2 Samwil.
2.
Nataman, mig-inse si Dabid te Magbebaye ne Manama ne migkahi, “Egtakereg e naa diye te sabeka te me siyudad te Huda?” Ne migtabak ka Magbebaye, “Uya.” Ne mig-inse e man‑e si Dabid, “Hendei lenged?” Ne migtabak ka Magbebaye, “Diye te Hibrun.” 
Purisu migtakereg e si Dabid duma te daruwa ne duwey rin ne si Ahinuwam ne matig-Hisril wey si Abigil ne impamalu rin ki Nabal ne matig-Karmil. 
Ne induma ni Dabid ka me etew rin duma te me pamilya ran wey diyad sikandan nangugpe te me lungsud te Hibrun. 
Ne migmangendiye te Hibrun ka me matig-Huda wey mig-itisan dan e te lana ka ulu ni Dabid eyew egkeyimu ne Hari te intiru ne Huda. Te impangguhuran dan e si Dabid te iyan miglebeng ki Saul ka me matig-Habis-Gilyad, 
migsuhu e si Dabid te egpahuhuren din eyew egpakahiyan ka me matig-Habis, “Egpanalanginan kew te Magbebaye ne Manama tenged te keupiya niyu te ahalen niyu ne si Saul pinaahi te peglebeng kandin. 
Ne meupiya perem ne igpapitew te Magbebaye ne Manama ka geyinawa rin ne kene egkabalbalawan wey ka pegkamatinumanen din due te kaniyu. Ne eg-upianan ku sikaniyu tenged te peggimu niyu rue. 
Ne kuntee, nekal-nekal kew wey kene kew paliliyas tenged su migpatey e si Saul ne ahalen niyu, wey mig-itisan ad te me matig-Huda te lana isip Hari dan.” 
Te seeye ne timpu, si Abnir ne anak ni Nir ne pangulu te me sundalu ni Saul, miggendiye te Mahanaim duma te anak ni Saul ne si Isbusit. 
Ne inggimu rin ne Hari si Isbusit diye te inged ne Gilyad, Ashuri, Hisril, Ipraim, Binhamin, wey diye te intiru ne Israil. 
Hep‑at ne pulu (40) ne leg‑un ka idad ni Isbusit te migbunsud sikandin ka mighari te Israil. Ne mighari sikandin te daruwa ne leg‑un. Piru si Dabid ded ka in-iila ne Hari te me matig-Huda. 
Ne mighari si Dabid diye te Huda te pitu ne leg‑un wey hen‑em ne bulan, te timpu ne diye sikandin mig-ugpe te Hibrun. 
Nataman, miggendiye si Abnir ne anak ni Nir te Gibyun puun te Mahanaim duma te me etew ni Isbusit. 
Ne insinug-ung sikandan ni Huwab ne anak ni Siruya wey te me etew ni Dabid diye te inlungag ne limuranan te weyig diye te Gibyun, wey migpatalipahey sikandan ka naminnuu diye te ilis te lungag. 
Ne migkahiyan ni Abnir si Huwab, “Egpeg-eheten ta ka me sundalu ta kayi te tangkaan ta.” Ne migtabak si Huwab, “Ne uya!” 
Ne migmanasindeg e ka sapulu wey daruwa te me sundalu ni Isbusit ne me kabuhalan ni Binhamin wey ka sapulu wey daruwa degma ne me sundalu ni Dabid. 
Ne migpahen-geney ka tagse sabeka te bulbul ran wey migparugsuey e sikandan, sikan naa ka nenekeg-unung sikandan langun. Purisu migngaranan e ka seeye ne inged te Hilkat-Hasurim. Ka sika ne inged diye te Gibyun. 
Ne mangune-kune ka gira te seeye ne aldew, wey natalu te me etew ni Dabid si Abnir wey ka me matig-Israil. 
Ne diye langun ka tatelu ne anak ni Siruya ne ensi Huwab, Abisay, wey si Asahil duma te sundalu ni Dabid. Si Asahil amana ne iiyali ne egpallahuy iling te usa, 
wey ware din peen-enengi te eglupug si Abnir. 
Ne miglilingey si Abnir wey mig-inse, “Sikeykew sika Asahil?” Ne migtabak si Asahil, “Uya, sikeddiey.” 
Ne migkahi si Abnir, “Suwey kad e wey dakep kad e te sabeka te me sundalu wey kua nu ka me panganiban din.” Piru ware migpeeneng-eneng si Asahil ka eglupug kandin. 
Ne migkahiyan e man‑e ni Abnir si Asahil, “Peen-enengi ad iya nikeykew te eglupug su eyew kena a egkapehes ne eggimatey keykew! Egmenuwen ku naan de iya te eg-atubang ka suled nu ne si Huwab?” 
Piru ware migpeeneng-eneng si Asahil ka miglupug kandin, sikan naa ka insundang e ni Abnir te subeng te deldeg din si Asahil wey mig-abas seini diye te peka rin. Napeled sikandin wey namatey e. Ne egsanggel diye te namatayan ni Asahil ka me etew ne egpakabaye dutu. 
Piru inlupug mule enni Huwab wey ni Abisay si Abnir. Te eglineb e ka aldew, nekeume e sikandan diye te bubungan te Ama ne lenged te Giya, ne diye te dalan peendiye te disirtu diye te Gibyun. 
Ne miglibulung ka me sundalu ne kabuhalan ni Binhamin diye te keinniyuhan ni Abnir diye te puntul te bubungan wey migpangandam eyew te pegpakiggira. 
Ne mig-inse si Abnir ki Huwab ne migpanguleyi, “Egpahiggireey ki naan en iya te ware egtamanan? Ware ke buwa nakasuman-suman te susumpiti ka egpangkusan kayi? Ken‑u nu naan pad egsapari ka me etew nu ne egpanlupug te me suled dan?” 
Ne migtabak si Huwab, “Igpahunlibet ku te manekal ne Manama, ne emun ke ware nu lalaha sika, egparahasdahasan kew iya perem te eglupug te me etew ku taman te egkapawe.” 
Purisu imparahing e ni Huwab ka trumpita wey migpeeneng-eneng e ka langun ne miglupug te me matig-Israil, wey nasanggel e ka gira. 
Ne miggipanew si Abnir duma te me sundalu rin te napawaan peendiye te Araba. Ne miglapas sikandan te Weyig ne Hurdan wey migpabulus ka miggipanew ne diye migbaye te inged ne Bitrun taman te nekeuma sikandan diye te Mahanaim. 
Te migpeeneng-eneng e si Huwab ka egpanlupug ki Abnir, impalibulung din e ka me etew rin. Ne nanengnengan din ne due sapulu wey siyam (19) ne etew ni Dabid ne migpatey; ware pad labet ni Asahil. 
Piru nekeyimatey ka me etew ni Dabid te tatelu ne gatus wey hen‑em ne pulu (360) ne me sundalu ne kabuhalan ni Binhamin ne sakup ni Abnir. 
Ne in-angey ran e ka lawa ni Asahil wey inlebeng dan e diye te inlebengan te amey rin diye te Bitlihim. Ne nangipanew e si Huwab wey ka me etew rin te intiru ne marusilem, wey nekeuma sikandan diye te Hibrun te egsile e ka aldew.