1 Samwil.
24.
Te peg-uli ni Saul te migpakiggira te me matig-Pilistiya, due nakanangen kandin ne diye si Dabid te disirtu diye te In-Gidi. 
Purisu mig-alam si Saul te tatelu ne libu (3,000) ne me etew puun te intiru ne Israil wey miggipanew e ka egpamitew ki Dabid wey te me etew rin. Miggendiye sikandan te inged ne marani te dalama ne in-ugpaan te leew ne me kambing. 
Ne nekeuma si Saul diye te alad te karniru ne diye te ilis te dalan, wey due sulung dutu. Ne migseled e sikandin diye eyew eg-indes piru diye bes mule te kinaledleran miggeles si Dabid wey ka me etew rin. 
Migkahiyan si Dabid te me etew rin, “Seinid en iya ka timpu ne ingkahi te Magbebaye ne Manama keykew, ‘Igbehey ku iya keykew ka kuntere nu wey himuwa nu ke nekey ka igkeupii nu ne eggimuwen kandin.’” Ne migpahanad-ganad migdugpu si Dabid ki Saul wey impisang din ka pupul te kumbale ni Saul. Ne ware seini naheram ni Saul. 
Piru te neimpusan e seini, nekegsendit si Dabid tenged su impisang din ka pupul te kumbale ni Saul. 
Ne migkahiyan din ka me etew rin, “Kene egtuhut ka Magbebaye ne Manama ne egsahap keddi ka ahalen ku su in-alam din sikandin ne Hari.” 
Ne nasaparan din ka me etew rin pinaahi te sika ne lalag wey ware din tuhuti sikandan te peggimatey ki Saul. Ne migsasindeg si Saul wey migligwang e diye te sulung wey migpabulus e ka miggipanew. 
Ne migligwang e degma si Dabid diye te sulung wey in-umew rin si Saul te miggenendue, “Mahal ne Hari!” Te peglilingey ni Saul, miglangkeb e si Dabid diye te tane eyew te pegtahud kandin. 
Ne migkahiyan ni Dabid si Saul, “Mania te migpalintutuu ka te me etew ne migkahi ne egkeupian e kun ne egdereet keykew? 
Kuntee ne aldew egkanengnengan nu ke immenu ka te Magbebaye te pegbehey keddi diye te seled te sulung. Imbagget a te duma ne eggimatayan ka piru ware ku sikeykew himatayi. Migkahiyan ku sikandan te kene ku egdereetan ka ahalen ku tenged su in-alam sikandin ne Hari te Magbebaye. 
Ame, pitawa nu ke nekey seini se inggen-genan ku. Baad seini te kumbale nu ne impisang ku. Napisang ku ka pupul te kumbale nu piru ware ku himatayi sikeykew. Sika ka egpamalehet ne ware tuyu ku ne pegdereet keykew wey ware mareet ne neyimu ku. Wara a nakasale keykew piru migpanalukunan a nikeykew eyew eggimatayan. 
Meupiya ne ka Magbebaye iyan eggukum kanta te daruwa wey ka egsuli keykew te mareet ne inggimu nu keddi, piru kene ku iya sikeykew egdereetan. 
Su egkahi rengan ka me kabuybuyahan, ‘Ka mareet de ne etew ka eggimu te mareet,’ sikan naa ka kene ku egdereetan sikeykew. 
Etuwey naan de iya keykew Hari te Israil te egpanlupug keddi, hentew e bes seini se eglupuhen nu? Iling ke re te migpanlupug te migpatey e ne asu wey ke sisip naa. 
Meupiya ne iyan eggukum ka Magbebaye ne Manama ke hentew kanta te daruwa ka due sale wey eleg ne egparusaan. Meupiya perem ne egpamminehen a nikandin, egpangabangan, wey egbulihan ne kene egsahap keykew.” 
Te nekeimpus e si Dabid ka eglalag, migkahi e si Saul, “Sikeykew iya sika Dabid ne anak ku?” Ne migpanaman-taman e sikandin migsinehew. 
Migkahi pad iya man‑e si Saul, “Subla ke pad ne matareng keddi, su minsan nekeyimu a te mareet keykew, meupiya mule ka inggimu nu keddi. 
Sikan e pad iya nikeykew nangeni te meupiya ne inggimu nu keddi. Imbehey ad te Magbebaye keykew piru wara a himatayi nikeykew. 
Ke egkakita te sabeka ne etew ka kuntere din, egbalaharen din naa seini ne egpakapallahuy? Egdasahan ka perem te Magbebaye tenged te keupiya ne impakita nu keddi te seini ne aldew. 
Nakanengneng a ne egkeyimu ka iya ne Hari wey sikeykew ka egpabulus-bulus ne egmandu te Israil. 
Na, saad ka keddi pinaahi te ngaran te Magbebaye ne Manama ne kene nu egpangimatayan ka me kabuhalan ku eyew egkabuhal-buhal red ka pamilya ku.” 
Ne migpahunlibet e si Dabid ki Saul. Te neimpusan e seini, mig-uli e si Saul piru miglibed ded mule si Dabid wey ka me etew rin diye te innelesan dan.