1 Samwil.
27.
Nakakahi si Dabid diye te suman-suman din, “Egginguma ka timpu ne egkeyimatayan a ni Saul. Iyan meupiya ne eggimuwen ku se egpallahuy diye te me matig-Pilistiya eyew egpeeneng-eneng e si Saul ka egpamitew keddi kayi te intiru ne Israil. Ne egpakapariyu ad kandin.” 
Sikan naa ka miggipanew e si Dabid duma te hen‑em ne gatus (600) ne etew rin wey miggendiyad e ki Akis ne Hari te Gat wey anak ni Mauk. 
Ne diyad e sikandan mig-ugpe te Gat duma ki Hari Akis. Induma te tagse sabeka ka me pamilya ran wey induma degma ni Dabid ka daruwa ne duwey rin ne si Ahinuwam ne matig-Hisriil wey si Abigil ne matig-Karmil ne balu ni Nabal. 
Te nahuhuran e si Saul te migpallahuy e si Dabid diye te Gat, ware din e sikandin pamitawa. 
Sabeka ne aldew, ingkahiyan ni Dabid si Akis, “Ke ingkahale e red ubag nikeykew, behayi key te sabeka ne lungsud kayi te nasud nu ne egkeugpaan ney su kene key ne likes ne kayi eg-ugpe te siyudad ne in-ugpaan nu, Mahal ne Hari.” 
Purisu te seeye ne aldew, imbehey e ni Akis ki Dabid ka Siklag. Puun dutu, iyan e kamuney te Siklag ka me Hari te Huda taman kuntee. 
Ne mig-ugpe si Dabid diye te inged te me matig-Pilistiya te sabeka ne leg‑un wey hep‑at ne bulan. 
Taheed te mig-uugpe si Dabid wey ka me etew rin diye, migpanlusuran dan ka me Gisurihanen, ka me Girsihanen, wey ka me Amalikanen. Bunsud pad dengan, diyad nangugpe ka sika ne me etew te inged ne marani te Sur peendiye te Ihiptu. 
Tagse eglusud ensi Dabid te sabeka ne inged, egguleen dan iya te egpangimatey ka me lukes wey me malitan. Ne egpanguen dan e ka me karniru, baka, asnu, kamil, wey me kumbale. Ne egkataman, eglibed e sikandan diye ki Hari Akis. 
Ke eg-insaan ni Akis si Dabid, “Hendei kew migpanlusud kuntee?” Ne egtabak sikandin, “Diye te inged te Nigib ne due matig-Huda,” wey ke, “diye te inged te Nigib ne in-ugpaan te me Hiramilhanen” wey ke “diye te me Kinihanen.” 
Egpangimatayan iya enni Dabid ka langun ne me lukes wey me malitan su eyew ware egpekeendiye te Gat ne egpakanangen ke nekey ka inggimu rin. Seini ka layun eggimuwa ni Dabid te timpu ne diye sikandin mig-ugpe te inged te me matig-Pilistiya. 
Amana ne migsalig si Akis ki Dabid wey migkahi diye te suman-suman din, “Indumutan en iya kuntee si Dabid te keet-etawan te Israil, puun due, egkeyimu kud sikandin ne suluhuanen taman te ware egtamanan.”