2 Samwil.
3.
Seeye ka bunsuranan te naluhey ne pegpeehetey te miglapig te pamilya ni Saul wey te miglapig ki Dabid. Ne nanasnasian ne migmasalig ka me etew ne miglapig ki Dabid piru nahan-ganaran mule migdeisek ka me etew ne eglapig ki Saul. 
Seini ka me anak ni Dabid ne lukes ne neetew diye te Hibrun: si Amnun ka kinakakayan ne anak din ki Ahinuwam ne matig-Hisril, 
si Kiliyab ka igkarangeb ne lukes ne anak din ki Abigil ne balu ni Nabal ne matig-Karmil, si Absalum ka igkatelu ne lukes ne anak din ki Maaka ne anak te Hari te Gisur ne si Talmai, 
si Aduniyas ka igkeep‑at ne lukes ne anak din ki Hagit, si Sipatiyas ka igkalimma ne lukes ne anak din ki Abital, 
wey si Itrim ka igkeen‑em ne lukes ne anak din ki Igla. Sika ka me anak ni Dabid ne neetew diye te Hibrun. 
Te sasangan pad ne egpeehetey ka miglapig ki Saul wey ka miglapig ki Dabid, migmaresen e ne pangulu si Abnir te kalapihan ni Saul. 
Ne due duwey dengan ni Saul ne egngaranan ki Rispa ne anak ni Aya. Ne ingkahiyan ni Isbusit si Abnir, “Mania te ingguliran nu ka duwey te amey ku?” 
Ne migtabak si Abnir ne nabelu-belu, “Migsuman-suman ke bes ne iling a te asu wey miglapig te Huda? Miglapihan ku ka amey nu, ka pamilya rin, wey ka me alukuy rin puun pad dengan taman kuntee wey ware ku sikeykew ibehey ki Dabid. Ne kuntee, egbayungan a nikeykew ne ingguliran ku ka sika ne malitan! 
Ke iling ma rue, meupiya pad ke egbulihan ku si Dabid ne egkatuman ka insaad kandin te Magbebaye ne Manama, wey egtamtamanan a perem eglegpari te Manama ke kene ku egbulihan sikandin. 
Migsaad ka Manama ne igbehey rin ka migharian te kabuhalan ni Saul diye ki Dabid wey sikandin e ka eghari te Israil wey te Huda ligkat te Dan peendiye te Birsiba.” 
Ne warad nakatabak si Isbusit su naaldek sikandin ki Abnir. 
Nataman, migsuhu e si Abnir te egpahuhuren diye ki Dabid diye te Hibrun eyew egpakahiyan sikandin, “Sikeykew ka eleg ne eghari te inged te Israil. Egpasabutey ki wey egbulihan ku sikeykew eyew egkasakup nu ka intiru ne Israil.” 
Ne migkahiyan ni Dabid ka seeye se insuhu ni Abnir, “Meupiya! Egpasabutey key iya piru due sabeka ne ighangyu ku kandin: kene egkaayun ne egpakigkita sikandin keddi ke kene din egkaruma si Mikal ne anak ni Saul.” 
Ne impeendiyaan degma ni Dabid te me suluhuanen din si Isbusit ne anak ni Saul eyew egpakahiyan, “Ilibed nu keddi ka asawa ku ne si Mikal su miggimatey a te sabeka ne gatus (100) ne Pilistihanen wey impisang ku ka laplap te me lebut dan isip betad te peg-asawa ku kandin.” 
Sikan naa ka impaangey e ni Isbusit si Mikal diye te asawa rin ne anak ni Lais ne egngaranan ki Paltiil. 
Ne migsinsinundul re due ka asawa ni Mikal kandin ne migsinsinehew taman te Bahurim. Ne nataman, migkahiyan e sikandin ni Abnir, “Uli kad e.” Purisu mig-uli e sikandin. 
Te neimpusan e seini, migpakiglalag e si Abnir te me igbuyag te Israil ne miggenendue, “Te miglihad ne timpu, egkeupian kew ne eggimuwen niyu ne Hari si Dabid. 
Ne kuntee, himuwa niyud sika. Su migsaaran te Magbebaye ne Manama si Dabid te migkahi, ‘Egluwasen ku puun te me Pilistihanen wey te langun ne kuntere dan ka keet-etawan ku ne iyan ka me kabuhalan ni Israil pinaahi te suluhuanen ku ne si Dabid.’” 
Ne inlalahan degma ni Abnir ka me kabuhalan ni Binhamin. Ne nataman, miggendiyad e sikandin te Hibrun eyew egpangguhuran din si Dabid te mig-uyun e ka langun ne matig-Israil lagkes ka me kabuhalan ni Binhamin ne egkeyimu sikandin ne Hari dan. 
Te pegginguma ni Abnir diye te Hibrun duma te daruwa ne pulu (20) ne me etew rin, migpasahakeen e si Dabid para kandan. 
Ne migkahiyan ni Abnir si Dabid, “Mahal ne Hari, tuhuti a ne eggendiye te langun ne keet-etawan te Israil. Egbaggeten ku sikandan te pegdawat keykew isip Hari dan wey te peggimu te kasabutan te peg-ikul keykew su eyew egpakamandu kad te intiru ne Israil sumale te igkeupii te pusung nu.” Purisu impeyipanew e ni Dabid si Abnir ne meupiya se pegligkat. 
Nataman, miggingume e diye te Hibrun ka me etew ni Hari Dabid duma ki Huwab puun te pegpakiggira wey masulug ka nanguyan dan ne immangahew ran puun te me kuntere dan. Piru warad e diye si Abnir su impeyipanew e sikandin ni Dabid ne meupiya se pegligkat. 
Te peggingume e ni Huwab wey te langun ne sundalu ne migduma kandin, nahuhuran e sikandin te miggendiye te Hari ka anak ni Nir ne si Abnir wey impeyipanew red sikandin te Hari. 
Nataman, inggendiyaan e ni Huwab si Dabid wey ingkahiyan, “Mania te inggimu nu ka iling due? Te miggendinid bes iya si Abnir ne mania te nasi nu re iya sikandin peyipanawa? Diye lad iya sikandin su! 
Sumsumana nu ne miggendini si Abnir eyew te peglimbung keykew wey te peg-iipat ke hendei ka egbaye-baye, wey te pegnengneng te langun ne eggimuwen nu.” 
Ne mig-awe e si Huwab puun te tangkaan ni Dabid, wey impalupug din e te me etew si Abnir. Ne diye dan neumeyi si Abnir te belun te Sira wey induma ran e sikandin te eglibed diye te Hibrun, piru ware nakanengneng si Dabid meyitenged kayi. 
Te pegginguma ni Abnir diye te Hibrun, indume e sikandin ni Huwab diye te sabeka ne sinabeng diye te gumawan te siyudad su egpalalahey kun ubag sikandan se daruwa. Ne insundang e ni Huwab si Abnir diye te getek eyew te pegsuli te kamatayen te suled din ne si Asahil. Ne namatey e si Abnir. 
Te ware naluhey, nanengnengan e seeye ni Dabid wey migkahi sikandin, “Kene ne sikeddi wey ka keet-etawan ku ka egkalebut diye te tangkaan te Magbebaye ne Manama tenged te kamatayen te anak ni Nir ne si Abnir. 
Eglegparan perem si Huwab duma te kabuhalan din. Meupiya perem ke due kabuhalan din ne kene egkaawaan te dalu ne egnenane, wey ke eg-ibungen naa, wey ke egkapungku ne egkeilangan te tuked te peggipanew, wey ke egkapatey pinaahi te kampilan, wey ke egkabitil naa.” 
Purisu innimatayan si Abnir te talaari ne si Huwab wey si Abisay tenged su neyimatayan din ka suled dan ne si Asahil te timpu te gira diye te Gibyun. 
Nataman, ingkahiyan ni Dabid si Huwab wey ka langun ne duma rin, “Gisia niyu ka me kumbale niyu wey saluub kew te me saku, wey duma kew te egsabal te minatey ne si Abnir wey gun‑a kew ka eggipanew ne eglungku.” Ne migsinundul si Hari Dabid te seeye se me etew ne migtiang te lungun. 
Insabal ran si Abnir diye te Hibrun. Ne migpandalawit si Dabid diye te inlebengan wey migpandalawit degma ka langun ne etew. 
Ne mig-ulahing te peglungku ka Hari ne miggenendue, “Mania te migpatey si Abnir ne iling te mareet ne etew? 
Te peggimatey kandin, ware bakua ka me belad din wey me paa rin iling te mareet ne etew. Piru in-akalan sikandin wey inggimatayan te mareet ne etew.” Ne migsinehew e man‑e ka langun ne etew. 
Ne nangendiye ki Dabid ka langun ne etew eyew eggeraman dan sikandin te egpehes te egpakeen taheed te maaldew pad. Piru migsaad si Dabid ne migkahi, “Egtamtamanan a perem te eglegpad te Manama ke eggeram a te paan wey te minsan nekey te kene pad eglineb ka aldew!” 
Ne nanengnengan te langun ne etew seeye se ingkahi ni Dabid wey nakapahale seeye kandan. Ne ingkahale dan iya ka langun ne inggimu te Hari. 
Purisu te seeye ne aldew, nanengnengan te langun ne etew wey te langun ne kabuhalan ni Israil ne ware labet ni Dabid te pegkapatey ni Abnir. 
Nataman, ingkahiyan ni Dabid ka me upisyal rin, “Ware kew bes nakamaan-maan ne namatey ka sabeka ne mabantug ne pangulu te Israil kuntee ne aldew? 
Mahuya a amana kuntee ne aldew, minsan naalam a ne Hari. Kene ku egkapegnel ka me anak ni Siruya su subla re sikandan ne mabbulut para keddi. Egsulian perem sikandan te Magbebaye ne Manama sumale te maddeet ne inggimu ran!”