Saul si Dabid, “Egkamekaamung ku red iya sikeykew.” 
Purisu insuhu ni Saul ka me suluhuanen din ne egpeel-helesan egpanangeni si Dabid, “Nahale keykew ka Hari wey inggeyinawaan ka te langun ne me upisyal rin, purisu pamekaamung kad e te Hari.” 
Ne innangenan te me suluhuanen ni Saul si Dabid meyitenged te seeye ne lalag. Ne mig-inse si Dabid, “Te suman-suman niyu, malemu re ka egkeyimu ne mekaamung te Hari? Egkaayu-ayu e re wey ware neileyi.” 
Ne innangenan si Saul te me suluhuanen din te ingkahi ni Dabid. 
Ne migkahi si Saul, “Nangeni niyu si Dabid te seini ne lalag, ‘Ware egbuyuen te Hari ke kene, iyan de ka sabeka ne gatus ne laplap te lebut te me lukes ne matig-Pilistiya eyew egpakasuli sikandin te me kuntere din.’” Ne dutu, migsuman-suman si Saul ne egkeyimatayan iya te me matig-Pilistiya si Dabid. 
Te pegnangen te me suluhuanen ni Saul ki Dabid meyitenged dutu, nahale sikandin ne egkeyimu ne mekaamung ni Saul. Purisu te ware pad migginguma ka kerew te kasal, 
migpakiggire e si Dabid te me matig-Pilistiya duma te me sundalu rin wey nakapatey sikandan te daruwa ne gatus (200) ne me matig-Pilistiya, wey impanempug dan e ka me laplap te me lebut dan wey imbehey seini diye ki Saul eyew egkamekaamung din e si Dabid. Sikan naa ka impaasawe e ni Saul ki Dabid si Mikal. 
Te pegkakita ni Saul ne migduma ka Magbebaye ne Manama ki Dabid, wey miggeyinawaan amana sikandin te anak din ne si Mikal, 
nanasnasian pad ka kaaldek din kandin. Purisu, neyimu e si Dabid ne kuntere ni Saul taman te migpatey e sikandin. 
Ne migpabulus migpakiggira ka me pangulu te me matig-Pilistiya te me matig-Israil. Te tagse gira ran, subla ne migpanpanalu si Dabid du te duma ne me upisyal ni Saul. Sikan naa ka migmabantug amana sikandin.